Read Khumi Chin Levi 1 Bible Online

Levi 1 - Khumi Chin bible

Levi 1

¹ARENG ly mymy i awmra Tabynako theung mang dengdairei Mosi ai palau i,

²Israela chengchi apathyp nai khala, teaung patawm ai nai reitachi pei pi nai ne. Amimi py, tawnbawi hawi apathyp baly amy i si kanghu theung i mo, beram kanghu, ti y baly mi-i kanghu theung i mo, ha harei hawi apathyp ai nai tla.

³Si hawi leng patlum nai apathyp ai na baly, huni si katai ly no-na awm ai nai tlo y. ARENG my ni ai kawn pi ai nai, ni ly huni si katai ai ARENG i awmra Tabynako katheu pa-khora y syn ai nai tla.

⁴Ni ly si katai i lu tleaung y kiu kheang nai deaungkho y, huni si ly ni i kamngo pahen nai kapathypra y ARENG my palawn pi ai.

⁵Ni ly huni meingtym y si katai tleh iy Aron i chapo pathyp pi nai keungchi my huni thi ai ARENG teng y talam chum baly, Tabynako katheu pa-khora awm nai maicham makeng palyhreira y katheng prei ai nai tla.

⁶Naibaly ni ly si peih lei iy abai ai nai tla;

⁷pathyp pi nai keungchi my maicham tleaung y theng heaung iy, mai sa ai nai tla.

⁸Naibaly nganbawi akawi, lu hawi thauchi ai theng tleaung y khai ai nai tla.

⁹Takuta hawi kheuchi ai tui hawi paju pyn ai nai tla; naibaly kalop amsi nai pathyp pi nai keung ly tawnbawi bomverei ai leng patlum ai nai tla. Hini talam nai mui kahawi ai ly ARENG my kawn pi nai ne.

¹⁰Huni khumi ly beram, ti y baly mi-i hawi apathyp ai na baly, huni tawnbawi ly no-na by y nai tawnbawi katai lawm ai nai tla.

¹¹Ni ly huni tawnbawi ai maicham i tosyh ngan mang y tleh ai nai tla; pathyp pi nai keungchi ly huni tawnbawi thi ai maicham makeng palyhreira y katheng prei ai nai tla.

¹²Ni ly huni tawnbawi ai abai chum baly, kalop amsi nai pathyp pi nai keung my nganbawi, lu hawi thauchi ai maicham salo y khai ai nai tla.

¹³Ni ly takuta hawi kheuchi tui hawi paju pyn ai nai tla; pathyp pi nai keung ly bom verei maicham salo y leng patlum ai nai tla. Hini talam nai mui kahawi ai ly ARENG my kawn pi nai ne.

¹⁴Nang ly tavo hawi apathyp ai ngai na baly, huni ly amprym buhu, ti y baly yhm buhu lawm ai nai tla.

¹⁵Pathyp pi nai keung ly huni tavo ai maicham mang y syn iy kaneaung mie chum baly, tavo lu maicham salo y leng patlum ai nai talam ai nai tla. Tavo thi ai ly maicham sahawi y paleaung pawn ai nai tla.

¹⁶Ni ly awichapu hawi vanrei awichapura i teicha ai ly la iy, maicham i nisi ngan mang y awm nai maiphura y aphi ai nai tla.

¹⁷Ni ly tavo pakhi nyhrei ai syn iy taku phokra ai nai tla. Na i py pakhi aleng baw vui ai nai tlo y; naibaly bom verei maicham salo y leng patlum ai nai tla. Hini talam nai mui kahawi ai ly ARENG my kawn pi nai ne.