Read Khumi Chin Levi 10 Bible Online

Levi 10 - Khumi Chin bible

Levi 10

¹Aron i chapo Nadab hawi Abihu nini ly myni leaung leaungrei i vui mai-ai laawm la hawi iy, mai-ai khai chum baly mui katui phui naimy ARENG teng y talam bo. Na i py huna nai talam ai nai ARENG my pei y nai deaungkho y, huni mai ly mai kachai ny y.

²Huna nai y tlenrei khyhmy ARENG teng i mai kangveaung tla hai i, ARENG i mo y mai my kang i dei hawi mei bo.

³Huna nai khala Mosi my Aron teng y, “ARENG my leu pei nai ly ‘Kai i kalop sa nai khumi bawibawichi ly kai i chai nai sai ai tahm khai u ai nai tla. Kai ly kaimy i khumichi teng y kai i nang parai nai sai amteng hai ai,’ nanai thui nai ly hina nai molam y leu ang pei nai ne,” napi. Na i py Aron ly ati sai py katheu y naimy awm bo.

⁴Mosi ly Aron i amprang Uziela i chapo Elzaphan hawi Misaela nini ai palau i, nini teng y, “Nang ni i amjo amnau veu ly Tabynako theung i nai tai naira ngam mang y angjeaung hawi veng,” napi.

⁵Naibaly nini ly Mosi my leu pei nai kamta veu y kiu hawi abi y ai nai kanih bam iy ryh hawi i, tai naira angam mang y patheu hawi vui bo.

⁶Naibaly Mosi my Aron hawi ni i chapo Eleaza, Ithama nini teng y, “Nangni ly paleung si nai sai patei ai nai molam y sam aseu y nai awm moh, nangchi i baichuchi py sei u moh. Leu pei nai kamta so y lawh baly dei u ai; ARENG my py Israela chengchi tlang tleaung y kado thau hai ai. Na i py nangni i amjo amnau Israela chengchi ai ly ARENG teng i mai tla hai iy, dei nai khumi i vui paleung si nai sai patei pajau.

⁷Nangni ai ly ARENG i tahm palyn nai asitui leih iy khai takhra nai deaungkho y, nangni ly Tabynako katheu pa-kho i nai theu hawi moh, theu hawi lawh baly dei ai,’ napi. Naibaly nichi ly Mosi my leu pei nai kamta sa hawi bo.

⁸ARENG my Aron teng y,

⁹“Nang hawi nang i chapochi ly kreip hang, ti y baly pavui nai amjy nei iy, kai i awmra Tabynako theung y kun u moh. Huna nai sa iy kun u lawh baly, dei u takengkei ai. Hini reita ly nang i kangpreang bawibawichi tangai u ai nai tla.

¹⁰Nang ly Tameuh hawi amtawn abi nai mo, amtawn abi y nai mo, reita y chai nai mo, chai y nai mo, khawilang thai ai nai tla.

¹¹Mosi teng y kaimy pei nai reita ngiereichi ai, nangchi ly Israela chengchi teng y patiu pi ai nai tla,” napi.

¹²Mosi ly Aron hawi ni teng y vai awm nai chapo Eleaza hawi Ithama nini teng y, “ARENG teng y apathyp nai teicha teinei katalamra theung i kamlai tako dei hawi, angbo abawi y nai tako sa iy, maicham sahawi y cho u. Ati mana nai mo na baly hini kapathypra ly khri pa-rei chai nai ne.

¹³Huni tako ly meingtym kachaira y cha ai nai tla. Huni tako ly ARENG teng y talam nai katalamra theung i, nang hawi nang i chapochi i vui phy ne. Huni ly ARENG my kai teng y ang pei nai reita ne.

¹⁴Na i py nang hawi nang i dengtheungchi ly pathyp pi nai keungchi i vui ARENG teng y talam patyp nai amsei hawi phaichi ai reita y meingtym kachai ra y cha ai nai tla. Hini phychi ly Israela chengchi i leunghawi katalamrachi theung i, nang hawi nang i chapochi ai vui nai mawi phy ne.

¹⁵Nichi ly ARENG teng y tawnbawi thau talam nai khala, amsei hawi phaichi syn u ai nai tla. ARENG my leu pei nai kamta, hini tawnbawi phy ly nang hawi nang i chapo chanauchi i vui ne,” napi.

¹⁶Naibaly Mosi ly kamngo pahen nai tawnbawi mi-i satang deng nai khala, leang patlum chum veng bo, nanai thai i, Eleaza hawi Ithama nini tlang tleaung y kado theu hai iy nini teng y,

¹⁷“Nangchi ly ati mana nai y huni tawnbawi mawi ai meingtym kachaira cho u y lawh mo? Kamngo pahen nai katalamra ly talam patyp nai ne i, ARENG my Israela chengchi i vui kamngo pahen pi ai nai molam, nangchi ai huni tawnbawi mawi kang pei nai ne.

¹⁸Tawnbawi thi ai Tabynako theung y jeu hai y lawh ly. Nangni ly kai i leu pei nai kamta, huni tawnbawi mawi ai Tabynako theung y cha ai nai tla,” napi.

¹⁹Naibaly Aron my Mosi teng y, “Kai ly kamngo pahen nai kapathypra mawi ai vaini cha lawh baly, ARENG my kawn pi na a? Israela chengchi ly ARENG teng y vaini kamngo pahen nai kapathypra talam u bo. Na i py kai ly hini ka-jeira avum asai lawh ly” nanai pathang.

²⁰Mosi ly Aron i pathang nai leu thai baly paleung tuinem nai ne.