Read Khumi Chin ISAIA 6 Bible Online

ISAIA 6 - Khumi Chin bible

ISAIA 6

¹Samrang Uzia dei nai saneng y kai ly Areng hawi avum nai ne. Mymy ly nang parai nai bailang tleaung y ateh. Achura yhm verei py mymy i ateaung hawimy kawi na bo.

²Mai kadeu angveaung nanai Charabenchi ly mymy ai taki teungtareung nai ne. Nichi ly pakhi tariu tariurei awm; nichi ly pakhi nyhrei hawi meimai y py, takhra pakhi nyhrei hawi tlang y py khiu iy, huni bo i pakhi nyhrei ai ly akheang naira y teaung nai ne.

³Nichi ly “Ati cheaungkhang sa thai nai ARENG ly Kachai, Kachai, Kachai ne! Khaileaung pri ly mymy i nang parai nai hawimy kawi be bo,” nanai aeu u.

⁴Hina nai nichi aeu u nai raawi deaungkho y, Achura yhm langdeng ly amchyh na i, Achura yhm py maikhyhchi my kawi cheng na.

⁵Kaimy py, “Kai teng y athang khai naira by y leang bo. Kai ly taham si parai na ly! Ati mana nai mo nabaly kai i labeaung mang theu nai leu ngiereichi ly chai y i, chai y nai leu naini katheu reng nai khumichi theung y kaawm nai ne. Na i py vai, kai ly ati cheaungkhang sa thai nai ARENG! napi nai samrang ai kaniu lawh bo,” napi.

⁶Huna nai khala Charaben leaungrei ly maicham tleaung y mai-ai harei tangkeih hawi takip iy syn naimy kai teng y akheang kathiu bo.

⁷Ni ly kai i labeaungteng y mai-ai hawi tabi i, “Nang i labeaungteng ly hini mai-ai hawi tabi chum nai deaungkho y, nang ly kamngo by y, nang ly kamngochi lawira nga veng bo,” napi.

⁸Naibaly Areng my, “Kai ly ami ai kapato ai mo? Kaichi i vui ami chei ai mo?,” nanai deng. Kaimy py, “Kai kachei ai! Kai ai pato ba!,” nanai kapathang.

⁹Hunai deaungkho y mymy ly kai ai huni khumichi teng y pato iy, “Nichi teng y, nangchi ly avaw avawrei tangai u teu i py, pany thai ai ny y; khenkrei khenkrei teu i py, awm nai sai pany u ai ny y, nanai thui pi,” nanai leu pei bo.

¹⁰Naibaly mymy ly “Hini khumichi i paleung ly deitup naimy, nichi i kanochi ly pang naimy, meichi py paju naimy awm pa-rei so. Huna khala naini nichi ly niu pajau y, thai pajau y, pany thai y naimy awm u ai. Nichi ly niu pajau, thai pajau, pany thai pajau lawh ai nabaly, mymychi phailo mang i no-nachi tama ai nai kai teng y ali u teang ai,” nanai kai ai leu pei bo.

¹¹Kaimy py, “Aw Areng, hina nai tym nai ly mana tanrei kra ai mo?,” nanai deng. Mymy ly “Marychi phra seaungkhrang iy daihaulau naimy awm nai neng ryrei awm ai. Yhmchira y khumi by y i, huni pri py khumi angso savai tlang nai neng ryrei awm ai.

¹²Kai ly khumichi ai meingtym takhra mang y ang pyn hai iy, huni pri y khumi angso savai tlang hai ai.

¹³Huni pri y khumi chungphy horei vi awm ai khyh na lawh teu i py, huni khumichi ly myh kang u ai nai ne. Huni khumichi ly paliu vui nai ngopraibiu keungchi i miukhiuchi hawi atawm ai,” napi. (Dengkeaung miukhiuchi ly Tameuh i khumichi deung kangtha amteaung nai sai pany hai nai ne.)