Read Khumi Chin Levi 18 Bible Online

Levi 18 - Khumi Chin bible

Levi 18

¹ARENG my Mosi teng y,

²Israela chengchi i vui leu pei nai ly “Kai ly nangchi i ARENG Tameuh ne.

³Nangchi awm vai nai Aikupta khumichi i sa reng nai saichi py, nangchi ai vai kaimy pahawi iy awm ai nai kanan pri khumichi i sa reng nai saichi py so u moh.

⁴Kai i leu pei naichi phai tangai u ly patawm u. Kai ly nangchi i ARENG Tameuh ne.

⁵Kai i reita hawi leu pei naichi phai patawm u; hunaibaly nangchi ly hengra nga u ai. Kai ly ARENG ne,” napi.

⁶ARENG ly hina nai kamta leu pei nai ne. Nangchi ly nangmychi i amjo amnau kasa nai hawi ta-pui ta-chi apho moh.

⁷Nangmy i amhm hawi ta-pui ta-chi apha nai molam y, ngampo ai kangji pei moh. Nangmy i amhm kypkyp ai py kangji pei moh.

⁸Ngampo i aju katheangchi hawi ta-pui ta-chi apha nai molam y, ngampo ai kangji pei moh, takhrachi hawi py pajang sa iy, ngampo ai tahm khai y nai so moh.

⁹Nangmy i tuicho kypkyp hawi mo, yhm vanrei, ti y baly yhm takhra awm iy tleaungri acheang nai ampo mang i tuicho lengsang, ti y baly amhm mang i tuicho lengsang hawi mo py, ta-pui tachi apho ngau y.

¹⁰Nang i katu neampachy hawi ta-pui ta-chi apho ngau y; huni ly nangmy ai kangji apei nai tla.

¹¹Ampo y vanrei, amhm y takhra nai tuicho ampro ly ta-pui ta-chi apho ngau y; huni py nangmy i tuicho ne teang.

¹²Ngampo i tuicho, ngamni, ti y baly ngamhm i amnau, ngamhmto hawi py ta-pui ta-chi apho ngau y.

¹⁴Ngampochy i aju, ngamhmto hawi py ta-pui ta-chi apho ngau y.

¹⁵Nangmy i lengngo hawi py ta-pui ta-chi apho ngau y.

¹⁶Nangmy i amjo amnau i aju hawi py ta-pui ta-chi apho ngau y.

¹⁷Nang hawi ta-pui ta-chi apha vai nai neampachy i chaniu, ti y baly katu neampachy hawi py ta-pui ta-chi apho ngau y. Huna nai sa lawh baly nichi ly nang hawi thi ngan ka-bi ne i, nang ly thi ngan ka-bi hawi tamang nai kamngo tla.

¹⁸Nangmy i aju heng nai ryrei ly nang i aju amnau ai nang i aju katheang palawn ai nai pom ngau y.

¹⁹Tlangchai awm nai neampachy ly reita leaungsai y chai y nai deaungkho y, tlangchai awm nai thym y nihawi ta-pui ta-chi apho ngau y.

²⁰Khumi takhra i aju hawi ta-pui ta-chi apho moh; huna nai sa lawh baly nang ly reita leaungsai y chai y nai ne.

²¹Nang i cho chanauchi ai Mole tameuh teng y leng patlum ai nai pei moh. Huna nai sa nai ly nangmy i ARENG Tameuh ai tahm khai y nai ne.

²²Neampacho tengtawi ta-pui ta-chi apho ngau y. Tameuh ly huna nai sa nai ai paso nai ne.

²³Neampacho py, ti y baly neampachy py, tawnbawi hawi ly apajang moh; huna nai sa nai ly khumi i reita ny y nai deaungkho y, reita leaungsai my nang ai amso ngai hai nai ne.

²⁴Nangchi ly huna naichi sa iy nangmychi ai chai hai y ai nai so moh. Nangchi awm ai nai pri i Kai, ARENG my patheu ai nai chengchi ly huna nai chai y naichi sa iy mymychi ai chai hai y bo.

²⁵Nichi i sa nai kalopchi ly mychi i awm nai pri y chai hai y nai ne; hunai deaungkho y ARENG ly huni pri ai pajeng iy, huni khumichi ai patheu vui ai.

²⁶Nichi ly huni amso ngai naichi sa i, hini pri y chai hai y nai ne; na i py nangchi ly hunai kamta so u moh. Israela cheng mo, nangchi hawi vanrei awm nai cheng takhra mo, nangchi bawibawi ly ARENG i reita hawi leu pei naichi sa patawm u ai nai tla.

²⁸Hunaibaly nangchi by y rai khala i khumichi kamta, nangchi ai huni pri i nai ang patheu vui ai ny y.

²⁹Huna nai amso ngai nairachi sa nai khumi ai ly Tameuh i khumichi theung i nai nyn va vui reng nai py, nangchi pany u nai ne.

³⁰Naibaly ARENG my, “Kai i kang pei nai leu phai tangai u; nangchi ny y rai khala i huni pri y awm nai khumichi i sa nai kamta amtiu u moh. Nangchi ly huna naichi sa nai molam y, nangmychi ai chai hai y ai nai aso u moh. Kai ly nangchi i ARENG Tameuh ne,” napi.