Read Khumi Chin ISAIA 64 Bible Online

ISAIA 64 - Khumi Chin bible

ISAIA 64

¹Nang ly ati mana nai y kani pa-kho paeaung iy jeu kathiu y lawh mo? Mawichi ly nang ai niu nai khala, jei hyn u ai.

²Nichi ly mai salo y kado thlauthlo nai tui kamta, kaso theu u ai. Jeu ly paleung ka-echi teng y nang i sa thai naira patei pi ba. Khumi cheng cheaungkhangchi ai, nang i mo y kaso theu hai ba!

³Tlenrei khala nang ly jeu iy, kaichi athang khai y nai ka-jeirachi sa pi bo. Mawichi ly nang ai niu i, jei nai paleung hawimy kaso theu u bo.

⁴Nangmy ai kadeaung u nai khumichi i vui y, hina nai kalopchi ai nang kamta sa pi nai Tameuh ai ly ami py niu vai y. Huni Tameuh satang thai py thai vai y.

⁵Nang ly kateng sa naira y amo theu naichi ai py, nang i ngai nai kamta sa ai nai tami y nai khumichi ai py, kawn pi nai ne. Nang ly kaichi ai kado theu hai teu i py, kaichi ly kamngo sa ra sa ra bo. Nang ly kado theu naimy awm teu i py, kaichi ly tamang naira sa veangveang nai ne. Jangni i ka-so hina nai kamta kasa u lawh bo.

⁶Kaichi bawibawi ly kamngochochi ne. Kaichi i kahawi keh sa nai malawn py, amso ngailai nai cheichei teu bo. Kaichi ly kaimychi i kamngochi deaungkho y, ali my pakheang veng nai phaicham kajeichi hawi atawm.

⁷Nang i amyn y nang teng y leaungrei py chiu so y. “Sabawm kyh ba,” nanai leaungrei py hnei ai nai jeu y. Kaichi i kamngochi deaungkho y, nang ly meimai hi vui iy kaichi ai khai su bo.

⁸Na i py aw ARENG, nang ly kaichi i ampo ne. Kaichi ly khaileaung laikan hawi atawm iy, nang ly laawm beu nai keung hawi atawm. Nang ly kaichi ai sa nai keung ne nai deaungkho y,

⁹kaichi i tlang tleaung y kado theu hai ala moh, ti y i py, kaichi i kamngochi ai pany pi jo moh kyh ba. Kaichi ly nang i khumichi ne i, kaichi ai pahen kyh ba.

¹⁰Nang i chai parai nai marychi ly khutaha daichi ka-vymchi lawm iy Jerusalem mary py, phra seaungkhrang naimy khumi angso by y naira lawm bo.

¹¹Nang ai kaichi i amsi pajochi my palo nai, apu parai nai meingtym kachai Achura yhm ly mai y kang veng bo. Kaichi i khrei nai yhm hlau ngiereichi py, phra seaungkhrang veng bo.

¹²Aw ARENG, nang ly hinichi molam y paleung no-ei y nai sai a? Nang ly awmnem iy kaichi ai, kaimychi kham pajau nai tleaung y, ngari kamtang tym hai ra ai a?