Read Khumi Chin Levi 13 Bible Online

Levi 13 - Khumi Chin bible

Levi 13

¹ARENG ly mosi hawi Aron nini teng y, hini reitachi pei pi bo.

²Nangchi theung y amimi py, ngan peih salo y uisalu mo, taposa nai mo, ang vawi engthla nai mo amny iy, ka-jei awm nai nganpeih no man ai nai tau lawh baly, Aron i kangpreang pathyp pi nai keung teng y chei hai ai nai tla.

³Pathyp pi nai keung my ang vawi ai cham nai khala, tlang muichi kaleung iy, ang vawi tamo aneng lawh baly, huni khumi teng y ka-jei awm nai nganpeih no man nai deaungkho y, nang ly chai y, nanai thui pi ai nai tla.

⁴Na i py huni ang vawi ly kaleung i py mui ly kaleung y, ang vawi tamo py aneng y lawh baly, pathyp pi nai keung ly huni khumi ai kani saryhrei khai takhra ai nai tla.

⁵Pathyp pi nai keung ly saryh kani y huni khumi ai khen bi nai khala, ang vawi ly kari awm nai, typra y, nanai niu baly huni khumi ai ly kani saryhrei khai takhra bi ai nai tla.

⁶Naibaly kani saryhrei kani y, huni khumi ai cham bi i, ang vawi ly jeinawm nai am-oh y iy, ang vawi rumrang teu nai deaungkho y, reita y chai bo, napi ai nai tla. Huni khumi ly my i ateaungchi pasiu pan chum baly, reita y chai ai.

⁷Na i py Pathyp pi nai keung my khen nai huni khumi i ang vawi ly chai bo, napi nai bo y ang vawi am-oh lawh baly, huni khumi ly pathyp pi nai keung teng y akhen hai bi ai nai tla.

⁸Pathyp pi nai keung my huni khumi i ang vawi khen pi nai khala, ang vawi ly angdaira nai niu lawh baly, huni ang vawi ly ka-jei awm nai nganpeih no ang vawi ne nai deaungkho y, huni khumi ai chai y, nanai thui pi ai nai tla.

⁹Nangchi theung i amimi py ka-jei awm nai nganpeih no man lawh baly, huni khumi ai pathyp pi nai keung teng y chei hai ai nai tla.

¹⁰Pathyp pi nai keung my ni ai khen pi nai khala, nganpeih salo y ang vawi kaleung nai hawi mui py kaleung iy, nai am-eng lawh baly,

¹¹huni ly ka-jei awm nai nganpeih no ang vawi ne. Pathyp pi nai keung ly huni khumi ai chai y napi ai nai tla. Ni teng y hawi y nai no-na man bo, nanai apany nai deaungkho y ni ai ly khai takhra ai nai aly by y.

¹²Ni i nganpeih no ly lu i ka-so kheu mang y khrairei kawibiu na lawh baly,

¹³pathyp pi nai keung my huni khumi ai, khen taleang bi ai nai tla. Ni i ang vawi ly tlang verei kawibiu nai niu baly, pathyp pi nai keung my nang ly reita y chai bo napi ai nai tla. Ni ly tlang verei kaleungbiu na baly reita y chai nai ne.

¹⁴Na i py huni khumi i ang vawi ly angdai tyh lawh baly ni ly chai y bo.

¹⁵Naibaly pathyp pi nai keung ly ni ai khen bi nai khala, tlang tleaung y ang vawi man nai niu baly, ni ai chai y napi ai nai tla. Angvawi man nai ly ka-jei awm nai nganpeih no ne, nanai amny nai y, ni ly chai y nai ne.

¹⁶Na i py ang vawi ly tha iy kaleung baly, ni ly pathyp pi nai keung teng y chei teang bi ai nai tla.

¹⁷Nimy nang ai cham teang bi ai nai ne. Huni ang vawi ly kangleung mang y amtlau ali baly nang ly reita y chai naira nga bo, nanai pathyp pi nai keung my ang thai hai ai.

¹⁸Nangchi theung i leaung leaungrei ly uisalu hawi veng iy satlangra y,

¹⁹kangleung eng-hup nai mo, ti y baly paleng rang naimy kangleung vah lawh baly, nang ly pathyp pi nai keung teng y chei hai ai nai tla.

²⁰Pathyp pi nai keung my no ang vawi khen pi nai khala, ang vawi ly aneng iy muichi kaleung nai niu lawh baly, huni khumi ai chai y napi ai nai tla. Huni ang vawi ly uisalura man nai ka-jei awm nai nganpeih no ang vawi ne.

²¹Na i py pathyp pi nai keung ly angvawi y khen i, muichi kaleung y, ang vawi py aneng kyh y, kaleungho nai niu lawh baly, huni khumi ai kani saryhrei khai takhra ai nai tla.

²²Angvawi tamo ampreng nai niu lawh baly, huni khumi teng y no-na man bo i, ni ai chai y napi ai nai tla.

²³Na i py huni ang vawi ly am-oh y naimy, kari kamta awm lawh baly, uisalu satlang teu; naibaly pathyp pi nai keung my huni khumi ai, reita leaungsai y chai bo, napi ai nai tla.

²⁴Nangchi theung i amimi py, mai my kang iy mai kang lawi nganpeih y kaleung nai mo, ti y baly paleng rang nai mo, awm lawh baly,

²⁵pathyp pi nai keung my khen cham ai nai tla. Huni angvawira i muichi ly kaleung iy aneng nai niu lawh baly, mai kang tamo y ka-jei awm nai nganpeih no lawm nai deaungkho y, pathyp pi nai keung ly huni khumi ai, chai y napi ai nai tla.

²⁶Na i py angvawira awm nai mui ly kaleung y, ang vawi py aneng y, kaleungho nai niu lawh baly, huni khumi ai kani saryhrei khai takhra ai nai tla.

²⁷Pathyp pi nai keung my saryhrei kani y ni ai khen taleang bi iy, ang vawi ly ampreng nai niu; huni ang vawi ly ka-jei awm nai nganpeih no ne lawh nai deaungkho y, huni khumi ai chai y napi ai nai tla.

²⁸Na i py huni ang vawi ly kari kamta awm iy, am-oh y nai py, kaleungho nai py niu lawh baly, huni ly ka-jei awm nai nganpeih no ny y; huni ang vawi ly mai kang lawi satlang teu deaungkho y, pathyp pi nai keung ly huni khumi ai, reita leaungsai y chai napi ai nai tla.

²⁹Nangchi theung y neampacho, ti y baly neampachy leaungrei i lu y mo, tengtabyh y mo ang vawi man lawh baly,

³⁰pathyp pi nai keung my huni ang vawi khen pi ai nai tla. Angvawi ly aneng iy muichi hapreaung nai kaleungho lawh baly, huni ly ka-jei awm nai nganpeih no ne nai deaungkho y, huni khumi ai chai y napi ai nai tla.

³¹Pathyp pi nai keung ly huni khumi ai khen nai khala, ang vawi aneng y i py ang vawi tamora i muichi ly kari kamta ny y jojo lawh baly, huni khumi ai kani saryhrei khai takhra ai nai tla.

³²Pathyp pi nai keung my saryhrei kani y, khen taleang bi i, huni ang vawi ly am-oh y, muichi py kadausa y, ang vawi py aneng y nai niu baly,

³³ang vawi teng ka-ki mui vau ai nai tla. Naibaly huni khumi ai kani saryhrei khai takhra bi ai nai tla.

³⁴Saryh kani y pathyp pi nai keung my ang vawi khen taleang bi nai khala, ang vawi ly am-oh y, aneng y, nanai niu baly huni khumi ai, reita leaungsai y chai bo napi ai nai tla. Huni khumi ly my i ateaungchi pasiu pan chum baly chai bo.

³⁵Na i py ni ai chai bo, napi chum nai bo y, ang vawi ly am-oh teang lawh baly,

³⁶pathyp pi nai keung ly huni khumi ai khen taleang bi ai nai tla. Angvawi am-oh teang nai niu baly mui kadausa mo, nanai khen ai nai aly by y; ati mana nai mo na baly ni ly chai y, nanai amny veng bo.

³⁷Na i py pathyp pi nai keung ly ang vawi am-oh y, mui panum nai kari niu iy, ang vawi tamo tha nai niu baly, huni khumi ai reita leaungsai y, chai bo napi ai nai tla.

³⁸Nangchi theung y neampacho, ti y baly neampachy i nganpeihra y kaleung lawp, kaleung lawp nai awm baly,

³⁹pathyp pi nai keung ly huni khumi ai khen ai nai tla. Angvawi kaleung hup-hau lawh baly, nganpeihra man thai nai buhuthi teu i, ni ly reita leaungsai y chai nai ne.

⁴⁰Neampacho, ti y baly neampachy i lu nithun mang i sam mo, mo mang i sam mo, amui lawh baly chai y, nanai tapi pajau y.

⁴¹

⁴²Na i py lu benglau naira y paleng rang nai ang vawi man lawh baly, huni ly ka-jei awm nai nganpeih no ang vawi ne.

⁴³Pathyp pi nai keung ly huni khumi ai khen pi nai khala, ang vawi ly paleng rang nai niu lawh baly,

⁴⁴pathyp pi nai keung my ni ai chai y napi ai nai tla. Ati mana nai mo na baly ni i lu tleaung y man nai ly, ka-jei awm nai nganpeih no ang vawi ne lawh nai deaungkho y ne.

⁴⁵Ka-jei awm nai nganpeih no man nai khumi ly baichu kamawn amchiu ai nai tla, sam py aseu y naimy khai ai nai tla; meimai ka-hyhrei amym iy, “Kai ly chai y, chai y!” nanai aeu ai nai tla.

⁴⁶Ni i tlang tleaung y huni no awm nai sala ryrei ly chai y nai deaungkho y khumichi hawi palo nai, tai naira angam mang y awm ai nai tla.

⁴⁷Beram mui ateaung, ti y baly kanih mai ka-syn ateaung mo,

⁴⁸beram mui kanih mo, ti y baly kanih mai ka-syn kanih nganra y mo, mawi peih, ti y baly mawi peih ateaungra y mo,

⁴⁹heng-a, ti y baly pasen jeaung nai kani-ei chawp lawh baly, kawibiu thai nai kani-eichi ne nai deaungkho y, huni ateaungchi ai pathyp pi nai keung teng y patei ai nai tla.

⁵⁰Naibaly pathyp pi nai keung ly khen iy huni ateaung ai ly kani saryhrei khai takhra ai nai tla.

⁵¹Ni ly saryhrei kani y khen bi nai khala, kani-ei chawp nai nawi ryhryh lawh baly, huni ateaung ly chai y nai ne.

⁵²Huni kani-ei chawp nai ly angpreng thai nai ne nai deaungkho y, pathyp pi nai keung my huni ateaung ai mai y veang vui ai tla.

⁵³Na i py pathyp pi nai keung ly huni ateaung ai khen nai khala, kani-ei chawp nai nawi y lawh baly,

⁵⁴huni ateaung pasiu hai iy kani saryhrei khai takhra bi ai nai tla.

⁵⁵Huni bo y pathyp pi nai keung ly huni ateaung ai khen bi ai nai tla. Kani-ei chawp nai nawira y i py, an akheng vui y lawh baly, huni ateaung ly chai y nai ne. Huni ateaung theung mang py, salo mang py pyn nai niu baly, huni ai mai leng vui ai nai tla.

⁵⁶Na i py pathyp pi nai keung my khen taleang bi nai khala, kani-ei chawp nai mawi tlu nai niu baly, ateaung, ti y baly mawipeih ateaungra i, kani-ei chawp nai ly sei lawp vui ai nai tla.

⁵⁷Naibaly kani-ei chawp nai nawira lawh baly, kani-ei nawira nai deaungkho y, yhmkeung ly huni ateaung mai veang vui ai nai tla.

⁵⁸Ni ly huni ateaung pasiu nai khala y, kani-ei chawp nai tama baly, pasiu taleang bi ai nai tla. Naibaly huni ateaung ly reita leaungsai y chai ai.

⁵⁹Hini reita ly beram mui ateaung, ti y baly kanih mai ka-synra mo, mawipeih ateaungchira mo, kani-ei chawp nai i vui reita ne.