Read Khumi Chin ISAIA 57 Bible Online

ISAIA 57 - Khumi Chin bible

ISAIA 57

¹Khumi kahawichi ly dei u nai ne. Huni khumichi hunai kamta dei nai ly ami py pany u thai y. Ati sai py dawndan u y. Na i py nichi ly dei nai khala y, patang naira by y nai meingtym y tym u nai ne.

²Khumi kahawichi ly dei nai khala y, tlamsa naimy anawn ai nai nga u bo.

³Nangchi khumi hawi y nai, kamngo sa naichi awi! Tara chih naira avum ai nai hini meingtym y jeu u. Nangchi ly ami i aju chanauchi hawi tamang naichi, bimachi, uimiu khawn naichi hawi vanrei ne.

⁴Nangchi ly ami ai panui hai u nai mo? Tapawp nai khumichi awi, nangchi ly ami ai thui tamawn u nai mo?

⁵Nangmychi i khai takhra nai dengkeaung keungchi anui y kamthu kamleaung sa nai hawimy, khaileaung hawi hai nai tameuhchi ai chiu u bo. Mychi i cho chanauchi ai tavo jawn sahawi y awm nai lengseaung tapiuchira y apathyp u.

⁶Hunira i suileng nai lengseaungchi la iy, nangchi i tameuhchi palawn iy chiu u. Nangchi ly kreip hang leih iy huni tameuhchi teng y talam u nai ne. Cha nei kapathypra py talam u bo. Nangchi hina nai sa nai ly kaimy kawn pi ai, nanai nangchi athang khai u a?

⁷Nangchi ly mawi ka-sang salo y lyn iy, apathyp nai tarawi y, kamthu kamleaung sa u.

⁸Nangmychi i amso ngai nai mynchi ai yhm katheuchi hawi, katheu chenghengchira y takawp u. Nangchi ly kai ai khai u su bo. Nangmychi i ateaungchi aleng pawn iy tavawichi hawi vanrei ira pui tleaung y jawn i, i ahawi u nai ne. Nangchi ly nichi hawi i ahawi ai nai vang pei u bo. Nichi ly bymkeih pa-rei i ahawi u nai ne.

⁹Nangchi ly rimui hang hawi mui kahawichi amjui amthyp iy, Mole tameuh ai chiu ai nai chei u bo. Kamlo kang sa hawi tavau pri y khrairei py, savaichi pato iy tameuhchi ai hau u nai ne.

¹⁰Nangchi ly tameuh takhrachi ai hau nai deaungkho y akawm i py, mana khala py athosi u y. Nangmychi i mynchi teng i dengdairei atho nga nai ne, nanai dawn u iy, nangchi ly mana khala py paha u y.

¹¹ARENG my, “Kai ai tapawp iy tami vui nai, pany y vui na pa-rei, nangchi jei u nai tameuhchi ly amichi mo? Kai ly kra parai pa-rei tynkryh y naimy awm nai deaungkho y, nangchi ly kai ai jei y nai awm u nai a?

¹²Nangchi ly nangmychi i sa nai kalop ly teng, nanai athang khai u. Na i py nangchi i sa nai kang tapheaung nai khala y, nangchi i mynchi ly nangchi ai asa hai pajau ai ny y.

¹³Nangmychi ai ang sabawm ai nai nangchi aeu u nai khala y, huni mynchi my nangchi ai atleu pi na sy! Hunichi ly ali tlenrei aho baly akheang pawn ai nai teu! Na i py kai ai ym nai khumichi ly mychi i saleaung khutengra y awm ai nai nga iy, kai i Achura yhm kachaira y kai ai chiu u ai,” napi.

¹⁴ARENG my, “Kai i khumichi ai kai teng y vawi hai u. Kai i khumichi tako nai lamra i, khangmui ka-cheung awm nai ngierei hie u pawn! Lam sa iy angvei u rym!

¹⁵“Kai ly deungtasarei heng nai Tameuh, tahm asang iy chai parai nai Tameuh ne. Na i py kai ly chai parai nai salo kangteng y awm nai ne teu i py, paleung phra nai khumi, paleung apanem nai khumichi ai paleung hawi phailo atho nga ali teang ai nai nichi teng y kaawm hai.

¹⁶Kai ly kaimy i khumichi ai heng ai nai kapei. Nichi ai thui tamawn bi iy, kado theu hai jojo y leang bo.

¹⁷Kai ly nichi i kamngochi hawi, ngaiphi ala naichi molam y kado theu nai, nichi ai kapajeng iy, nichi teng i nai hi pi veng bo. Na i py nichi ly paleung tang naimy, mychi i kangai sa u veangveang nai ne.

¹⁸Nichi ati mana sa u mo, nanai kai ly niu bo. Na i py kai ly nichi ai no hawi sa pi ai; lam patei iy sabawm ai. Paleungsi vo tangam naichi ai awm hai nem ai.

¹⁹Israela pri y awm nai paleung si paleung mawn naichi i labeaung mang, kawn nai leu thui u sy. Kamlo kang sa awm nai khumi bawibawichi teng y tlamsa naira kapei ai! Awmnem naira py kapei ai. Kai i khumichi ai no hawi kasa pi ai, nanai ARENG my leu pei nai ne.

²⁰Na i py khumi hawi y naichi ly avaw by y nai tui sampyhchi my tabeang iy, aneaung kapan hawi cheaungnangchi amjau hai nai pangli tui hawi atawm nai ne.

²¹Khumi hawi y naichi ly tlamsa naimy awm ai ny y, nanai kai i ARENG my leu pei bo.