Read Khumi Chin ISAIA 65 Bible Online

ISAIA 65 - Khumi Chin bible

ISAIA 65

¹ARENG my, “Kai ly kaimy i khumichi i chiu sa nai tangai ai nai angveirym i py, nichi ly chiu so u y. Kai ly nichi hau lawh baly niu ai nai ajeng rym teu i py, nichi ly kai ai hau ai nai atho so u y. ‘Kai ly hi y awm, Kai ly sabawm pi ai,’ nanai leu pathang pi ai nai angchi yb teu i py, Israela chengchi ly kai teng y hnei u y.

²Paleung tang iy hawi y sa naimy mychi kangai lam y tako reng nai, kai i khumichi ai lamchung ai nai ajeng rym jo nai ne.

³Na i py nichi ly kangji by y. Kai ai kado theu pa-rei sa u. Nichi ly khaileaung kathau tameuhchi ai akhobaichira y apathyp u. Myn chiu nai maichamchi salo y mui katuichi leng patlum u.

⁴Nichi ly vum y tapiuchi, tapreaungchira y chei iy, khumi kadei phailochi hawi leu arum u nai ne. Nichi ly eu mawi cha iy nichi i laawm theung i, chai y nai mawi byh hangchi nei u.

⁵Naibaly nichi my, mymychi ly khri pa-rei chai parai, takhra khumichi hawi abi ngau y!, nanai thui iy ami ai py mychi sahawi y ahai ai nai pei y. Kai ly huna nai khumichi ai neaung kham pi pajau y. Nichi i tlang tleaung y tym nai kai i kado theu nai ly dei vai y nai mai hawi atawm.

⁶“Nichi i tlang tleaung y ati mana kapajeng ai mo, nanai kai ly dawn yb veng bo. Nichi i vui pajeng ai nai py tajiu yb bo. Kai ly nichi i sa naichi ai khen teu ai ny y.

⁷Nichi i kamngolai py, nichi i amsi pajochi i kamngolai py, vawitheung katha hai ai. Nichi ly mawi salo i mynchi ai chiu nai meingtymra y mui katuichi leng patlum iy, kai ai cheh u bo. Hunai deaungkho y nichi ai kamngo ka-taing kapajeng ai,” napi.

⁸ARENG my, “Kreip athai kahawichi ai ami py taphra vai y; ati iy kreip hang sa u nai ne. Kai ly kaimy i khumi bawibawichi ai tamyh veng ai ny y. Kai ai chiu nai khumichi ai ly kaimy atleu ai.

⁹Juda chengchi ai amtheaung naira pei ai. Juda kangpreangchi ly mawi tleaung pri napi nai kai i pri amtym u ai. Kai i miseaung, kai i khumichi ly huni pri y awm iy amtym u ai.

¹⁰Nichi ly kai ai chiu naimy, mymychi i beram hawi si, painochi ai nidym mang i Sharon adym y py, nisi mang i Akhaw leaunghawi sui tlai naichira y py, anawnra palawn iy typ u ai.

¹¹“Na i py kai ai khai su nai khumi, kai i chai parai nai Zion mawi y dawndan y naimy, hawi nai hawi y nai Tameuh, Kad hawi Meni nini ai chiu nai nangchi i vui ly

¹²haisau hawi tleh nai avum ai. Nangchi ly kaimy palau nai khala y pathang u y. Kaimy kang thui nai khala py tangai u y. Nangchi ly kai i mo y hawi y naira sa naimy, kai i ngai y nairachi sa u lawh bo.

¹³Hunai deaungkho y kai i leu tangai iy, kai ai chiu naichi ly cholei neilei y iy, nangchi ly kajeu alam naimy tui py ahai u ai. Kai i miseaungchi ly amo theu iy nangchi ly kangji nga u ai, nanai nangchi ai kai, ARENG my kang thui pi nai ne.

¹⁴Kai i miseaungchi ly amo theu parai naimy khulym thui u i py, nangchi ly paleung phra vo tangam u ai.

¹⁵Kai i vawi takhra nai khumichi ly nangchi i amyn ai, amsawira y teaung u ai. Kai, ARENG my py nangchi ai kang padei ai. Na i py kai i leu tangai nai khumichi ai, kai ly amyn kangtha pei ai.

¹⁶Mymy i pri y amtheaung naira nga nai khumi ngiereichi ly ka-ym awm nai keung Tameuh teng i amtheaung naira hnei u ai. Vaineng abeu nai ngiereichi py, ka-ym awm nai keung Tameuh i amyn y tau iy, vaineng abeu u ai. Jangni khala i ngari kamtangchi ly tama iy, hunichi ai khumichi ly tami u pawn ai,” napi.

¹⁷ARENG my, “Khaileaung kangtha hawi kani kangtha sa ai. Jangni khala i atiti awm naichi ly tama pawn veng ai.

¹⁸Kai i sa nai kalopra y amo theu u jojo ba. Kai i sa nai Jerusalem mary kangtha ly khri pa-rei amo theu iy, huni mary i khumichi py amo theu u ai.

¹⁹Kaimy kypkyp malawn py, Jerusalem mary deaungkho y py, huni mary i mipuichi deaungkho y py, amo theu ai. Huni mary y vo nai hawi kasabawmra hnei nai khumichi awm ai ny y.

²⁰Kanu kanei deaungdichi py, tleaungri cheng y naimy dei u ai ny y. khumi luteng py saneng syp pa-rei heng u ai. Saneng chungvairei heng nai khumichi ai malawn py, saneng theang nai khumichi, nanai palawn u ai. Saneng chungvairei heng y nai khumichi ai ly kaimy pajeng nai ka-ma-ra ne, nanai dawn pany u ai.

²¹Khumichi ly yhmchi sa iy mymychi kypkyp awm ai nai nga u ai. Huni yhmchira y ly amtawn abi y naichi awm ai nai nga u ai ny y. Khumichi ly kreip akhochi sa u iy, kreip athaichi cha ai nai nga u ai.

²²Kreip hang py takhra khumichi nei ai nai nga u ai ny y. Kai i khumichi ly dengkeaung kamta heng sau u ai. Nichi ly mychi i kalop sa nai lawi bym pa-rei cha ai nai nga u ai.

²³Nichi i kalop ly chawn ai i, nichi i cho chanauchi ly patang naira avum u ai ny y. Kai ly nichi hawi nichi i kangpreangchi ai deung kangthau tleirei amtheaung hai jojo ai.

²⁴Nichi i kai ai chiu nai tem y rai khala my, kai ly nichi i hnei nai pathang pi ai.

²⁵Kasui hawi beramchi ly vanrei teicha tlai iy, khrangsichi ly si, painochi kamta acha cha ai. Pavuichi ly spryh naini cha u ai. Kai i chai parai nai Zion mawi salo y patang hai nai hawi, hawi y nairachi ati sai py awm ai ny y,” napi.