Read Khumi Chin Levi 16 Bible Online

Levi 16 - Khumi Chin bible

Levi 16

¹Aron i chapo leaung nyhrei ly ARENG teng y chai y nai mai talam nai molam y dei hawi nai khala mymy ly Mosi teng y,

²“Nang i ngamjo Aron ly kanih ali hang nai theung mang Chai Keh nai Meingtym y khai pi yb nai neng khala naini, kun ai nai tla, nanai thui pi. Ati mana nai mo na baly Kai ly chai keh nai meingtym i Leu Maikawm Pawm khym salo i tamaira y amteng ai. Ni ly hini reita leu pei nai tangai y lawh baly dei ai.

³Ni ly kamngo pahen nai kapathypra i vui si katai beaungjeaung harei hawi leng patlum nai kapathypra i vui beram katai harei syn iy, Chai Keh nai Meingtym y kun ai nai tla,” napi.

⁴Naibaly ARENG my hini leuchi pei nai ne. Aron ly chai keh nai meingtymra kun y rai khala, ni ly tui ahiu pan iy pathyp pi nai keung ateaungchi napi nai, kanih mai ka-syn baichu kangjiu, phangphi, akeng akawmra hawi lupeuchi amthyp ai nai tla.

⁵Israela chengchi ly kamngo pahen nai kapathypra i vui mi-i katai nyhrei hawi, leng patlum nai kapathypra i vui beram katai harei, Aron teng y syn pi ai nai tla.

⁶Ni ly my i kamngo hawi mymy i yhm dengtheungchi i kamngo py pahen ai nai si katai talam ai nai tla.

⁷Naibaly ni ly mi-i katai nyhrei ai ARENG i awmra Tabynako katheu pa-kho mang y hawi ai nai tla.

⁸Hunira y ni ly lengseaung nyhrei syn iy harei nai ly “ARENG i vui” nanai hawi, harei nai ly “Azazel i vui”[1] nanai ka-ma-ra sa iy, mi-i nyhrei ai tambe va ai nai tla.

⁹Aron ly ARENG i vui tambe avah nai mi-i ai ly kamngo pahen nai kapathypra talam ai nai tla.

¹⁰Azazel i vui tambe avah nai mi-i kangheng ai ARENG teng y talam iy, khumichi i kamngo pho pi ai nai, daichi ka-vym mang y patlaw ai nai tla.

¹¹Aron ly my hawi mymy i yhm dengtheungchi i vui kamngo pahen nai kapathypra talam nai khala y,

¹²maicham tleaung i mai-aichi ai mai-ai kadeng nai laawm pangdaira kawi pa-rei khai chum baly, mui katui dei angso nyhrei la iy chai keh nai meingtym theung y kun ai nai tla.

¹³Naibaly ARENG i mo y mui katui ai mai-ai salo y phui ai nai tla; rimui mui katui maikhyh ly Leu Maikawm Pawm ai deng khyp vui i, ni ly khym ai niu pajau y nai deaungkho y heng ai.

¹⁴Ni ly si katai thi maidenrei la iy kiu pajeung hawi Leu Maikawm Pawm khymra y katheng ai nai tla; Leu Maikawm Pawm mo y py tlen saryhrei katheng ai nai tla.

¹⁵Huni bo y ni ly khumi mipuichi i kamngo i vui kamngo pahen nai kapathypra mi-i tleh iy, thi ly chai keh nai meingtym mang y syn ai nai tla. Si katai thi hawi katheng nai kamta, mi-i thi ai Leu Maikawm Pawm i khym salo y py, huni mo y py katheng ai nai tla.

¹⁶Huna nai kamta Aron ly Israela chengchi i chai y nai hawi, nichi i kamngo bawibawichi molam y, chai keh nai meingtym y kachai sa pi ai nai tla. Tabynako ly chai y nai tai naira umtang y awm nai y, Tabynako i vui kachai sa pi ai nai tla.

¹⁷Aron ly chai keh nai meingtym theung y kun iy, kachai sa nai hawi theu nai neng ryrei ly Tabynako theung y ami py awm ai nai tlo y. Ni ly my i vui hawi my i yhm dengtheung i vui py, khumi humpui verei i vui py, kachai sa chum nai khala y,

¹⁸ni ly leng patlum nai maicham mang y chei iy, huni maicham i vui kachai sa ai nai tla. Ni ly si thi hawi mi-i thi phyrei syn iy maicham taki kachawnchira tabei ai nai tla.

¹⁹Maicham salo y py kiupajeung hawi thi tlen saryhrei katheng ai nai tla. Hina nai kamta ni ly Israela khumichi kamngo nai molam maicham ai pachai chum baly, kachai sa ai nai tla.

²⁰Aron ly ARENG i awmra Tabynako chai keh nai meingtym hawi maicham i vui kachai sa chum nai khala, Azazel i vui tambe avah nai mi-i kangheng ai ly ARENG teng y talam ai nai tla.

²¹Ni ly mi-i lu tleaung y kiu phei nyhrei kheang iy, Israela chengchi i sa tamang nai kamngo hawi tiu nai ngiereichi molam y, huni kamngochi ai mi-i lu tleaung y tym hai nai ne. Naibaly kalop amsi nai keung ly huni mi-i ai daichi ka-vym mang y paryh vui ai nai tla.

²²Hina nai kamta mi-i ly khumi angso by y nai mang y, khumichi i kamngo ngiereichi pho pi ai.

²³Naibaly Aron ly Tabynako theung y kun iy, Chai Keh nai Meingtym mang y kun y rai khala, amthyp nai ateaungchi aleng iy hu y khai su ai nai tla.

²⁴Ni ly khai takhra nai meingtymra y tui ahiu iy, ateaungchi amthyp teang ai nai tla. Naibaly ni ly maicham mang y tapai iy, mymy i kamngo hawi Israela chengchi i kamngo nai molam, leng patlum nai kapathypra talam ai nai tla.

²⁵Ni ly maicham tleaung y kamngo pahen nai kapathypra tawnbawi thau leng patlum ai nai tla.

²⁶Daichi ka-vym mang y Azazel ai paryh nai keung ly mymy i ateaungchi pasiu iy tui ahiu pan chum baly, tai naira theung y kun teang ai nai tla.

²⁷Kamngo pahen nai katalamra tawnbawi si katai hawi mi-i katai ai ly Chai Keh nai Meingtym y syn chum baly, tawnbawi ngan, peih hawi takuta bawibawichi ai tai naira angam mang y tawn iy mai y patawi vui ai nai tla.

²⁸Hunichi ai patawi nai khumi ly mymy i ateaungchi pasiu iy, tui ahiu pan nai bo y tai naira theung y kun teang ai nai tla.

²⁹Nangchi ly hini reitachi ai nangmychi deungrei teaung patawm jojo ai nai tla. Saryh lo, kani horei kani y, Israela chengchi hawi nichi theung y awm nai cheng takhrachi py, biu hai iy atiti kalopchi sa ai nai avo y.

³⁰Huni kani y nichi ly reita leaungsai y chai ai nai kamngo pahen naira sa ai nai tla.

³¹Huni kani ly khri pa-rei chai nai kani ne; huni kani y mani mo kalop py sa ai nai avo y. Hini reita ai katu chanau deung khrairei teaung patawm jojo ai nai tla.

³²Ampo i meingtym y amtym ai nai tahm palyn chum nai pathyp pi nai keung kalen keh ly kachai leaungsai sa pi ai nai tla. Huni pathyp pi nai keung kalen keh ly pathyp pi nai keung ateaungchi amthyp iy,

³³Chai Keh nai Meingtym napi nai ARENG i awmra Tabynako, maicham, pathyp pi nai keungchi hawi Israela cheng bawibawichi i vui kachai sa pi ai nai tla.

³⁴Nangchi ly hini reitachi ai nangmychi deungrei teaung patawm jojo ai nai tla. Israela chengchi i sa tamang nai kamngo bawibawi lawira nga ai nai, hini reita ai sanengrei y tlenrei sa ai nai tla. Hunaibaly Mosi ly ARENG i leu pei nai kamta sa nai ne.