Read Khumi Chin ISAIA 43 Bible Online

ISAIA 43 - Khumi Chin bible

ISAIA 43

¹Israela chengchi awi, nangchi ai sa nai keung ARENG my, “Jei u moh, nangchi ai kaimy atleu ai. Kaimy nangchi ai amyn pathi iy kang palau bo; nangchi ai kaimy peang.

²Nangchi ly tui thiu mang y tapai nai khala y, kai ly nangchi hawi vanrei awm ai. Ngari kamtangchi ly nangchi ai khiu ai ny y. Nangchi ly mai theung y aleaung nai khala y, mai my kang ai ny y. Khri pa-rei cham nairachi ly nangchi ai no patang nairachi tym hai ai ny y.

³Ati mana nai mo nabaly, kai ly Israela chengchi i chai parai nai Tameuh, nangchi ai atleu nai keung, nangchi i ARENG Tameuh ne nai deaungkho y ne. Kai ly nangchi miseaungra i nai alaw naira nga u ai nai Aikupta pri khai su ai. Ethiopia pri hawi Seba pri ai, kaimy khai su ai.

⁴Nangchi ly kai i vui khri pa-rei vang teng nai khumichi ne i, kaimy tamen iy tahm kapasang naichi ne nai deaungkho y, kai ly nangchi ai atleu ai nai, khumi chengchi ai khai su ai.

⁵Jei u moh, kai ly nangchi hawi vanrei awm! Kamlo parai nai nisi hawi nidym mang, kangtem keh meingtym dengdairei, nangchi ai nangmychi pri y, kaimy kang hawi ai.

⁶Nichi theu u ai nai tosyh mang py, nichi ai paka y ai nai tokalawi mang py, kaimy thuipi ai. Khaileaung pri meingtym tleirei y awm nai pri kamlora i, kai i khumichi vawi u ali teang ai.

⁷Nichi ly kaimy peang nai khumichi, kai i nang parai nai amthang hai ai nai, kaimy sa nai khumichi ne,” napi.

⁸Tameuh my, “Kai i khumichi ai tara jeung y palau u. Nichi ly mei awm naimy niu u y. Kano awm naimy thai u y lawh ly!

⁹Khumi cheng cheaungkhangchi ai tara chih naira y palau u. Nichi i mani tameuhchi ly mo mang i satang thui pajau ai mo? Mani tameuhchi ly vai tym nai atitichi ai thui yb nai awm mo? Huni tameuhchi ly mychi i sa nai kateng ne, nanai ka-ma-ra patei pajau ai nai hawi, mychi i thui nai kamta teng khyp nai saichi ka-ma-ra patei pajau ai nai, pany hai pi nai keungchi ai hawi u na sy.

¹⁰“Aw, Israela chengchi awi, nangchi ly kai i pany hai nai keungchi ne. Nangchi ly kai ai pany u ai nai py, kai ly Tameuh harei khyh, nanai pany u thai ai nai py, kai ly nangchi ai kaimy i miseaung palawn ai nai kang vawi nai ne. Kai ny y baly tameuh takhra by y; mana khala py by y, vai mo mang py awm ai ny y.

¹¹“Kai leaungrei naini ARENG ne. Kai leaungrei naini nangchi ai atleu pajau khyh.

¹²Kai ly atitichi tym ai nai thui yb iy, nangchi ai sabawm ai nai kang jeu nai ne. Mani cheng takhra i khumichi i tameuh py, hina nai sa nai awm vai y. Nangchi ly kai i pany hai nai keungchi ne.

¹³Kai ly Tameuh ne, mo mang py, hina nai kaawm jojo ai. Kai i sa thai naira ai ami py lawm vui pajau y. Kai i sa nai kalop ai ami py so thai y leang,” napi.

¹⁴Israela chengchi teng y chai parai nai Tameuh, nangchi ai atleu nai ARENG my, “Kai ly nangchi ai atleu ai nai tavaimi kamkawmchi ai, Babulon pri y pato pi ai. Mary katheu pa-khochi taphra pi pawn ai. Hunira y awm nai khumichi aeu nai raawi ly vo nai raawi mang y lawm hai ai.

¹⁵Kai ly nangchi i chai parai nai ARENG Tameuh ne. Israela chengchi awi, nangchi ai kaimy sa nai ne; kai ly nangchi i samrang ne,” napi.

¹⁶Jangni y ARENG ly panglira y tako prei ai nai lam sa pi nai ne.

¹⁷Mymy ly tavai ka-ri, tavai keaungngochi hawi atho ham parai nai tavaimi kamkawmchi ai phra hai pawn bo. Nichi ly maisi yhmra i mai ai padei vui nai kamta, ang thau teang thai y na pa-rei atlym u be bo!

¹⁸Na i py ARENG my, “Jangni i atitichi ai dawn u jo moh; jangni i tym nai atitichi ai py thui u reng moh.

¹⁹Kai i sa ai nai leaungsai kangthachi ai ajeng u. Hunichi ly ang tym dudu nai deaungkho y, huni ai vai nangchi niu u na a! Kai ly daichi ka-vym y lam sa pi prei iy, nangchi teng y tuino leaung hai ai.

²⁰Daichi mawichi malawn py, kai ai tahm khai iy palo u ai. Kai ly kaimy vawi takhra nai khumichi tui nga ai nai molam tui by y nai daichi ka-vymra y tavo tuichi leaung hai nai khala y khivachi hawi kula-iu tavochi ly kai ai palo u ai.

²¹Huni khumichi ly kaimy i vui, kai i sa nai khumichi ne; nichi my py kai ai palo u ai.

²²ARENG my, “Na i py nangchi my chiu nai ly kai ai ny y, aw Israela chengchi awi, nangchi ly kai ai chiu nai paleih u bo.

²³Nangchi ly leng patlum ai nai beramchi, kai teng y syn u y. Nangchi i kapathyprachi hawi palo nai ly kai ai ny y. Kai ly katalamrachi kang hnei nai molam y, nangchi ai mynji kang tleang hai y leang. Mui katuichi kang hnei nai molam py, nangchi i paleung akawm hai y leang.

²⁴Nangchi ly kai teng y talam ai nai mui katuichi van u y. Tawnbawi thauchi hawi py, kai ai paleung pahawi u y. Huna nai sa ai nai tleaung y nangchi ly nangmychi i kamngochi hawi, kai ai mynji tleang hai u lawh. Nangmychi i sa nai kamngochi hawi naimy, kai ai paleung akawm hai u lawh bo.

²⁵Na i py kai ly kaimy i tahm awm nai molam y, nangchi ai kamngo pahen pi nai keung Tameuh ne.

²⁶“Tara jeung y achi chei u sina; nangchi i neng hai nai jeu hai u! Nangchi mang i teng, nanai pany hai naira patei pi ai nai, nangchi i ka-jo ka-thui amti pi u.

²⁷Nangchi i jangni i amsi pajo[11]ly kamngo sa nai ne. Nangchi i lu sa naichi my kai i tlang tleaung y kamngo sa bo.

²⁸Nangchi i samrangchi ly kai i Achura yhm y chai hai y[12]nai ne. Hunai deaungkho y kai ly Israela pri ai phra hai iy, kai i khumichi ai kangji nga hai bo,” napi.