Read Khumi Chin Levi 2 Bible Online

Levi 2 - Khumi Chin bible

Levi 2

¹Amimi py ARENG teng y teicha teinei talam ai nai ngai baly, tako dei talam ai nai tla. Huni tako deira y olive asitui hawi miu katui leih iy;

²Aron i chapo pathyp pi nai keungchi teng y syn pi ai nai tla. Kalop amsi nai pathyp pi nai keung ly tako dei angsorei, asitui hawi mui kahawichi syn iy, maicham salo y leng patlum ai nai tla. Huna nai kapathyp ly ARENG ai pany jo nai katalamra ne. Hini talam nai mui kahawi ai ly ARENG my kawn pi nai ne.

³Teicha teinei talam nai kamlai ly pathyp pi nai keungchi i vui ne; huni teicha teinei ly ARENG teng y talam chum nai teicha teinei ne nai deaungkho y khri pa-rei chai i, pathyp pi nai keungchi naini cha pajau khyh nai ne.

⁴Takeang tleaung y paawp nai tako hawi talam ai na baly, takora y angbo abawi ai nai tlo y; tako dei hawi olive asitui katlen iy sa nai tako phi katho py ne sy, olive asitui hawi kaleu nai tako phi kangpo py ne sy, talam pajau.

⁵Tamo laawm pangdaira taheang nai tako talam ai na baly, huni tako ly angbo abawi y nai tako deira y olive asitui katlen nai tako dei ne ai nai tla.

⁶Huni tako talam nai khala tako kanawi piu iy, huni ka-kora asitui leih ai nai tla.

⁷Laawmra taheang nai tako hawi talam ai na baly, olive asitui hawi katlen nai tako dei hawi sa ai nai tla.

⁸Huni katalamra ai ARENG teng y talam ai na baly, pathyp pi nai keung teng y au ai nai tla.

⁹Pathyp pi nai keung ly huni katalamra ai maicham mang y syn iy tako bawibawichi ai ARENG teng y talam ai nai molam, tako maidenrei la iy, maicham salo y leng patlum ai nai tla. Huni talam nai mui kahawi ai ly ARENG my kawn pi nai ne.

¹⁰Tako talam nai kamlai ly pathyp pi nai keungchi i vui ne; huni tako ly ARENG teng y talam chum nai tako ne nai deaungkho y, khri pa-rei chai nai ne.

¹¹ARENG teng y nangchi talam nai teicha teinei ngiereichi ly angbo abawi ai nai tlo y; ARENG teng y talam nai teicha teineira y, mana khala py angbo, ti y baly khawi hang abawi ai nai avo y.

¹²Nangchi saneng tleirei pakym achu nai amti amjang chaluchi ly ARENG teng y talam ai nai tla. Na i py huni ai maichamra leng patlum ai nai tlo y.

¹³Palawi ly nangchi hawi Tameuh sala y Leu Maikawm ka-ma-ra ne nai deaungkho y, teicha teinei talam nai tleirei palawi thiu ai nai tla. (Nangchi i talam nai kapathypra tleirei y palawi thiu ai nai tla.)

¹⁴Nangchi ly tyn manme nai amti amjangchi ai ARENG teng y talam nai khala chohnei taheang nai, ti y baly angjen talam ai nai tla.

¹⁵Hunira y olive asitui hawi mui kahawi tabawi ai nai tla.

¹⁶Pathyp pi nai keung ly chohnei hawi asitui jeng y, angjen hawi asitui maidenreichy la iy, mui katui ngierei hawi ARENG i vui leng patlum ai nai ne.