Read Khumi Chin ISAIA 58 Bible Online

ISAIA 58 - Khumi Chin bible

ISAIA 58

¹ARENG my, “Baw katyn pajeng thai ryrei eng nai kamta aeu! Kai i khumichi teng y mychi i kamngo nai sai thui pi!

²Nichi ly kai i reita sa patawm bo, nanai hawi, lam kateng sa bo, nanai py thui u iy, kai ai kani tleirei chiu u. Kai i parip nai saichi pany ai nai ngai u. Nichi ly kai ai chiu ai nai ngai u i, kai teng i leu meitang reitachi hnei u bo.

³Huni khumichi my, “ARENG ly achi ai mana khala py niu y lawh baly, achi ly ati mana nai y biu hai u ai bo? Mymy ly achi i tahm apanem nai ai pany pi y lawh baly, ati mana nai achi ly biu hai patang atyhtyh ai mo?,” napi. ARENG my nichi teng y, “Meitang khyp nangchi ly biu hai nai thym khala, amy i vui kamran hau iy, nangmychi i vui kalop sa nai khumichi ai ana u bo.

⁴Nangchi biu hai nai ly nangmychi tengtawi avawrei kado theu, ajo athui iy ani u bo. Hina nai kamta nangchi chiu sa hnei takeng u nai ly kaimy kang tangai pi ai, nanai nangchi athang khai u a?

⁵Nangchi ly biu hai iy kanireichy nangmychi tahm apanem nai ly kang kawn pi ai, nanai athang khai u a? Kamtang kham iy acha keungchi kamta lu meung naimy, nangmychi ateh ai nai maidym tleaung y paisiu kanih bai u reng nai ne. Hina nai sa nai ly biu hai nai ne, nanai nangchi thui u ai a? Huna nai nangchi sa nai neng kani ai kaimy kang kawn pi ai, nanai nangchi athang khai u a?

⁶“Kai i kawn nai biu hai nai ly pahyp y naimy ana nai ka-dawnchi khai su nai, peang nai sai teng y nai ai khai su nai, ana naira avum naichi ai atleu nai,

⁷kajeu alam naichi ai pacho panei nai, yhm hlau by y nai khumi kamawnchi ai awm naira pei pi nai, ateaung alang by y naichi ai pei pi iy nangchi i chengchi ai sabawm nai, huna naichi ai akhi y nai ne.

⁸“Nangchi ly hina nai kamta sa u baly, kai i tamen nai kangvang ly khawn kani si sangso kamta, nangchi i tlang tleaung y ang ko iy, nangchi i no naichi py hawi kaliki vui ai. Kai i hawi naira ly nangchi hawi vanrei awm jojo ai. Kai i sa thai naira ly cheaungkhangra y nangchi ai ama hai ai.

⁹Nangchi chiu sa nai khala y tangai pi ai. Nangchi kasabawmra hnei nai khala y kang pathang pi ai. “Nangchi ly pahyp y naimy ana naichi anawn iy, teng y naimy neng hai nai amkyn khala, chai y nai leu ngiereichi khai su;

¹⁰kajeu alam nai khumichi ai teicha teinei pacho iy, avaw nai khumichi i kangai pei u ai nabaly, nang i kangvang ly nangmy tengpang sahawi i kaveng ai angvang hai ai. Nang i vum kaveng ly kanithun kangvang kamta lawm ai.

¹¹Kai py nangchi ai lam patei jojo iy, kani kabi jengha nai meingtymra y cha nei pawichi hawi kajeu kawi hai ai. Nangchi ai noso aho hai iy ham hai ai. Nangchi ly tui nga hawihai nai akhobai kamta py, mana khala py tui kang vai y nai tavo micheaung kamta py lawm ai.

¹²Nangchi i khumichi py, phra seaungkhrang joja nai yhm hlauchi ai langdeng kangngymchi salo y sa u teang ai. Nangchi ly phra seaungkhrang nai mary apaichi sa palai iy, anawi seaungkhrang nai yhm hlauchi hawi lamchi py, sa palai teang nai khumichi, nanai palau nai avum u ai,” napi.

¹³ARENG my, “Nangchi ly Anawn kani ai kani kachai, nanai khai takhra iy, huni kani y amy i vui kamran nga ai nai kalopchi so u y ai nabaly, nangchi ly nangmychi kangai khuleaung chei nai, nangmychi kangai kalop sa nai, ti y baly ati sai py ny y nai leuchi katheu nai, hunichi amkyn iy kai i kani kachai ai tahm khai u ai nabaly,

¹⁴kai ai chiu naira i nga ai ataing nai paleung awmnem naira nga u ai. Kai ly nangchi ai khaileaung pri verei y tahm awm hai ai. Nangchi py nangmychi i amsi pajo Jakob teng y pei nai pri y, amo theu parai naimy awm u ai. Hini ly kai ARENG i thui nai leu ne,” napi.