Read Khumi Chin ISAIA 36 Bible Online

ISAIA 36 - Khumi Chin bible

ISAIA 36

¹Juda samrang Hezekia my peang nai saneng holai palyhrei saneng y, Asuria empara samrang Senakheri ly Juda pri y awm nai amtangra marychi ai tiu vui nai ne.

²Naibaly samrang Senakheri ly my i tavailu areng ai Lakhisa mary i tavaimi kanghuchi hawi Jerusalem mary y chei iy, samrang Hezekia teng y apasum ai nai thui hai bo. Tavailu areng py tleng tuikan dengdairei leaung kathiu nai tuilam sahawi, kanih aneng nai khumichi i kalop sa nai meingtym lam py peang vui bo.

³Huna nai khala y Juda pri i khumi leaung thomreichi ly ni hawi ka-vum sa. Nichi ly Hilikia i chapo samrang yhm miteaung keh Elijakim, samrang yhm secretary Shebana hawi Asaph i chapo recordchi kry nai Joahchi ne.

⁴Asuria tavailu areng my nichi teng y, “Samrang Hezekia ly ati mana nai amymy ai hina tanrei a-ym na mo, nanai empara samrang my pany ai nai ngai.

⁵Tavai atho ai leu haiho hawi pajau ai, nanai nangchi athang khai u a? Kai ai tiu ai nai nangchi ai ami my sabawm ai nai thang khai u mo?

⁶Nangchi ly Aikupta pri i kasabawmra ajeng u bo. Na i py huni pri ai paleung pado nai ly tleu iy kiu y viu reng nai japang uipo ai cheaungvawi palawn nai atawm. Aikupta samrang ly mychi ai paleung pado nai neng khala, japang uipo hawi naini atawm nai ne,” napi.

⁷Naibaly Asuria tavailu areng my thui bi nai ly “Nangchi my, ‘Kaichi ly kaimychi i ARENG Tameuh ai paleung pado,’ nanai kai teng y thui u ai a? Hezekia ly ARENG ai chiu ai nai meingtymchi hawi maichamchi taphra iy, Juda khumichi hawi Jerusalem mary i khumichi ai, Jerusalem mary y awm nai maichamra y naini chiu u ai nai leu pei nai ne.

⁸Kai ly empara samrang i amyn y tau iy, nangchi hawi kamjau kamteang a-awi ai. Nangchi ly keaungngo atang nai risa leaung sang nyhrei kalym kalawi pajau ai nabaly, nangchi teng y keaungngo sang nyhrei kang pei ai.

⁹Nangchi ly sa thai naira theang keh nai Asuria tavailu arengchy ai malawn py, tiu u pajau y leang. Na i py Aikupta chengchi teng i nai tavai ka-ri hawi keaungngo atang nai risa kasabawmrachi kadeaung u lawh.

¹⁰Kai ly ARENG teng i kasabawmra abawi y naimy, nangchi i pri ai taphra nai ne, nanai nangchi athang khai u a? Nangchi i pri y tiu ai nai ARENG mymy kypkyp my, kai ai pato nai ne.

¹¹Huna nai khala y Elijakim, Shebana hawi Joahchi ly huni tavailu areng teng y, “Arami cheng leu hawi kaichi ai leu pei ba. Huni leu kaichi ly thai kawp; Hebrai cheng leu hawi thui pi moh. Mary apai salo y awm nai khumichi tangai u bo,” napi.

¹²Huni khumi my, empara samrang ly nang hawi nangchi i samrang teng y naini, hini leuchi thui pi ai nai kai ai pato nai ne, nanai athang khai u a? Kai ly mary apai salo y ateh u nai khumichi teng y py thui pi nai ne. Nichi py nangchi kamta amychi i ei cha iy, amychi i sakhawn hang nei u teang ai nai tla ai,” nanai thui pi bi bo.

¹³Naibaly ni ly ang thau iy Hebrai cheng leu hawi thui pi nai ly “Nangchi teng y Asuria empara samrang my thui pi nai leu tangai u.

¹⁴Huni samrang my, nangchi ly Hezekia i tapawp naira y tangai u y ai nai, pany hai pi nai ne. Hezekia ly nangchi ai atleu pajau y leang.

¹⁵ARENG ai paleung pado ai nai, ni my parawi teu i py, nangchi tangai u moh. ARENG ly nangchi ai atleu pi ai nanai py, kaichi Asuria tavaimichi teng y nangchi i mary tiu vui ai nai pei ai ny y nanai py, athang khai u moh.

¹⁶Hezekia i leu tangai u moh! Mary theung i nai theu iy apasum ai nai, nangchi ai Asuria empara samrang my leu pei nai awm. Nangchi ai empara samrang ly nangchi i pri hawi atawm nai pri, chohpui chomaw chohnei hawi kreip hang kangtha, meaungkaten hawi kreip akho nawi nai pri mang y tha y rai nai thym khala y, nangmychi i kreip keungchi hawi thaidu keungchira i athaichi cha hai iy, nangmychi i tuikanchira i tui py nei ai nai pei ai.

¹⁸ARENG ly kaichi ai atleu pajau, nanai nangchi athang khai u ai nai Hezekia my tapawp nai tangai u moh! Cheng takhrachi i tameuhchi ly nichi i pri ai, Asuria empara samrang kiu i nai atleu pi sai a?

¹⁹Hamath pri hawi Arpa prichi i tameuhchi ly vai, ma y awm mo? Sepharvaim pri i tameuhchi ly vai, ma y awm mo? Mani tameuh my Samari pri ai atleu pi mo?

²⁰Huni pri bawibawichi i tameuhchi theung y mani tameuh ly my i pri ai kaichi empara samrang kiu i nai, mana khala atleu pi vai mo? Tumbaly ARENG py Jerusalem mary ai atleu pajau, nanai nangchi ati mana nai athang khai u mo?,” napi.

²¹Huna nai khala y khumichi ly Hezekia my taviu nai kamta, awm u pypy nai ne. Leu sairei py patheung u teang y.

²²Naibaly Elijakim, Shebana hawi Joahchi ly paleung si paleung mawn naimy, mychi i ateaungchi sei iy Asuria tavailu areng i leu ai, samrang teng y chei iy amti pi bo.