Read Khumi Chin Levi 23 Bible Online

Levi 23 - Khumi Chin bible

Levi 23

¹ARENG my Mosi teng y,

²Israela chengchi i chiu sa achu nai pawichi molam y leu pei naichi ly hinichi ne.

³Nangchi ly kani tariurei sala y kalop sa iy, saryh kani ly Anawn kani ne i, anawn ai nai tla. Huni kani y kalop so y naimy chiu sa achu ai nai tla. Nangchi awm nai mani meingtym y py ne sy, Anawn kani ly ARENG i vui ne.

⁴Pawichi sa ai nai khai pi yb nai neng khala sa ai nai satang thai hai ba.

⁵Katlen vui nai Pawi ly ARENG ai tahm khai nai pawi ne i, angchei i lo kani holai palyhrei kani, kani avah nai khala sa amteaung ai nai tla.

⁶Kani holai pangrei kani ly tako angbo abawi y nai Pawi amteaung nai ne i, nangchi ly kani saryhrei sala y angbo abawi nai tako cha ai nai tlo y.

⁷Pawi amteaung angchei nai kani y nangchi ly chiu sa achu ai nai tla. Kajeu ka-rei i vui kalop sa ai nai avo y.

⁸Kani saryh ryrei ARENG teng y teicha teinei kapathyprachi talam ai nai tla. Na i py saryh kani y ly kajeu ka-rei i vui kalop sa ai nai tlo y, chiu sa achu u ai nai tla.

⁹Nangchi ly ARENG my pei nai pri y tym u iy choh tyn nai khala, tyn angchei nai chohleng ly pathyp pi nai keung teng y syn pi ai nai tla.

¹¹Nangchi ly ARENG i paleung kangai hawi avum pajau ai nai pathyp pi nai keung ly huni chohleng talam pi patyp ai nai tla. Pathyp pi nai keung ly huni katalamra ai Anawn kani bo i kani y talam ai tla.

¹²Teicha teinei talam nai kani y no-na by y iy sanengrei awm khyh nai beram kataichy ai py, leng patlum nai kapathypra talam ai nai tla.

¹³Huni leng patlum nai kapathypra hawi vanrei, olive asitui katlen nai tako dei sie pangrei ai teicha teinei kapathypra palawn iy talam ai nai tla. Hini talam nai mui kahawi ai ARENG ly kawn pi nai ne. Huni kapathypra hawi vanrei, kreip hang palangrei talam ai nai tla.

¹⁴Tameuh teng y talam man y naimy changtha mo, tako taheang nai mo, tako paawp nai mo, cha ai nai avo y. Hini reita ly nangchi i katu chanauchi khrairei sa patawm jojo ai nai tla.

¹⁵Anawn kani bo i kani pa-nyh ARENG teng y chohleng talam nai kani dengdairei, kani 49 rei kati ai nai tla.

¹⁶Anawn kani tlen saryhrei bo i kani pa-nyh, kani 50 rei kani y ARENG teng y changtha talam bi ai nai tla.

¹⁷Yhm dengtheung tleirei tako phi nyhrei syn iy ARENG teng y talam patyp ai nai tla. Huna nai talam naira y tako ha harei ai angbo katlen nai tako dei pound palyhrei paawp iy, angchei i chohleng talam nai ly ARENG teng y talam ai nai tla.

¹⁸Nangchi saleaung deaungpa ly huni katalamra hawi vanrei no-na by y nai sanengrei awm khyh nai beram cho saryhrei, si katai harei hawi beram katai nyhreichi talam ai nai tla. Huni tawnbawichi ai leng patlum nai khala, teicha teinei katalamra hawi kreip hang katalamrachi py ARENG teng y talam ai nai tla. Huni katalamra i mui kahawi ai ly ARENG my kawn pi nai ne.

¹⁹Huni bo y kamngo pahen nai kapathypra mi-i katai harei ai py, leunghawi kapathypra y sanengrei awm khyh nai beram katai nyhrei ai py talam ai nai tla.

²⁰Pathyp pi nai keung ly tako hawi beram cho nyhrei ai pathyp pi nai keungchi i vui ARENG teng y talam patyp ai nai tla. Huni katalamra ly kachai ne.

²¹Huni kani y kajeu ka-rei i vui kalop so y naimy, chiu sa achu ai nai tla. Nangchi i kangpreangchi ly mani meingtym y awm i py, hini reita leu pei nai teaung patawm jojo ai nai tla.

²²Nangchi choh tyn nai khala li ampheaung teng ka-ki chohchi tyn u moh; tyn bawi y nai chohvuichi ai tyn ali bi moh. Huni chohvui kamlaichi ly khumi kamawnchi hawi cheng takhra khumichi i vui pahai pi ai nai tla. ARENG ly nangchi i Tameuh ne.

²³Saryh lo i angchei i kani ly amdaw patyp ai nai kani palawn ai nai tla. Huni kani y baw eng nai katyn thai baly, chiu sa ai nai jeu achu ai nai tla.

²⁵ARENG teng y teicha teinei kapathypra talam u; kajeu ka-rei i vui kalop so u moh.

²⁶ Saneng tleirei saryh lo i kani horei kani y khumi bawibawichi ly kamngo pahen nai neng alyp nai reita pawi sa ai nai tla. Huni kani y teicha teinei ati sai py cha ai nai avo y; chiu sa ai nai akachu iy, ARENG teng y teicha teinei kapathypra talam ai nai tla.

²⁸Huni kani ly kamngo pahen nai chiu sa nai kani ne i, kalop sa ai nai avo y.

²⁹Huni kani y teicha teinei sai sairei cha nai khumi ai ly Tameuh i khumichi theung i nai nyn va vui ai.

³⁰Huni kani y kalop sa nai khumi ai ly ARENG my padei takengkei ai.

³¹Nang i kangpreangchi ly mani meingtym y mo awm i py, hini reita leu pei nai patawm jojo ai tla.

³²Huni lo kani takawrei dym, kani avah nai dengdai kani horei dym kani avah nai ryrei ly amdaw nai kani khai patyp ai nai tla. Huni kani y teicha teinei ati sai py cho u moh.

³³Taichy pawi ly saryh lo, kani holai pangrei kani dengdai kani saryh tym pa-rei sa nai pawi ne.

³⁵Pawi sa nai angchei kani y kajeu ka-rei i vui kalop so u y naimy, chiu sa achu u ai nai tla.

³⁶Kani saryhrei sala kani tleirei teicha teinei kapathyprachi talam ai nai tla. Kani tajarei kani y chiu sa achu u bi iy, teicha teinei kapathyprachi talam u bi ai nai tla. Huni kani ly chiu sa achu nai kani ne i, kalop sa ai nai avo y.

³⁷(Hini reita pawichira y ARENG i nang parai nai ai palo ai nai nangchi ly chiu sa achu nai hawi leng patlum nai katalamra, teicha teinei katalamra, kreip hang katalamrachi, khai takhra nai kani tleirei talam u ai nai tla.

³⁸Hini pawichi ly sa reng nai Anawn kanichi bo y py, sa ai nai pawichi ne. Hini katalamrachi ly nangchi my ARENG teng talam reng nai, vaineng abeu nai molam y talam nai, paleung kangai talam nai bo y kapathypra talam naichi ne.)

³⁹Nangchi chohboleh nai khala Taichy pawi ai saryh lo i kani holai pangrei kani dengdai kani saryh tym pa-rei pawi sa ai nai tla. Pawi angchei kani y amdaw nai kani khai patyp ai nai tla.

⁴⁰Huni kani y hawi keh nai thengthaichi, chamleaung keung changpichi, ngam awm meng nai changpichi la iy ARENG Tameuh i nang parai nai ai palo nai pawi sa amteaung ai nai tla.

⁴¹Huni pawi ly kani saryh ryrei sa ai nai tla. Nangchi i kangpreangchi ly hini reita pawi teaung patawm jojo ai nai tla.

⁴²Israela khumi bawibawichi ly kani saryh ryrei taichi theung y awm u ai nai tla.

⁴³ARENG ly Israela chengchi ai Aikupta pri i dengdairei ang pahawi nai khala y, taichychi theung y awm hai, nanai nangchi i kangpreangchi ai pany hai nai ne. Mymy ly nangchi i ARENG Tameuh ne.

⁴⁴Hunaibaly Mosi ly hina nai kamta ARENG i nang parai nai ai palo nai pawichi molam reitachi, Israela chengchi teng y pei pi bo.