Read Khumi Chin Levi 21 Bible Online

Levi 21 - Khumi Chin bible

Levi 21

¹ARENG my Mosi dengdairei Aron i kangpreang pathyp pi nai keungchi teng y leu pei nai ly, “Pathyp pi nai keung ly my i amhm ampo, cho chanau,

²amjo amnau, mymy hawi vanrei awm iy deaung nang y rai nai tuichochi ny y naimy,

³takhra amjo amnau lengsangchi i si keung y abawi lawh baly, reita leaungsai y amymy ai chai hai y nai ne.

⁴Ni ly my i aju mang i amjo amnau si keung abawi iy amymy ai chai hai y ai nai so moh.

⁵Pathyp pi nai keung ly dei nai khumi i vui y paleung si nai ka-ma-ra sam vau ai nai avo y; labeaung mui py atakip moh, amy i tlang ai py a-oh moh.

⁶Ni ly kachai awm ai nai tla; kai i amyn thui tamawn moh. Ni ly kai teng y teicha teinei katalamrachi talam pi nai keung ne i, chai ai nai tla.

⁷Ni ly kachai ne nai deaungkho y neampachy kamleaung ai mo, anglo mo phra nai neampachy ai mo, juvo ka-khai neampachy ai mo, pom ngau y.

⁸Ni ly kai teng y teicha teinei kapathyprachi talam pi nai keung ne nai deaungkho y, khumichi ly ni ai khumi kachai, nanai palawn ai nai tla. Kai ly ARENG ne. Kai ly kachai ne i, kaimy i khumichi ai py chai hai nai ne.

⁹Pathyp pi nai keung i chaniu ly bima kalop sa lawh baly, my i ampo ai kangji pei nai ne i, ni ai ly mai leng iy padei ai nai tla.

¹⁰“Pathyp pi nai keung kalen keh ly lu tleaung y asitui leih iy tahm palyn nai hawi pathyp pi nai keung ateaungchi amthyp nai keung ne nai deaungkho y, paleung si nai sai sam aseu y naimy awm moh; amy i baichuchi py sei moh.

¹¹Ni ly kai teng y aau patyp nai khumi ne i, reita leaungsai y amymy ai chai hai y ai nai so moh sy; kai i Tabynako dengdairei theu iy, mani si keung y py chei ngau y. Amhm ampo kypkyp dei nai yhm y malawn py chei ai nai avo y. Hina nai Tabynako dengdairei theu iy si keung y chei nai molam, kai i Tabynako ai chai hai y naichi so ngau y.

¹³Ni ly anglo lengmyn hawi apom ai nai tla.

¹⁴Yhmreng nu, juvo ka-khai, bimanuchi hawi apom ngau y. Ni ly mymy i cheng theung i anglo lengmyn hawi naini apom ai nai tla.

¹⁵Hina nai kamta so y lawh baly ni i cho chanau ly chai ai nai avo teu i py, reita y chai y naichi lawm u ai. Kai, ARENG ly ni ai Pathyp pi nai Keung Kalen keh y khai takhra nai bo,” napi.

¹⁶ARENG my Mosi dengdairei

¹⁷Aron teng y amti pi ai nai leu pei nai ly “Nang i kangpreangchi theung i, tleungtlang jy nai khumi ly kai teng y teicha teinei kapathyprachi talam ngau y. Hini reita leu pei nai teaung patawm jojo ai nai tla.

¹⁸Mei paju nai khumi, kheu jy nai khumi, meimai cha si nai khumi, mo-cha akhum nai khumi,

¹⁹kiu kheu jy nai khumi,

²⁰nithun anam pukiu nai khumi, dawipeu nai khumi, mei no man nai khumi, nganpeih no awm nai khumi hawi tli chum nai khumichi ly kai teng y kapathypra talam ngau y.

²¹Aron i kangpreang theung i tleungtlang ha harei jy nai pathyp pi nai keung ly kai teng y kapathypra talam ai nai avo y.

²²Huna nai pathyp pi nai keung ly kai teng y talam nai kapathypra kachai mo py, chai keh nai kapathypra mo py cha pajau nai ne;

²³Na i py ni ly tleungtlang jy nai khumi ne i, kanih ali jang nai sahawi y mo, maicham sahawi y mo, ahai ngau y. Kai ly ARENG ne; kai ly huni kanih ali jang nai hawi maichamchi ai chai hai nai deaungkho y, ni ly hunichi ai amso ngai hai ai nai avo y,” napi.

²⁴Mosi ly Aron hawi vanrei ni i chapochi, Israela cheng bawibawichi teng y amti pi nai reita leu pei naichi ly hunichi ne.