Read Khumi Chin ISAIA 39 Bible Online

ISAIA 39 - Khumi Chin bible

ISAIA 39

¹Huni neng thymthang khala y Baladan i chapo Babulon samrang Meroda Baladen ly samrang Hezekia no naira i nai hawi teang bo, nanai thai nai deaungkho y cha harei hawi langseaungchi tha pi nai ne.

²Hezekia ly savaichi ai lamchung iy, mymy i yhmtheaung katuichi muku, tangka, mui katuichi, rimui hangchi hawi tavai ateaung awm nai ngiereichi patei pi nai ne. Vawnsai ateaung khaira takunchi hawi, pri meingtym tleirei y huni khumichi ai samrang my patei pi y nai ati sai py by y.

³Naibaly Isaia ly samrang Hezekia teng y chei iy, “Huni khumichi ly manira i jeu u nai mo? Nichi my nang teng y ati thui u mo?,” nanai deng. Hezekia my, “Nichi ly khri pa-rei palo nai Babulon pri dengdairei jeu u nai ne,” napi baly,

⁴“Nichi ly samrang yhm theung y atitichi niu u mo?,” nanai deng. Hezekia my, “Nichi ly samrang i yhm theung y awm nai ngiereichi niu u bo. Vawnsai ateaung khaira takunchi ra y, nichi ai patei y nai ati sai py by y,” napi.

⁵Huna nai khala y Isaia my samrang teng y, “Ati cheaungkhang sa thai nai keung ARENG my leu pei nai tangai ba.

⁶Nang i samrang yhm y awm nai ngiereichi ai py, vaini khrairei nang i amsi pajochi my pateung pi achu nai yhmtheaung katui ngiereichi ai py, Babulon pri mang y syn pawn nai neng kani tym ai. Ati sai py awm ai ny y.

⁷Nang i katu chanau kypkyp phyreichi py patiu vui ai i, Babulon samrang i yhm y tli chum naichi lawm iy kalop sa u ai,” napi.

⁸Hini amti pi nai leu ai samrang Hezekia ly my i deung y tlamsa naira hawi chymme naira awm ai, nanai dawn lawh nai ne i, “Kai teng y nang i amti pi nai ARENG i leu ly hawi nai ne,” napi.