Read Khumi Chin Levi 22 Bible Online

Levi 22 - Khumi Chin bible

Levi 22

¹ARENG my Mosi dengdairei

²Aron hawi ni i chapochi teng y amti pi ai nai leu pei nai ly “Nangchi ly kai i amyn kachai ai thui tamawn y ai nai, Israela khumichi i kai teng y kapathypra talam nai ly tahm ai nai tla. Kai ly ARENG ne.

³Nang i kangpreangchi theung i ami py, reita leaungsai y chai y nai khumi ly Israela chengchi my kai teng y talam nai kapathyprachi sahawi y ahai lawh baly, ni ly maichamra kalop sa bi ai nai ngo y ai. Hini reita leu pei nai nangchi patawm jojo ai nai tla. Kai ly ARENG ne.

⁴“Aron kangpreangchi theung i ami py ka-jei awm nai nganpeih no man nai khumi mo, ang vawi hawi y nai man nai khumi mo, reita leaungsai y kachai ngo y rai khala, kai teng y talam nai kapathyprachi cho ngau y. Pathyp pi nai keung ly khumi tlaiveu ai abi iy chai y nai ngiereichi ai nam lawh nai py, taheaung tui ju nai py,

⁵chai y nai tawnbawi, ti y baly khumi ai nam lawh nai py, chai y nai lawm ai.

⁶Huna nai pathyp pi nai keung ly dym mang y khrairei chai y ai. Ni ly tui ahiu chum khala naini kai teng y talam nai kapathyprachi cha ai nai nga ai.

⁷Kani dym baly ni ly chai bo; naibaly ni ly katalamra teicha teineichi cha pajau nai ne.

⁸Ni ly dei kari y dei nai tawnbawi, ti y baly mawi kasi my kei iy dei nai tawnbawi mawi cha ai nai avo y; huna nai cha lawh baly ni ly chai y bo. Kai ly ARENG ne.

⁹Pathyp pi nai keung bawibawichi ly kai i reita leu pei naichi teaung patawm ai nai tla. Huna nai so y baly nichi ly kamngo tla ai i dei u ai; ati mana nai mo nabaly nichi ly reitachi taphra nai deaungkho y ne. Kai ly ARENG ne i, hunichi ai chai hai bo.

¹⁰“Pathyp pi nai keung i yhm dengtheung y abawi nai khumi naini katalamra kachai cha pajau khyh nai ne; pathyp pi nai keung hawi vanrei awm nai khumi hawi, ka-tham khumichi ly huni katalamra cho ngau y.

¹¹Na i py pathyp pi nai keung mymy i van nai miseaung, ti y baly my i yhm y tapen nai miseaung ly pathyp pi nai keung i nga nai phy teicha teinei cha pajau nai ne.

¹²Pathyp pi nai keung i chaniu ly pathyp pi nai keung ny y nai khumi leaung leaungrei hawi apom baly, ni ly katalamra kachai cho ngau y.

¹³Na i py pathyp pi nai keung i chaniu ly juvo dei nai mo, ti y baly juvo hawi akhai nai mo, cho chanau so y nai deaungkho y ampo i yhm y ali nai ne baly, ampo i phy nga nai teicha teineichi cha pajau. Pathyp pi nai keung i yhm dengtheungchi naini hunichi cha pajau khyh nai ne.

¹⁴“Pathyp pi nai keung yhm dengtheung y abawi y nai khumi ly athang khai y naimy kachai talam nai cha lawh baly, ni ly pathyp pi nai keung teng y huni teicha teinei van bo y, chumphy apomrei peh ai nai tla.

¹⁵Pathyp pi nai keungchi ly kapathypra kachai cho ngau y nai khumi ai cha hai nai molam y

¹⁶huni katalamra ai chai hai y nai so moh. Huni katalamra cho ngau y nai khumi cha lawh baly, kamngo sa nai ne i pajeng naira avum ai. Kai ly ARENG ne i, huni katalamrachi ai chai hai nai ne,” napi.

¹⁷ARENG my Mosi dengdairei

¹⁸Aron hawi ni i chapochi hawi, Israela khumi bawibawichi teng y hini reitachi pei pi nai ne. Israela cheng mo, Israela pri y awm nai cheng takhra mo, vaineng abeu nai kamta py ne sy, paleung kangai mo py ne sy, leng patlum nai kapathypra talam nai khala tawnbawi ly no-na awm ai nai tlo y.

¹⁹No-na by y nai tawnbawi katai ai naini, kai ly kawn pi nai ne.

²⁰Nangchi ly no-na awm nai tawnbawi talam lawh baly, ARENG ly kawn pi ai ny y.

²¹Ami mo ly ARENG teng y leunghawi kapathypra talam nai khala, vaineng abeu iy talam nai py ne sy, paleung kangai y talam nai py ne sy, kaimy kawn pi ai nai tawnbawi ly no-na by y ai nai tla.

²²ARENG teng y, mei paju nai tawnbawi, kiu kheu tabai nai tawnbawi, nai jui nai ang vawi awm nai tawnbawi, nganpeihra kamtha hawi phran awm nai tawnbawichi ai maicham tleaung y leng patlum ai nai avo y.

²³Dawipeu nai tawnbawi, ti y baly mo-cha amny amcha y nai tawnbawichi ai amy i paleung kangai talam pajau lawh teu i py, vaineng ka-deu hawi talam nai kapathypra ly talam ai nai avo y.

²⁴ARENG teng y talam ngau y nai tawnbawichi ly janghm thip piu nai, takip vui nai, tamo nga nai, tamawi aseih piu nai tawnbawichi ne; nangchi i pri y huna nai tawnbawichi talam ngau y.

²⁵Cheng takhra khumi teng i nga nai tawnbawi py, kapathypra palawn iy talam ai nai avo y. Huna nai tawnbawi ly no-na awm, nanai palawn ai i, talam ngau y.

²⁶Si, beram, mi-i chochi ai amhm hawi kani saryhrei awm hai chum kha naini, kapathypra y talam pajau.

²⁸Si nu hawi si cho ai mo, beram cho hawi nu ai mo, mi-i nu hawi cho ai mo, kani khurei talam ngau y.

²⁹Nangchi ly ARENG teng y kawn nai kapathypra talam nai khala, reita leu pei nai kamta sa baly kawn pi ai.

³⁰Kapathypra mawi ly kani khurei y my cha be ai nai tla; khawn mang khrairei kamlai awm ai nai tlo y.

³¹ARENG my, “Kai i leu pei naichi tangai u; kai ly ARENG ne.

³²Kai i amyn kachai ai thui tamawn moh; kai ly kachai ne, nanai Israela khumi bawibawichi my pany u ai nai tla. Kai ARENG ly nangchi ai chai hai bo.

³³Kai ly nangchi i Tameuh kalawn ai nai, nangchi ai Aikupta pri i dengdairei kang pahawi bo; kai ly ARENG ne,” napi.