Read Khumi Chin ISAIA 47 Bible Online

ISAIA 47 - Khumi Chin bible

ISAIA 47

¹ARENG my, “Aw, Babulon mary napi nai neampachy awi, nang ly samrang atehra tleaung i dengdairei satla iy, khaileaung y ateh. Vaichi khala nang ly phrumai avum vai y nai anglo lengmyn, sum vai y rai nai mary ne. Na i py vai, nang ly paleung nau nem nai khumi ny y leang bo! Vai, nang ly miseaung lawm veng bo!

²Nang ly choh nip nai lengseaung ai tamie! Dei lawm pa-rei kawi! Nang i meimai mym nai nidan lei vui! Apu parai nai ateaungchi aleng veng! Tavo angpeang ai nai[13] nang i baichu kangjiu apa kalau!

³Nang ly tahm panem naira avum ai i, kangji nga iy tlang ka-keu awm nai ly khumichi my niu u ai. Kai ly nang ai vawitheung tha ai. Kai ai ami my py paka pajau ai ny y,” napi.

⁴Israela chengchi i chai parai nai Tameuh ly kaichi ai law tleaung hai bo. Mymy i amyn ly ati cheaungkhang sa thai nai ARENG ne.

⁵ARENG my Babulon mary teng y, “Tyn teng y nai vengra y ateh. Khumichi ly nang ai, khumi cheng cheaungkhangchi i samrangnu, nanai palau u bi ai ny y!

⁶Kai ly kaimy i khumichi ai kado theu hai nai deaungkho y, kai i khumichi ny y nai kamta kapalawn nai ne. Nang i sa thai naira anui y khai bo. Na i py nang ly huni khumichi tlang tleaung y, pahen nai paleung khai y; miteaung kehchi ai malawn py, pahyp y nai ana u nai ne.

⁷Mymy ly samrangnu lawm jo naimy awm ai, nanai athang khai i, hini atitichi dawndan y. Hunichi ati mana tem ai mo, nanai py dawn y.

⁸“Nang saw ala ai ngai nai khumi awi, amymy ai chymme bo, nanai khumi awi, hini leu tangai ba. Kai ly Tameuh tanrei len nanai py kai ka-tawm khumi ly by y, nanai py nang thui bo. Nang ly mana khala py lumai lawm ai ny y, mana khala py cho chanauchi alai vai ai ny y nanai py, nang ly athang khai bo.

⁹Na i py nang ly kanirei y my, tanarei sala y my, hini amjy nyhrei avum ai. Atam kakawp bawibawichi ai teaung i py, cho chanauchi dei nai my lumai lawm ai.

¹⁰“Nang ly hawi y naichi sa iy, amymy ai ne bo, ami py niu y, nanai athang khai lawh. Nang i cheng naira hawi pany thai nairachi my, nang ai lam tamang hai bo. Nang ly nangmy ai, ‘Kai ly Tameuh ne, kai ka-tawm khumichi theung y by y,’ nanai thui bo.

¹¹Taham kasi ly nang i tlang tleaung y tym ai. Hini ai nang i atam kakawp my paka pajau ai ny y. Nang ly mana khala py, amang mang y amang vai y nai phra naira avum ai!

¹²Nang i atam naichi hawi laphawichi arawi yb. Nang ly hunichi ai deaungdichy khala i ka-so teaung nai ne. Hunichi my nang ai ang sabawm lym ai. Nang i paleung ka-echi ai py, patheu pajau tan pajau lym ai.

¹³Nang teng y tau pei nai miteaung keh neangneang awm teu i py, nang ly ati sai py so thai y leang. Ka-si taukichi ai khen patawm nai khumichi, Kani khusangra y jyhchi patleh takhra iy, lo tlei tleirei tym ai nai atitichi ai nang teng y thui pi yb nai khumichi, nang ai tau pei nai miteaung kehchi ly jeu iy, nang ai atleu u sy.

¹⁴“Nichi ly choh-ali kamta lawm iy, mai ly nichi ai kang ai! Nichi ly mymychi ai malawn py atleu u pajau ai ny y. Mai kangveaungchi ly bi-um ai nai a-awm nai mai ny y i, nichi i vui ly khri pa-rei ango ai.

¹⁵Nangmy deungrei adeng ahui nai, ka-sichi ai khen iy tau pei nai py, nang i tlang tleaung y hina nai kamta lawm hai ai. Hunichi bawibawi ly nang ai khai su iy, mychi i ngai nai mang y theu u pawn ai. Nang ai atleu ai nai khumi leaungrei py awm ai ny y.