Read Khumi Chin ISAIA 8 Bible Online

ISAIA 8 - Khumi Chin bible

ISAIA 8

¹ARENG ly kai teng y, “Cha tajiura blackboard pui harei la iy, ‘Tiu kaliki, lawm kaliki’ nanai leusai cha-mawi kalen pui tajiu ba.

²Ka-ym awm nai pathyp pi nai keung Uriah hawi Jeberekia i chapo Zekhariah nini leaung nyhrei ai, pany hai nai keung palawn iy palau yb ba,” napi.

³Neng kra y nai sala y kai i aju ly deaungdi aniu i, chapo tapen nai ne. ARENG my py, “Huni chapo ai, ‘Tiu kaliki, lawm kaliki’ nanai amyn pathi ba.

⁴Huni deaungdi ly nei, ngaai, nanai palau kawp nai neng tym y rai khala y, Asuria samrang ly Damaska mary i yhmtheaung katui ngiereichi hawi, Samari mary y tiura i nga nai vawnsaichi la pi vui ai,” nanai kai teng y leu pei nai ne.

⁵ARENG ly kai ai leu ang pei bi bo.

⁶Mymy ly “Hini khumichi ly leaung kajai nai Siloh tavo micheaung[2]khai su iy, samrang Rezin hawi samrang Pekah nini i mo y kaso theu nai deaungkho y,

⁷Kai, Areng ly Asuria empara samrang hawi, ni i tavaimi risachi ai palau iy Juda pri y tiu hai ai. Nichi ly Euphrat tavo tui lem nai kamta, hubai pui hawi tavai amsa u ai.

⁸Asuria samrang hawi tavaimichi napi nai, lem heu nai tavo tui ly Juda pri verei y leaung naimy meingtym tleireira y, khumichi i kaneaung tym pa-rei um ai,” nanai kai ai leu pei bo. Aw Emmanuela Tameuh ly kaichi hawi vanrei awm na a! Mymy ly my i tamen nai pakhi kadai iy, kaichi i pri ang kry pi nai ne.

⁹Nangchi pri takhra khumi bawibawichi awi, jei hyn naimy akachu u! Kamlora i khumi bawibawichi awi, tangai u! Tavai atiu ai nai angvei u rym. Na i py kaso theu u! Nangchi ly huna nai angvei u rym teu i py, jei hyn u nai ne.

¹⁰Nangchi sa ai naichi dawn pasym u! Na i py huni pasym yb naichi ly mana khala py eaung ai ny y. Nangchi thui ai ngai nai leuchi thui u. Na i py hunichi ly ati sai py ny y ai. Ati mana nai mo nabaly Tameuh ly kaichi hawi vanrei awm nai deaungkho y ne.

¹¹ARENG ly khumi mipuichi i sa nai reita lam y abang y ai nai, kai ai hawihai palai ang pany hai bo. Mymy ly

¹²“Nang ly huni khumichi i dawn tau naira y abawi moh. Nichi i jei hyn naira y jei moh.

¹³Ati cheaungkhang sa thai nai keung ARENG ly kachai ne, nanai tami vui moh. Nang i jei ai nai khumi ly kai ne.

¹⁴Kai i chai parai nai sai ly lyh ai hawi nai deaungkho y, kai ly khumichi pathuikhe iy atlym hai ai nai lengseaung hawi atawm. Juda khumichi, Israela khumichi hawi Jerusalem mary i khumichi ai patiu ai nai deaung hawi py atawm nai ne.

¹⁵Khumi neangneangchi py pathuikhe iy atlym u ai. Nichi ly huna nai atlym u iy tamo kalem nga u ai. Nichi ly deaung y man u ai,” napi.

¹⁶Kai teng y abang nai khumichi ly kai teng y Tameuh my pei nai leuchi tangai u ai nai tla.

¹⁷ARENG ly mymy i khumichi teng y meimai patei pi y; na i py kai ly mymy ai ym iy athang khai ai.

¹⁸ARENG my kai ai ang pei nai cho chanauchi hawi vanrei, kai ly hi y awm nai ne. Zion mawi salo y awm nai ati cheaungkhang sa thai nai ARENG ly kaichi ai Israela chengchi i vui y leu pei nai kamta heng ai nai lawm hai bo.

¹⁹Na i py khumichi ly atam kawp nai leung sarachi hawi, vawinam kun nai khumichi teng y leu deng ai nai, nangchi teng y thui ai. Nichi my, “Khumichi ly heng nai khumichi i jeng y dei nai khumichi i phailochi teng y leu deng ai nai avo,” nanai thui u ai.

²⁰Huna nai khala nangchi my, “ARENG i leu pei nai tangai u! Nichi thui nai leuchi ly nangchi i vui kamran by y,” nanai thui pi u.

²¹Khumichi ly mymychi i pri y paleung phra athosi naimy kajeu alam iy heng u ai. Nichi ly kajeu alam nai hawi kado theu naichi molam y, mychi i samrang hawi mychi i Tameuh ai josei u ai. Nichi ly kani mang y khen angdeang kalau nai khala py,

²²khaileaung y khen kathiu nai khala py, ngari kamtang hawi taham kasi veng nanai ny y baly, ati sai py niu u ai ny y. Huna nai jei hyn ai hawi nai taham kasi ly huni khumichi teng y tym ai.