Read Khumi Chin ISAIA 37 Bible Online

ISAIA 37 - Khumi Chin bible

ISAIA 37

¹Huni khumichi i amti pi nai leu thai phai thai baly, samrang ly paleung bi i, my i ateaungchi sei iy paisiu kanih akhiu naimy, ARENG i Achura yhm mang y chei bo.

²Samrang ly samrang yhm y kalop pacheang nai keung Elijakim, samrang yhm secretary Shebana hawi saneng kalen pathyp pi nai keungchi ai Amoz i chapo Isaia teng y pato bo. Huni khumichi py paisiu kanih akhiu u nai ne.

³Samrang my, Isaia teng y leu pei nai ly “Vaini ly patang nai kani ne; kaichi ly pajeng naira avum iy kangji kanga u bo. Kaichi ly neng tym i py atho by y nai deaungkho y, deaungdi tapen thai y nai neampachy hawi atawm.

⁴Asuria empara samrang ly my i tavailu areng ai pato iy, Tameuh kangheng ai mei aniu y nai leuchi thui hai bo. Nang i ARENG Tameuh ly huni leuchi thai iy, huna nai thui nai khumichi ai, kamngolai pajeng na sy. Nang py heng rai nai kaichi mipuichi i vui Tameuh teng y chiu so pi ba,” napi.

⁵Samrang Hezekia i leu pei nai nga nai khala y,

⁶Isaia ly “ARENG my mymy ai Asuria chengchi i mei aniu y nai leuchi thui nai molam y, paleung khrukhra y ai nai nang ai leu pei nai ne.

⁷ARENG ly empara samrang ai, my i pri y vawi ali teang ai nai satang sai sairei thai hai pi ai. Naibaly ni ai huni pri y my padei ai,” napi.

⁸Empara samrang ly Lakhisa mary i dengdairei theu iy, huni sahawi i Libana mary ai tiu bo, nanai thai nai khala y, Asuria tavailu areng ly samrang hawi avum ai nai, huni meingtym y chei bo.

⁹Huna nai khala y Ethiopia samrang Tirhakah my lu sa nai Aikupta tavaimichi ly mychi ai tiu ai nai ang jeu dudu bo, nanai Asuria chengchi satang nga u bo. Huni satang thai nai khala empara samrang ly Juda samrang Hezekia teng y cha harei pei pi nai ne.

¹⁰Huni cha theung y, “Nang i paleung pado nai Tameuh my, nang ly kai i kiu y tla ai nanai leu pei nai molam y, ka-dawn tamang moh.

¹¹Asuria empara samrang ly mymy taphra ai nai leu pacheang yb nai pri ai ati mana sa reng mo, nanai nang pany nai ne. Nangmy kypkyp malawn py kai teng i nai tleaung ai nai athang khai sai a?

¹²Kai i amsi pajochi ly Kozan mary, Haran mary hawi Rezeph marychi ai taphra iy, Telasar mary y awm nai Betheden chengchi ai tamyh pawn nai ne. Nichi i tameuhchi theung i mani tameuh my py, nichi ai atleu pajau y.

¹³Hamath mary, Arpad mary, Sephavaim mary, Hena mary hawi Ivah marychi ai peang nai samrangchi ly vai, ma mang y awm u pawn mo?,” nanai abawi nai ne.

¹⁴Samrang Hezekia ly huni cha ai savaichi teng i nai la iy phain chum baly, Achura yhm mang y chei iy ARENG i mo y khai bo.

¹⁵Naibaly hina nai chiu sa,

¹⁶“Kheruben salo y ateh nai kani pri tavai luchi i ARENG, Israela chengchi i ati cheaungkhang sa thai nai Areng Tameuh, nangmy leaungrei naini khaileaung pri verei ai peang nai Tameuh ne. Nang ly kani hawi khaileaung sa nai keung ne.

¹⁷Aw ARENG, vai kaichi i hnei nai tangai pi kyh ly kaichi ai khen ba. Tameuh kangheng napi nai nang ai thui tamawn nai keung Senakheri i thui nai ngiereichi tangai cham.

¹⁸Aw ARENG, Asuria empara samrangchi ly khumi cheng cheaungkhangchi ai tamyh iy, nichi i prichi ai khumi angso savai tlang hai bo.

¹⁹Nichi i tameuhchi ai ly mai veang pawn nai ly kaichi pany. Huni tameuhchi ly tameuh tatang ny y. Khumi i kiu y sa nai dengkeaung myn hawi lengseaung mynchi teu.

²⁰Aw, kaichi i ARENG Tameuh, vaimy kaichi ai Asuria chengchi kiu i nai atleu pi kyh ba. Hunaibaly nangmy leaungrei naini Tameuh ne, nanai khaileaung pri y awm nai khumi cheng bawibawichi my pany u ai,” nanai takeng bo.

²¹Naibaly ARENG ly samrang i chiu sa nai pathang pi bo, nanai Isaia my samrang teng y pei nai satangra y,

²²ARENG my, “Aw Senakheri, Jerusalem mary ly nang ai khen i, ang panui hai bo.

²³Nang ly ami ai cheh nai mo, nanai nang pany a? Israela chengchi i chai parai nai kai, Tameuh ai tahm khai y nai ne.

²⁴Nang ly nangmy i tavai ka-ri bawibawichi hawi asang keh nai Lebanon mawichi ai malawn py, tiu pajau nanai kai teng y amlyh ai nai savaichi pato nai ne. Huni meingtym y awm nai asang keh nai saitleang keungchi hawi, apu keh nai maicha keungchi ai paliu iy, atu thengreung pui theung y katym bo, nanai amlyh nai ne.

²⁵Nang ly tuikanchi tai iy pri takhra mang i tui kanei nanai py, nang i tavaimi risachi ly kheu amchyn iy, Naing tavo tui kang hai bo, nanai py amlyh nai ne.

²⁶“Jangni khala my, hini atitichi ai kaimy pasym yb nai ne, nanai nang ly mana khala py thai vai y nai sai a? Vai, huni atitichi ai kaimy tym hai bo. Amtangra marychi ai anyn angso pakheng achu nai meingtym palawn vui ai nai, nang ai sa thai naira kang pei bo.

²⁷Huni marychira y awm nai khumichi ly atho by y; kaso theu naimy mynkym u na bo. Nichi ly nisi ali kabi aho nai khala y ngam ajawi nai lam teng i achachi, ti y baly yhm amphura y prau nai acha keungchi kamta atawm.

²⁸“Na i py kai ly nang i satang pany angym bo. Nang ly ati sa iy ma mang y chei mo nanai py, kai ai mana tanrei kado theu hai mo, nanai py kapany.

²⁹Nang i kado theu nai, amlyh am-e naichi ai kai ly kapany nai ne. Hunai deaungkho y kai ly nang ai notareang pakau iy labeaung pakau chum baly, jeu nai lam mang kang vawi hai ali teang ai.”

³⁰Naibaly Isaia ly samrang Hezekia teng y, “Mo mang y tym ai nai atitichi i ka-ma-ra ly hini ne. Nang ly vaineng py, amlo py choh karam naini cha ai khyh. Na i py amlo bi khala ly choh pati iy tyn u ai. Kreip keungchi py ui iy, kreip athaichi cha ai.

³¹Juda chengchi theung i dei kamthumchi ly khaileaung y tangjyn thiu pa-rei aviu iy athai nai thengthai keungchi kamta thawn-pa u ai.

³²Jerusalem mary hawi Zion mawi salo y khumichi ly dei y naimy awm u ai. Ati mana nai mo nabaly huna nai awm asai ai nai, ati cheaungkhang sa thai nai ARENG ly dawn yb nai deaungkho y ne.

³³Asuria empara samrang i satang molam y ARENG my leu pei nai ly hini ne; mymy ly “Huni khumi ly hini mary y kun ai nai ngo y; huni mary theung y thailiho chynrei py ko ai nai nga ai ny y. Mani tavaimi sorai py khupui adang iy, mary sahawi y ahihawi ai nai nga ai ny y. Mary katanmeuh ai nai abyhra amkeuchi py sa ai nai nga ai ny y.

³⁴Asuria samrang ly my i amsa nai lam mang vawi ali teang ai. Ni ly mary theung y kun ai nai nga ai ny y. Hini ly kai ARENG my pei nai leu ne.

³⁵Kai ly kaimy i tahm awm nai ai py, kai i miseaung Davida teng y pei nai leu ka-deu molam py, hini mary ai ama hai ai,” napi.

³⁶Huni vum y ARENG i kani pri amtaw thau ly Asuria tavaimichi taira y chei iy tavaimi risa leaung 185,000 reichi ai padei pawn bo. Khawn khutawi sum khala ly huni khumi bawibawichi dei be nai ne.

³⁷Huna nai khala Asuria empara samrang Senakheri ly tavai athawn iy Ninevi mary y vawi u ali teang nai ne.

³⁸Kanirei nai khala y ni ly my i tameuh Nisaroh i achura yhm y chiu sa; chiu nai thym khala, my i chapo Adrammele hawi Sareza nini ly samrang ai myni i haisau hawi tleh iy, Ararat pri mang y preang hawi veng bo. Takhra chapo leaungrei Esarahadon ly ampo i meingtym y atheng nai ne.