Read Khumi Chin ISAIA 45 Bible Online

ISAIA 45 - Khumi Chin bible

ISAIA 45

¹Samrang Kuru ly ARENG my vawi takhra nai khumi ne na a! Mymy ly khumi cheng cheaungkhangchi ai eaung ai nai, ni ai samrang palyn nai ne. Mymy ly pri peang nai samrangchi i sa thai naira la pi veng ai nai, ni ai pato bo. ARENG ly ni i vui mary katheu pa-khochi paeaung pi ai. ARENG my samrang Kuru teng y,

²“Kaimy kypkyp my mawi katheang kalenchi padyh iy, nang i vui lam sa pi rym ai. Kai ly mary i kheupaja katheuchi taphra iy, hunichira i tamo lengteaungchi khei piupa pawn ai.

³Vengpam naira y khai nai yhmtheaung katuichi hawi, ka-vymra y kryme nai vang katengchi, nang ai kang pei ai. Huna nai khala y kai ly ARENG ne nanai, Israela chengchi i Tameuh ly nang ai vawi takhra iy khai nai ne nanai, nang pany ai.

⁴Kaimy vawi takhra nai khumichi, kai i miseaung Israela chengchi ai sabawm ai nai molam y, nang ai kaimy palyn nai ne. Nang ly kai ai pany y teu i py, kai ly nang ai tahm asang naira kang pei bo.

⁵“Kai ly ARENG ne; kai ny y baly tameuh takhra by y. Nang ly kai ai pany y teu i py, kai ly nang i aly ngai nai atho haiho kang pei ai.

⁶Kai, hina nai sa nai ly kai ly ARENG ne iy, kai ny y baly tameuh takhra by y, nanai khaileaung katem i dengdai takhra katem y khrairei, awm nai khumi ngiereichi ai pany hai nai ne.

⁷Kai ly kangvang hawi kaveng ai sa. Amtheaung naira hawi ka-jeira ai py sa. Kai, ARENG ly hini bawibawichi ai sa nai ne.

⁸Kai ly kanitui kamta, kani mang i dengdairei, eaung naira pala pi ai. Huni ai khaileaung ly am-eaung iy, tlamsa naira hawi adyh adawi naira, napi nai athaichi theu ai. Kai, ARENG ly hini atitichi tym hai ai.

⁹Takhra laawmchi hawi atawm nai alai laawm ly laawm beu nai keung ai ei vam na a? Khaileaung laikan my laawm beu nai keung teng y, nang ly ati sa nai mo, nanai deng na ti a? Alai laawm my, mymy ai sa nai keung ly kawp nai ny y, nanai cheh na ti a?

¹⁰Amy i amhm ampochi teng y, “Ati mana nai kai ai hina nai tapen lawh mo?” nanai thui vam nai khumi awm na a?

¹¹Israela chengchi i chai parai nai Tameuh, mo mang i vui y sa nai ARENG my, “Kai i cho chanauchi molam y nangchi my kai teng y deng ai nai aly by y. Kai ly ati sa ai nai avo mo, nanai nangchi my kai ai thui pi ai nai aly by y!

¹²Kai leaungrei naini khaileaung pri ai palum iy, hunira y awm ai nai khumichi ai sa nai keung ne. Kaimy i sa thai naira hawi kani khusang ai khiu tapai iy, kanito, lo, ka-sichi ai kryme nai ne.

¹³Ati cheaungkhang amsym iy, kai i dawn pasym nai angym hai ai nai kaimy kypkyp my samrang Kuru ai kapacheang nai ne. Ni i tako ai nai lam ngierei taw hai ai. Ni ly kai i mary pui Jerusalem mary ai sa palum teang iy, langheng hawi nai kai i khumichi ai lawi tleaung hai ai. Hina naichi sa hai ai nai ni ai ami py alai y, un langseaung py pei y,” napi. Hini ly ati cheaungkhang sa thai nai keung ARENG i leu pei nai ne.

¹⁴ARENG my Israela chengchi teng y leu pei nai ly “Aikupta pri hawi Ethiopia pri i yhmtheaung katuichi ly nangchi nga u ai. Seba pri i khumi len ka-sangchi ly nangchi teng y miseaung achei u ai. Nichi ly sengkry hawi pakheng naimy, nangchi nithun abang u ai. Nichi ly nangchi i mo y lu meung naimy, hina nai thui pi u ai; ‘Tameuh ly nangchi hawi vanrei awm bo; mymy leaungrei naini Tameuh ne.

¹⁵Mymy i khumichi ai atleu pi nai, Israela chengchi i Tameuh ly khumi i mei hawi niu pajau y nai Tameuh ne.

¹⁶Mynchi ai sa nai khumi bawibawichi ly kangji nga u ai. Huni khumi bawibawichi py tahm anem u ai.

¹⁷Na i py Israela chengchi ly ARENG i atleu nai nga u iy, nichi i eaung nai ly deungtasa akan jo ai. Nichi ly mana khala py, tahm anem u ai ny y.’ ”

¹⁸ARENG ly kani khusang ai sa; mymy leaungrei naini Tameuh ne na a! Mymy ly khaileaung ai sa palum iy, khaw hai typ nai ne. Mymy ly huni ai khumi angso by y nai meingtym palawn ai nai sa nai ny y. Khumichi awm ai nai meingtym sa pi nai ne. Mymy ly “Kai ly ARENG ne; kai ny y baly tameuh takhra by y.

¹⁹Kai ly kangviu kam-ai y kathui y; kaimy i dawn pasym nai py apha vai y. Kai ly Israela chengchi ai khumi angso by y nai meingtym y hau hai nai ny y. Kai ly ARENG ne; kai ly ka-ym awm nai leu katheu iy kateng lam kapatei pi reng nai ne,” nanai leu pei nai keung ne.

²⁰ARENG my, “Khumi cheng cheaungkhangchi awi, jeu u achu. Empara pri anawi nai bo i, dei kamthum khumi bawibawichi awi, nangchi cheng y nai khumichi awi! nangmychi i dengkeaung mynchi patei iy, atleu pajau y nai tameuhchi teng y chiu nai khumichi awi, nangmychi naimy tara amteng ai nai jeu u!

²¹Jeu ly nangchi i ka-jo ka-thui ai jeung y tym hai u. Tara amteng naichi ly mychi tengtawi, leaung leaungrei arum u. Tym ai nai atitichi ai ami my jangni khala y thui pi yb lawh mo? Kaimy i khumichi ai atleu nai Tameuh, kai ARENG my kang thui pi yb nai ny y lawh sai a? Kai ny y baly tameuh takhra by y.

²²“Khaileaung pri verei i khumi bawibawichi awi, Kai teng y jeu u ly atleu naira ngo u! Harei awm khyh nai Tameuh ly kai ne.

²³Kai i thui nai leu ly teng khyp nai deaungkho y, takhra vui ai ny y leang. Khumi bawibawichi ly jeu iy, kai i mo y kheukhudi u naimy, leu meitang pei kheng nai tangai ai mang, nanai vaineng abeu u ai.

²⁴“Nichi ly kaimy deaungkho y eaung naira hawi atho ham naira nga u nai ne, nanai thui u ai. Na i py kai i niu ngai y nai khumi bawibawichi ly tahm anem u ai.

²⁵Kai, ARENG ly Jakob i kangpreangchi ai atleu ai. Nichi py kai ai palo u ai.