Read Khumi Chin ISAIA 40 Bible Online

ISAIA 40 - Khumi Chin bible

ISAIA 40

¹Nangchi i Tameuh my, “Kai i khumichi ai paleung pahawi u; nichi ai paleung pahawi u!

²Jerusalem mary i khumichi ai atho pei u. Nichi ly ngari kamtang kra parai pa-rei avum nai deaungkho y, nichi i kamngochi ai vai, kaimy pahen pi bo, nanai nichi teng y thui pi u. Kai ly nichi i kamngo nai ai pajeng nai tym angym hai bo,” napi.

³Raawi harei my, “Daichi ka-vymra y ARENG jeu ai nai lam so u rym! Achi i Tameuh jeu ai nai lam pachai u!

⁴Kathiu kacheaung ngiereichi padyh iy, mawi katheang kalen bawibawichi panawi u. Mawi aheungchi ly padyh vui iy, adyh acho y nai meingtym ly padyh pawn veng ai.

⁵Huna nai khala y ARENG i nang parai nai ly amteng ai i, khumi angso bawibawichi ly huni nang parai nai niu u ai. Huna nai tym ai nai ARENG mymy kypkyp my adeu pi nai ne,” nanai aeu bo.

⁶Huni raawi my, “A-eu!” napi nai deaungkho y, “Ati amjy aeu ai mo?” nanai kaimy deng baly, “Khumi angso bawibawichi ly acha keung atawm iy, daichi kaseaung kamta akan y, nanai aeu!

⁷ARENG my pato nai ali hawi avum nai khala y acha keung ly jei iy, kaseaung pauchi py rawm nai ne. Khumichi ly acha keung tanrei heng khyh nai ne.

⁸Acha keung ly jei angchi khyp iy, kaseaungchi py rawm angchi khyp bo. Na i py achi i Tameuh i leu ly deungtasarei khaw jo nai ne,” napi.

⁹Aw Jerusalem mary, mawi ka-sang y lyn iy, satang kahawi amthang hai ba! Aw Zion mawi, raawi pajeng parai naimy satang kahawi amthang hai ba! Jei moh, paleung theung y khai y naimy katheu keng ba. Juda marychi teng y nichi i Tameuh jeu ai,” nanai thui pi!

¹⁰Ati cheaungkhang sa thai nai ARENG ly mymy atleu nai khumichi ai[8]palau iy, sa thai naira hawi peang ai nai ang jeu ai.

¹¹Mymy ly beram typ nai keung kamta, mymy i beram kanghu ai pacho panei iy kry ai. Mymy ly beramchochi ai pangym iy, kiu hawi tapawm naimy nichi i amhmchi ai lam patei iy pahawi kajai ai.

¹²Suida pangli tui ai kiu padawi hawi neh nai khumi, ti y baly kani khusang ai kiu hawi kah iy pata pajau nai khumi awm a? Khaileaung kathau ngiereichi ai khaura y khai pajau nai khumi, ti y baly mawi katheang kalenchi ai, sie khyry hawi neh pajau nai khumi awm a?

¹³ARENG ai mana sa ai mo, nanai thui pajau nai khumi awm a? Mani khumi ly mymy ai patiu pi pajau ai mo? ti y baly tau pei pajau ai mo?

¹⁴Hina nai kalopchi ai mana sa ai mo, nanai pany pajau ai nai, cheng naira hawi pany thai naira nga pajau ai nai, mymy ly ami hawi adeng ahui mo?

¹⁵ARENG mo y khumi cheng cheaungkhangchi ly ati sai py ny y. Nichi ly tui paleaungdy nai ryrei khyh. Kamlora i tlawnchi py tamaiham tanrei kaji awm khyh nai ne.

¹⁶Lebanon mawi y awm nai daichi mawi ngiereichi ly achi i Tameuh teng y apathyp ai nai aleu y. Huni daichi theung i dengkeaung keungchi py, mai paeng ai nai lawm y.

¹⁷Khumi cheng cheaungkhangchi ly mymy i mo y ati sai py ny y leang.

¹⁸Tameuh ai ly ami hawi pata pajau ai mo? Mymy i mo-cha ai nangchi ati mana thui thai ai mo?

¹⁹Mymy ly kupe kakawpchi my patlawn iy pa-thengchi my muku hawi paleaung nai, tangka hawi langdeng khaw hai nai myn hawi atawm y.

²⁰Muku, tangka ko y nai khumi ly rawp pajau y nai dengkeaung ngan vawi takhra reng. Ni ly khaw parai nai myn sa ai nai kupe myn oh kawp nai ai hau reng nai ne.

²¹Hini khaileaung pri ly mana lawm mo, nanai nangchi thai vai y a? Jangni khala i ka-so thui pi nai keung by y nai sai a? Nangchi thai vai y, pany vai y nai sai a?

²²khaileaung sa pi nai keung ly kani hawi khaileaung salo y awm nai areng atehra salo y ateh nai keung ne. Kani anui i khaileaung salo y awm nai khumichi ly pa-leng sa-machi kamta theangchichy, nanai athang khai. Mymy ly kani khusang ai silleng kamta py, awm nai tai kamta py palawn bo.

²³Mymy ly sa thai naira len nai samrangchi ai pala iy, huni khumichi ai ati sai py ny y naichi lawm hai bo.

²⁴Nichi ly ui iy tangjyn pala khyp nai keungchychi hawi atawm. ARENG ly ali aho hai nai khala y, huni keungchi ly jei iy maidym kamta ahei pawn nai ne.

²⁵Chai parai nai Tameuh ai ami hawi pata ai mo? Mymy hawi atawm nai khumi leaung leaungrei awm na a?

²⁶Kani mang y khen angdeang u! Nangchi niu nai ka-sichi ai ami my sa nai mo? Hunichi ai tavaimichi kamta pahawi nai keung ne. Mymy ly ka-sichi ai kati chum baly amyn pathi iy palau na a! Mymy ly sa thai naira len parai nai deaungkho y, huni ka-sichi ly ha harei py tama, nanai by y.

²⁷Israela chengchi awi, tuna lawh baly ARENG ly nangchi i ngari kamtangchi pany pi y nanai py, nangchi avum nai teng y nai leaungsaichi molam y paleung apei y nanai py ati mana nai nangchi tangam u lawh mo?

²⁸ARENG ly deungtasarei heng jojo nai Tameuh ne, nanai nangchi pany u y nai sai a? Thai u vai y nai sai a? Mymy ly khaileaung bom verei ai sa nai ne. Mymy ly mana khala py paha y, akawm nai by y. Amimi py mymy i dawn tau naichi pany pajau y.

²⁹Mymy ly paha nai, akawm nai khumichi ai atho pei nai ne.

³⁰Saneng nau nai khumichi malawn py paha, akawm reng nai ne. Khumi ka-cheangchi ly atho bai iy atlym u bo.

³¹Na i py ARENG i kasabawmra ai ym nai khumichi ly atho kangtha nga u ai. Nichi ly ahmtlau kamta akheang thai ai. Angpreng i py akawm u ai ny y. Khuleaung chei i py paha u ai ny y.