Read Khumi Chin Levi 24 Bible Online

Levi 24 - Khumi Chin bible

Levi 24

¹ARENG ly Mosi i dengdairei

²Israela chengchi teng y hina nai kamta leu pei bo. Tabynako theung i maisi kateangra mai avawrei thawn jo thai ai nai, hawi keh nai olive asitui jeu hai u.

³Aron ly Tabynako theung i chai keh nai meingtymra y awm nai Leu Maikawm Pawm mo i kanih ali jang nai angam mang y maisi kateang ai dym tleirei thawn jo ai nai tla. Huni maisi kateang ly ARENG i mo y dym mang dengdai khawn mang y khrairei, angvang jo ai nai tla. Nangchi ly hini Reita leu pei nai ai patawm jojo ai nai tla.

⁴Aron ly muku masi kateangra i maisi yhmchi ai kry iy, ARENG i mo y angvang hai jojo nai tla.

⁵Tako dei sie apom phai saryhrei hawi tako phi 12 rei paawp ai nai tla.

⁶ARENG i mo y awm nai muku tangcheng hawi sa nai sabawi salo y, lam harei y tako phi tariurei, lam nyhrei pajyn ai nai tla.

⁷ARENG teng talam nai ka-ma-ra y tako phi pajyn nai lam hareira y rimui kahawi tangcheng khai ai nai tla.

⁸Anawn kani tleirei ARENG i mo y tako talam ai nai tla.

⁹Hini ly Israela chengchi sa patawm jojo ai nai kalop ne. Hini takochi ly Aron hawi ni i katu chanauchi cha ai nai kavui ne. Pathyp pi nai keungchi i vui ARENG teng y talam nai tako ne nai deaungkho y chai keh nai ne i, nichi ly hini tako ai meingtym kachaira cha ai nai tla.

¹⁰Israela chengchi i taira y Aikupta neampacho ampo hawi Israela cheng amhm nini i tapen nai leaungrei awm; amhm ly Dan cheng theaung theung i Dibri i chaniu Shelomith ne. Huni Aikupta neampachy ly tai theung y Israela cheng neampacho leaungrei hawi ajo ani nai thym khala, ARENG i amyn y pasawi nai ne. Naibaly ni ai Mosi teng y hawi u i,

¹²ni ai paeung vui iy ni i molam y ARENG my ati mana leu pei na mo, nanai ajeng u bo.

¹³ARENG my Mosi teng y,

¹⁴“Huni khumi ai tai angam mang y patheu; ni i pasawi nai ai thai nai khumi lutengchi ly ni i lu tleaung y kiu kheang u iy, kaichi thai, nanai pany hai ai nai tla. Naibaly Israela cheng bawibawichi my, ni ai lengseaung hawi aphi ka ai nai tla.

¹⁵Khumi ami py Tameuh ai pasawi lawh baly, huni khumi i tlang tleaung y kamngo pajengra tym ai;

¹⁶huni khumi ai padei ai nai tla, nanai Israela chengchi teng y thui pi ai nai tla. Israela cheng mo, Israela pri y awm nai cheng takhra mo, ARENG ai pasawi lawh baly, Israela cheng vereichi my huni khumi ai lengseaung hawi aphi ka ai nai tla.

¹⁷“Khumi ai padei nai keung ai ly padei teang ai nai tla;

¹⁸ami i tawnbawi ai padei nai khumi ly tawnbawi yhmkeung teng y kangtheung peh teang ai nai tla. Hini reita leaungsai ly hengra i vui hengra jeng theng teang nai ne.

¹⁹“Ami ai tamo kalem nga hai nai khumi ly amy py huna nai kamta avum teang ai nai tla;

²⁰ami i hiu khei nai khumi ly amy py hiu khei nai avum teang ai. Ami i mei hm tha vui nai khumi ly amy py mei hm tha vui nai avum teang ai. Ami i ho khei vui nai khumi ly amy py ho khei nai avum teang ai. Ami ai no nga hai nai kamta ly amy teng py no nga hai teang ai.

²¹Tawnbawi ai padei nai khumi ly huni kangtheung peh teang ai nai tla. Na i py khumi ai padei nai keung ai ly padei teang ai nai tla.

²²Kai ly nangchi i ARENG Tameuh ne nai deaungkho y, nangchi hawi vanrei awm nai cheng takhrachi ly hini reita leu pei nai tangai ai nai tla,” napi.

²³Mosi my Israela chengchi teng y huna nai leu pei nai kamta, tangai y nai khumichi ai ly tai angam mang y patheu iy, lengseaung hawi aphi u ka nai ne. Hina nai kamta Israela chengchi ly Mosi teng y ARENG my leu pei naichi tangai u bo.