Read Khumi Chin ISAIA 48 Bible Online

ISAIA 48 - Khumi Chin bible

ISAIA 48

¹Nangchi Juda kangpreang Israela chengchi awi, hini leu tangai u: Nangchi ly ARENG i amyn y vaineng abeu u iy, Israela chengchi i Tameuh ai kachiu u bo, nanai thui u; na i py nangchi i leu ly sairei py teng y.

²Huna nai ne teu i py, nangchi ly nangmychi my chai parai nai marychochi nanai py, ati cheaungkhang sa thai nai ARENG napi nai Israela chengchi i Tameuh ai paleung pado u nai khumichi nanai py, amlyh u nai ne.

³ARENG my Israela chengchi teng y, “Jangni y kaimy mo mang y awm ai naichi thui pi yb bo. Naibaly hunichi vaimy tym hai ai.

⁴Nangchi ly tamo kamta tang naimy kheupaja kamta khri pa-rei tang iy, paleung tang u ai, nanai kapany.

⁵Kai ly atitichi tym y rai khala my, nangchi i vui mo mang i satang kang thui pi yb veng bo. Huna nai sa nai ly hini atitichi ai nangchi i sa nai mynchi my sa hai nai ne, nanai nangchi thui pajau y ai nai ne.

⁶“Kai i thui pi yb nai ngiereichi ly vai, tym dudu bo. Kai i thui naichi ly teng, nanai nangchi pany u ai. Vai, kai ly mo mang y tym ai nai sai kangthachi, jangni khala y kang thui pi vai y nai atitichi, kang thui pi ai.

⁷Vai khala naini hunichi tym hai ai. Huni atitichi ly vaichi khala tym vai y rai. Tym hai lawh teu i khyly, huni atiti satangchi kaichi pany veng bo, nanai nangchi thui u ai.

⁸Nangchi ai ym ai nai aso y nai py, nangchi ly tapen khyp khala i ka-so langmeang thau naichi ne, nanai amthang nai py kapany. Naibaly hini atiti satangchi ai, nangchi ly mana khala py thai y, pany kawp y. Vaichi khala my nangchi ly kano thai y.

⁹“Khumichi my kai i amyn palo u ai nai, kai ly kaimy i kado theu nai am-yh vui ai. Kaimy i kado katheu am-yh vui iy, nangchi ai tamyh vui ai nai so y ai.

¹⁰Tangka ai mai y pachai nai kamta, kai ly nangchi ai ngari kamtang mai hawi cham chum nai ne. Na i py nangchi ai ly vang teng y nai kaniu.

¹¹Kai ly ati mo sa i py, kaimy i tahm anem y ai nai sa. Kaimy i amyn phra ai nai kasa ai ny y. Kaimy leaungrei naini nga ai ataing nai nang parai nai py, takhra amimi ai py nga hai ai ny y,” napi.

¹²ARENG my, “Aw kaimy palau nai khumi, Israela chengchi awi, kai i leu tangai u! Kai ly Tameuh ne; kangman keh nai hawi kangkhym keh nai leaungrei khyh nai Tameuh ne!

¹³Kai i kiu ly khaileaung sangum langdengchi pala iy, kani khusang ai khiu tapai nai ne. Kai ly khaileaung hawi kani khusang ai kapalau nai khala y, vaimy tym u praw bo.

¹⁴“Nangchi bawibawi ly jeu achu iy, kai i thui nai tangai u! Kaimy vawi takhra nai khumi ly Babulon pri y tiu ai, nanai py, kai i kangai sa pi ai nanai py, mani tameuh my py thui pi yb thai y leang.

¹⁵Ni teng y leu pei iy palau nai keung ly kai ne. Kai ly ni ai lam patei iy, eaung naira pei pi bo.

¹⁶“Vai, kai i sahawi y jeu iy, kai i thui nai leu tangai u. Kai ly angchei khala i my nangchi teng y kang thui pi keng veng bo. Huni leaungsai amteaung nai khala my, kai ly awm,” napi. (Vai, ARENG Tameuh ly kai ai sa thai naira pei iy ang pato nai ne.)

¹⁷Israela chengchi i chai parai nai Tameuh, nangchi ai atleu nai ARENG my, “Kai ly nangchi hawi ai nai i vui y patiu pi iy, nangchi tako ai nai lam patei pi nai nangchi i ARENG Tameuh ne.

¹⁸“Nangchi naini kai i leu pei naichi tangai u lawh teu i khyly, khri pa-rei hawi ai! Awmnem nai tavo tui kamta, nangchi i vui leaung ai! Eaung naira py tui peang y tui sampyh pachaw nai kamta, nangchi i vui tym ai nai ne.

¹⁹Nangchi i kangpreangchi ly spryh jirei nawi iy, kai ly nichi ai mana khala py, myn kang hai ai ny y.”

²⁰Babulon pri i dengdairei theu u; tlamsa naimy tako u! “ARENG ly mymy i miseaung Israela chengchi ai atleu bo! nanai satang ai amo theu parai naimy aeu u; meingtym tleirei y amthang hai u.

²¹ARENG ly mymy i khumichi ai, bi parai iy tui by y nai daichi ka-vymra y pahawi prei nai khala, nichi ly tui ahai u y. Mymy ly nichi i vui lengseaung dengdairei, tui theu hai bo. Lengseaung ako hai nai deaungkho y, tui leaung nai ne.

²²“Khumi hawi y naichi ly awmnem naira nga ai ny y,” nanai ARENG my leu pei bo.