Read Khumi Chin ISAIA 46 Bible Online

ISAIA 46 - Khumi Chin bible

ISAIA 46

¹“Hini ly Babulon tameuhchi i tem naira ne! Vaichi khala y khumichi ly Bala tameuh hawi Nebo tameuhchi ai chiu u. Na i py vai ly nichi ai keaungngo kano kasau tleaung y tang iy, akawm parai nai tawnbawichi my pho ai nai myn kajichi lawm u nai ne.

²Huni mynchi my ly mychi ai atleu pajau y leang. Nichi ai ly patiu iy hawi vui nai avum u ai. Hini ly Babulon tameuhchi i tem naira ne!

³“Aw Jakob i kangpreangchi awi, kai i khumi Israela cheng theung i awm rai naichi awi, kai i leu tangai u. Nangchi amhm taku theung y awm iy, tapen khyp khala i dengdairei, kai ly nangchi ai kang kry bo.

⁴Kai ly nangchi i Tameuh ne. Nangchi miteaung acheang iy sampau luthym pa-rei, nangchi ai kang khen, kang kry ai. Nangchi ai kang sabawm ai, atleu ai.

⁵ARENG my, “Nangchi ly kai ai mani khumi hawi pata u ai mo? Kai hawi atawm nai tameuh takhra awm rai a?

⁶Khumichi ly mychi i muku chakeuchira i mukuchi adiheu iy, mukuchi ai sie khyry hawi neh u. Naibaly tameuh myn sa ai nai muku tangka thip nai khumi alai u bo. Hunaibaly nichi ly huni tameuh ai lu meung iy chiu u nai ne!

⁷Nichi ly huni tameuh ai paleang tleaung y apu iy syn i, meingtym tahyh u bo. Huni tameuh py mymy ai khai nai meingtym i asyh thai y naimy, angdo jo nai ne. Ni teng y khumi leaung leaungrei my chiu sa hnei takeng lawh teu i py, ni ly pathang pi thai y. Huni khumichi ai ka-jeira i nai py atleu pi thai y.

⁸“Nangchi kamngo sa nai khumichi awi, hini leu pany u jo ba. Kai i sa nai kalop adawn pasym u.

⁹Jangni jangkhawn khala i awm nai atitichi pany u. Kai leaungrei naini Tameuh ne, nanai py, kai hawi atawm nai tameuh takhra by y, nanai py pany u jo ba.

¹⁰Kai ly angchei khala i dengdairei, leu kangtem kang thuipi yb nai ne. Mo mang y tym ai nai atitichi ai, jangni khala my kang thui pi yb veng bo. Kai i dawn pasym naichi ly mana khala py phra ai ny y, nanai kaimy thui pi yb nai kamta, kai i pasym yb nai atitichi ly sa ai.

¹¹Kai ly nisi mang i khumi leaungrei ai kapalau ai. Ni ly ahmtlau kamta taba kathiu iy, kai i pasym yb nai kalopchi sa pi ai. Hini ly kai i thui nai leu ne i, hina nai kamta tym takengkei ai.

¹²Kaichi law tleaung ai nai neng ly palo rai, nanai thui nai khumi, nangchi paleung tang nai khumichi awi, kai i thui nai leu tangai u.

¹³Kai ly nangchi law tleaung ai nai neng kasa hai ai. Huni neng ly pipi palo y leang bo. Kai ly atleu y nai py awm pi vui ai ny y. Kaimy Jerusalem mary ai atleu iy, Israela chengchi ai tahm asang hai ai.”