Read Khumi Chin Levi 20 Bible Online

Levi 20 - Khumi Chin bible

Levi 20

¹ARENG my Mosi teng y

²Israela khumichi teng y amti pi ai nai leu pei nai ly “Nangchi theung i mo, ti y baly nangchi theung y awm nai cheng takhrachi theung i mo, leaung leaungrei my mymy i cho chanau ai Mole tameuh teng y leng patlum ai nai talam lawh baly, cheng vereichi my ni ai lengseaung hawi aphi ka ai nai tla.

³Ami mi py my i cho chanau ai Mole tameuh teng chiu ai nai pei nai molam y, kai i Tabynako ai chai hai y iy kai i amyn thui tamawn lawh baly, kai ly ni ai meimai hi pi vui iy kai i khumichi theung i nai nyn va vui ai.

⁴Na i py khumi humpui my ni ai bawi lo pi y iy padei y lawh baly,

⁵ni hawi ni i yhm dengtheungchi ai py, huni khumi kamta kai ai ka-awi sa iy Mole tameuh ai chiu nai ngiereichi ai py, kai ly meimai hi vui iy kai i khumichi theung i nai nyn va vui ai.

⁶“Kadeichi i phailo hawi leu arum nai khumichi teng y tau hnei nai khumi ai, kai ly meimai hi vui iy kai i khumichi theung i nai nyn va vui ai.

⁷Kai ly nangchi i ARENG ne nai deaungkho y, nangchi ly chai u ai nai tla.

⁸Kai i reita leu pei naichi tangai u; ati mana nai mo na baly Kai ly nangchi ai chai hai nai ARENG ne,” napi.

⁹ARENG ly hini reitachi khai pi bo; amy i amhm ampo ai pasawi nai khumi ai ly padei ai nai tla; amhm ampo ai pasawi nai deaungkho y dei ai ataing nai ne.

¹⁰Khumi neampacho leaungrei ly Israela cheng tengtawi i aju hawi tamang lawh baly, nini leaung nyhrei ai padei mei ai nai tla.

¹¹Ampo i aju leaung leaungrei hawi tamang nai khumi ly my i ampo ai kangji pei nai ne i, nini leaung nyhrei ai padei mei ai nai tla. Nini ly dei ai ataing nai kamngo sa hawi nai ne.

¹²Khumi neampacho leaungrei ly my i lengngo hawi tamang lawh baly, nini leaung nyhrei ai padei mei ai nai tla. Nini ly thi ngan ka-bi tengtawi tamang lawh nai deaungkho y, nini ly dei ai ataing nai ne.

¹³Neampacho tengtawi ta-pui ta-chi apha nai ly amso ngai naira sahawi nai ne i, nini leaung nyhrei ai padei mei ai nai tla. Nini ly dei ai ataing nai kamngo sahawi nai ne.

¹⁴Khumi neampacho leaungrei ly chaniu hawi amhm ai aju palawn mei lawh baly, kaji ai hawi nai deaungkho y nichi leaung thomrei ai mai y leng iy padei ai nai tla.

¹⁵Khumi neampacho leaungrei ly tawnbawi hawi apajang lawh baly, huni khumi hawi vanrei tawnbawi ai py padei mei ai nai tla.

¹⁶Neampachy leaungrei ly tawnbawi hawi apajang lawh baly, huni neampachy hawi vanrei tawnbawi ai py padei mei ai nai tla. Nini ly dei ai ataing nai kamngo sahawi nai ne.

¹⁷Khumi neampacho leaungrei ly my i tuicho kypkyp, ny y baly ampo vanrei, amhm takhra nai tuicho ai pom lawh baly, nini leaung nyhrei ai khumi mipuichi mo y kangji pei iy, Israela chengchi theung i nai nyn va vui ai nai tla. Ni ly tuicho hawi ta-pui ta-chi apha nai deaungkho y, kamngo pajeng ai nai tla.

¹⁸Khumi neampacho leaungrei ly tlangchai tym nai neampachy hawi ta-pui ta-chi apha lawh baly, nini leaung nyhrei ly kachai sa nai reita ai taphra nai deaungkho y Israela chengchi theung i nai nyn va vui ai nai tla.

¹⁹Khumi neampacho leaungrei ly amni hawi ta-pui ta-chi apha lawh baly, thi ngan ka-bi tengtawi tamang nai ne i, nini leaung nyhrei ai pajeng mei ai nai tla.

²⁰Khumi neampacho leaungrei ly my i ampomo, ti y baly ampochy i aju hawi ta-pui ta-chi apha lawh baly, ni ly ampomo, ti y baly ampochy ai kangji pei nai deaungkho y, nini ai ly kamngo pajeng ai nai tla; nini ly cho chanau ngo y ai.

²¹Khumi neampacho leaungrei ly amjo amnau i aju ai pom lawh baly, nini ly cho chanau so y naimy dei hawi ai. Ni ly reita leaungsai y chai y naira sa lawh nai deaungkho y, my i amjo amnau ai kangji pei nai ne.

²²Naibaly ARENG my, “Kaimy pahawi iy nangchi tym u ai nai Kanan pri i dengdairei, nangchi ai patheu y ai nai kai i reitachi hawi leu kang pei nai bawibawichi patawm u ai nai tla.

²³Huni pri y awm nai khumichi i reita kamta so u moh; huni pri y nangchi kun u pajau ai nai molam y, kai ly huni pri i khumichi ai patheu pawn ai. Kai ly nichi i hawi y nai reitachi ai kapaso nai ne.

²⁴Na i py teicha teinei avaw y iy pa-tiu khuta hawi nai, huni pri nangchi amtym ai nai kang pei ai, nanai adeu nai kamta kai ly sa pi ai. Kai ly nangchi i ARENG Tameuh ne iy, nangchi ly khumi takhrachi hawi atawm y, kaimy vawi takhra nai khumichi ne.

²⁵Hunai deaungkho y nangchi ly reita y cha ngau nai tawnbawi hawi tavo, cho ngau y nai tawnbawi hawi tavochi ai hawihai palai khawilang thai ai nai tla. Chai y nai tawnbawi hawi tavochi ly cho u moh. Kai ly hunichi ai chai y, nanai palawn nai deaungkho y huni heng nai amjychi ai cha lawh baly, nangchi ly chai y ai.

²⁶Kai ly ARENG ne iy chai nai deaungkho y nangchi py chai ai nai tla. Nangchi ly kaimy vawi nai kai i khumichi ne. Kai naini nangchi ai kang peang ai nai, nangchi ai khumi cheng cheaungkhangchi theung i nai kaimy vawi takhra nai bo.

²⁷“Khumi kadeichi i phailo hawi leu arum nai neampacho ai py, neampachy ai py, lengseaung hawi aphi ka ai nai tla; ni ly dei ai ataing nai kamngo sa nai ne,” napi.