Read Khumi Chin ISAIA 41 Bible Online

ISAIA 41 - Khumi Chin bible

ISAIA 41

¹Tameuh my, “Nangchi kamlo prichi awi, tyn kryh y naimy kai i leu tangai u! Nangchi i molam jeung y tym ai nai angvei u rym; Nangchi ly akhi nai leu thui ai nai nga u ai. Ami i teng mo, nanai chih pi ai nai achi angym u sina.

²Nisi pri mang i tavai eaung nai samrang[9]ai ami my hawi nai mo? Tym nai meingtym tleirei y ni ai ami my eaung ai nai pei mo? Ni ai samrang leilachi tleaung y py, khumi cheng cheaungkhangchi tleaung y py, ami my eaung ai nai pei nai mo? Ni i haisau ly paleung ka-echi ai spryh y ateng nai kamta ateng reng nai ne. Ni i thailihochi my py, huni khumichi ai ali my pakheang nai choh-ali kamta ahei hai reng nai ne.

³Ni my paleung ka-echi ai pareng nai ly chymme naimy amsa i, rang parai nai deaungkho y, ni i kheu ly khaileaung y abi y na ly!

⁴Hina nai tym hai nai keung ly ami mo? Ami my deung kamtawmchi sa pi mo? Kai ARENG ly angchei khala i dengdairei awm iy, kai ARENG ly tem khala khrairei awm jo ai.

⁵Kamlo prichira i khumichi ly kai i atiti sa naichi niu u bo; Nichi ly jei nai kaso tahyn theu u nai ne. Hunai deaungkho y jeu u achu bo.

⁶Kupe kakawpchi ly mychi tengtawi asabawm iy, atho pei nai leu katheu u nai ne.

⁷Lasama my paitheng teng y, ‘Nang i kupe hawi parai!’ napi. Myn kahawi thip nai khumi my, huni i kamsi kamdichi ai tabi nai keung teng y, atho pei nai leu thui pi bo. Nichi my, ‘Lakhra pajawp typ nai ly hawi parai,’ nanai thui naimy ly thui i, nichi ly myn ai hawihai palai tamo hawi tahen iy, leng u nai ne.

⁸“Na i py kai i miseaung Israela chengchi awi, kaimy vawi takhra nai nangchi ly kai i ahawi Abraham i katu chanauchi ne.

⁹Kai ly nangchi ai khaileaung khuteng taki i dengdairei kang pahawi bo. Khaileaung katem i dengdairei palau nai, nangchi ly kai i miseaungchi ne. Kai ly nangchi ai nyn va ai nai tleaung y ly kang vawi takhra nai ne.

¹⁰Jei u moh, kai ly nangchi hawi vanrei awm! Kai ly nangchi i Tameuh ne; ati mo ra py nangchi ai jei hyn hai ai ny y! Kai ly nangchi ai khaw hai iy sabawm ai. Nangchi ai ama hai iy atleu ai.

¹¹Aw, kai i khumichi awi, nangchi ai kado theu hai nai khumichi ly tahm anem iy kangji nga u ai. Nangchi ai tiu nai khumichi ly dei u ai.

¹²Nichi ly khaileaung salo i nai tama u ai.

¹³Kai ly nangchi i ARENG Tameuh ne iy, nangchi ai atho awm hai bo. ‘Jei u moh, kaimy sabawm ai,’ nanai nangchi ai kang thui pi bo,” napi.

¹⁴ARENG my, “Israela chengchi awi, nangchi i cheng ly theang, atho di teu i py jei u moh; nangchi ai kaimy kang sabawm ai. Nangchi ai atleu nai keung kai ly Israela chengchi i chai parai nai Tameuh ne.

¹⁵Kai ly nangchi ai rawbo chiu parai nai chohchau kangtha kamta, lawm hai ai. Nangchi ly mawi puichi ai ati iy dei lawm hai ai. Mawi aheungchi py, spryh lawm vui ai.

¹⁶Hunichi ai nangchi ly pachaw ai i, ali my hm nai pakheang iy. kamchaichi my ahei seaungkhrang hai ai. Naibaly kai ly nangchi i Tameuh ne nai deaungkho y, nangchi ly amo theu u ai. Nangchi py Israela chengchi i chai parai nai Tameuh, napi nai kai ai palo u ai.

¹⁷Kai i khumichi tui ngai nai hau nai khala py, nichi tui kanghai tao phui nai khala py, kai, ARENG ly nichi i hnei takeng nai pathang pi ai. Israela chengchi i Tameuh, napi nai kai ly nichi ai mana khala py khai su ai ny y.

¹⁸Kai ly ati sai py prau y nai mawi aheungchira y tavochi lawm hai iy, leaunghawichi hawi tavo micheaungchi lawm hai ai. Kai ly khutaha daichi ka-vym y tuipumchi lawm ai nai py, khutaha khaileaungchi ai, tuikhochi lawm ai nai py, amtlau hai ai.

¹⁹Kai ly khutaha daichi ka-vym y saitleang keung, thaneaung keung, preaungmui keung hawi olive keungchi prau hai ai. Dengkeaung keung prau y nai meingtym y, maicha keung amjyjychi hawi saitleang keungchi abawi nai thengreungchi lawm ai.

²⁰Hini atitichi niu u nai khala y, khumichi my hini ly kai, ARENG i sa nai ne, nanai pany u ai. Hini kalop ai Israela chengchi i chai parai nai Tameuh my sa nai ne, nanai pany u ai.

²¹Israela chengchi i samrang ARENG my, “Nangchi, khumi cheng cheaungkhangchi i tameuhchi awi, nangchi i sa nai amti pi u cham. Nangchi i akhi nai leu kakhaw tym hai u!

²²Hi y jeu iy mo mang y ati tym ai mo, nanai thui pi u cham; Hunai deaungkho y, vaichi khala i sa naichi thui pi pachai ba. Mo mang y huni atitichi mana tem ai mo, nanai kaichi ai thui pi u. Naibaly hunichi tym nai khala y kaichi pany ai.

²³Mo mang y ati tym ai mo, nanai kaichi ai thui pi u; huna nai khala naini, nangchi ly tameuh ne, nanai kaichi pany ai na a! Atiti kahawi so u, ti y baly ka-jeira sai sairei tym hai u. Kaichi ai jei hyn pa-rei so u!

²⁴Nangchi hawi nangchi i atiti sa naichi ly ati sai py ny y. Nangchi ai chiu nai khumichi py, amso ngai ai hawi parai na ly!

²⁵“Kai ly nisi pri mang i khumi leaungrei ai vawi yb bo. Ni ai palau iy tosyh mang dengdairei tiu hai ai. Laawm beu nai keung ly khaileaung laikan ai kheu hawi ati piu nai kamta, ni ly pri peang nai samrangchi ai chiu piupa ai.

²⁶Hini leu ly teng khyp, nanai kaichi thui pajau ai nai, hini atitichi tym ai, nanai nangchi theung i ami my kaichi ai thui pi yb vai sai a? Ami nai ly mo mang i satang thui vai mo? Nangchi theung y ami py hina nai thui vai y. Thui nai leu thai nai khumi leaungrei py by y leang!

²⁷Zion mary i satang kahawi thui man nai keung ly kai, ARENG ne. Kai ly Jerusalem mary y savai leaungrei pato iy, “Nangchi i chengchi ly vawi u ali teang ai! Nichi ly mychi i pri y vawi u ali teang ai!” nanai thui hai bo.

²⁸Kai ly tameuhchi ai khen nai khala y, nichi ly kai teng y leu sairei py pathang u y. Kaimy deng nai leuchi py, ami py pathang u pajau y.

²⁹Hini tameuh bawibawichi ly ati sai py ny y. Nichi ly ati sai py so u thai y. Nichi i mynchi py jy iy, sa thai naira by y.”