Read Khumi Chin ISAIA 7 Bible Online

ISAIA 7 - Khumi Chin bible

ISAIA 7

¹Juda pri y Uzia i katu, Jotham i chapo Ahaz samrang lyn nai thym khala y, tavai atiu nai ne. Suria samrang Rezin hawi Israela samrang Remaliah i chapo Pekah nini ly Jerusalem mary ai tiu u teu i py, huni mary ai peang vui pajau y.

²Suria risachi ly Israela khu ka-peang theung y tym u bo, nanai Juda samrang thai nai khala y, ni hawi vanrei ni i khumi mipui bawibawichi ly khri pa-rei jei u bo. Ali theu iy ahyn nai dengkeaung ngamchi kamta, nichi i paleung ahyn u nai ne.

³ARENG ly Isaia teng y, “Nang i chapo Shear Jashub ai palau iy samrang Ahaz hawi ka-vum so. Nang ly ni ai salo tuikan tui paleaung nai tui lam katemra i, kanih aneng nai keungchi i kalop sa nai meingtym sahawi i lam salo y avum ai.

⁴Ni ai tau awm ai nai, paleung khaw ai nai, kaso theu y ai nai hawi paleung khrukhra y ai nai thui pi. Samrang Rezin hawi vanrei Suria khumichi i kado theu nai hawi samrang Pekah i kado theu nai ly maisaku nyhrei mang theu nai maikhyh tanrei, ka-jeira pei pajau y leang.

⁵Suria pri i samrang hawi Israela pri i samrang nini ly kangviu y tau harei sa hawi bo.

⁶Nichi ly Juda pri theung y kun iy khumichi ai mymychi mang y abang ai nai pajei pahyn iy, Tabeel i chapo ai samrang palyn ai nai dawn u yb nai ne.

⁷Na i py ARENG my satang thai hai nai ly “Hina nai ly mana khala py tym ai ny y.

⁸Ati mana nai mo nabaly Suria pri i atho ly Damaska mary ne iy, Damaska mary i atho py samrang Rezin ne nai deaungkho y ne. Israela pri py saneng vuitariu saryh pangrei sala y phra ai i, pri harei kamta khaw pajau ai ny y leang bo.

⁹Israela pri i atho ly Samari mary ne iy, Samari mary i atho py samrang Pekah ne. Nangchi ly Tameuh ai hawihai palai ym y lawh baly, mana khala py angdo u pajau ai ny y,” napi.

¹⁰ARENG ly Ahaz teng y mymy i savai pato iy leu pei bi nai ly,

¹¹“Rengrang ka-ma-ra harei patei pi ai nai nang i ARENG Tameuh teng y hnei ba. Huni rengrang ka-ma-ra ly tavau pri i dengdairei py, kani pri mang i dengdairei py ne lym ai,” nanai thui hai bo.

¹²Ahaz my, “Kai ly ARENG ai cham ai nai ngai y. Hunai deaungkho y rengrang ka-ma-ra hnei ai ny y,” napi.

¹³Huna nai khala Isaia my, “Aw samrang Davida i katu chanauchi awi, vai tangai ba. Nang ly khumi mipuichi ai niu ngai y ai nai pa-rei sa nai ly paleung anyp y i, Tameuh ai py niu ngai y ai nai pa-rei sa ai nai ngai lawh a?

¹⁴Vai, Areng mymy naimy nang ai rengrang ka-ma-ra harei ang patei pi ai. Neampachy anglo leaungrei ly deaungdi aniu ai i, chapo tapen ai. Ni ly huni chapo ai, “Emmanuela”[1]nanai amyn pathi ai.

¹⁵Huni deaungdi ly tleaungri acheang iy dawn pany thai nai neng tym nai khala y, kanu hawi khawihang naini cha nei ai.

¹⁶Huni neng kani tym y rai khala my, nang jei nai samrang leaung nyhrei i pri ly khumi angso savai tlang nai lawm ai.

¹⁷“Israela hawi Juda pri nyhrei akhawi takhra nai neng dengdairei amteaung iy, avum vai y nai patang nairachi ai ARENG ly nang hawi nang i khumichi tlang tleaung y py, samrang i yhm dengtheungchi tlang tleaung y py tym hai ai. Mymy ly Asuria samrang ai ang hawi ai.

¹⁸“Huni neng tym nai khala ARENG ly Aikupta chengchi ai pathauchi kamta, Naing tavo kangprei syh mang dengdairei py, Asuria chengchi ai khawichi kamta mychi pri i dengdairei py tym u ai nai, amsui sai hawi ka-ma-ra pei ai.

¹⁹Nichi py lengseaung nawi parai nai leaunghawichi, lengseaung tapiuchi, aleng reaung awm nai ngiereichi hawi, sui tlai naira ngiereichira y, adeng mengmeaung naimy tym u ai.

²⁰“Huni neng tym nai khala y Areng ly Euphrat tavo vai i Asuria empara samrang napi nai sam vau kawp nai keung ai alai iy, nangchi i labeaung muichi py, sam hawi tlang muichi py vau hai ai.

²¹“Huni neng tym nai khala, li sa nai khumi leaungrei teng y sicho nu harei hawi mi-i nyhrei nai awm khyh teu i py,

²²ni ly my i cha nei ai nai ngai nai ryrei, kanu tuichi nga ai. Huni pri y dei kamthum khumichi ly kanu tui hawi khawihang cha nei ai nai nga u ai.

²³“Huni neng tym nai khala kreip keung sangrei awm iy, tangka sangrei vang teng nai kreip akhobai tleireira malawn py, aleng reaung cheaungkhang beng hai mang ai.

²⁴Thailiho chyn syn y naimy ami py huni meingtym y chei vam ai ny y. Pri verei y malawn py aleng reaung cheaungkhang hawimy beng hai mang na ai.

²⁵Vaichi khala y thengthai keungchi ui mang nai mawi aheung ngiereichi py, aleng reaung cheaungkhang beng mang nai deaungkho y, huni meingtymchira y ami py chei u ai ny y. Sichi, beramchi i vui sui tlaira naini lawm ai,” napi.