Read Khumi Chin Levi 25 Bible Online

Levi 25 - Khumi Chin bible

Levi 25

¹ARENG my Sinai mawi salo y Mosi dengdairei

²Israela khumichi teng y hina nai leu pei pi nai ne. Nangchi ly ARENG my pei nai pri y kun u nai khala y, Saryh saneng tym nai tleirei li hlau so u y naimy, ARENG ai tahm khai nai palo u ai nai tla.

³Nangchi ly saneng tariurei sala y li hlauchi sa nai, kreip akhochi pachai nai, amti amjangchi pakym nai kalopchi sa ai nai tla.

⁴Na i py saryh saneng ly ARENG teng y talam yb nai saneng ne i, huni saneng y ly khaileaung y ati sai py pati y naimy khai ai nai tla. Li hlauchi so u moh; kreip changpichi pachai u moh.

⁵Nangchi pati nai ny y naimy alyly athai nai thengthaichi py pakym u moh. Changpichi pachai y naimy athai nai kreip athaichi py jaw u moh. Huni saneng y ly khaileaung y ati sai py pati y naimy, amdaw hai ai nai tla.

⁶Huni saneng y pati y naimy khaileaung i prau nai amti amjang ngiereichi ai, nangchi hawi vanrei nangchi i miseaungchi, tham naichi, nangchi theung y awm nai cheng takhrachi,

⁷nangchi i pri theung y khawn nai tawnbawi hawi, daichi mawichi cha u ai nai tla.

⁸Saneng saryhrei nai meingtym vui saryhrei ne nai, saneng 49 rei kati.

⁹Naibaly saryh lo, kani horei kani y ly kamngo pahen nai kani ne i, pri verei y khumi leaungrei ai amki hai ly, baw eng hai.

¹⁰Hina nai kamta saneng vui pangrei saneng ai khai takhra iy, pri verei y awm nai khumichi ly tlamsa bo, nanai satang thai hai ai nai tla. Huni saneng y ly ka-jo ka-van sa nai vawnsai ngiereichi ai, hini saneng y angchei i yhmkeung, ti y baly ni i kangpreangchi teng y pei pi ali teang ai nai tla. Van nai miseaungchi ai py my i yhm dengtheungchi teng y vawi hai ali teang ai nai tla.

¹¹Nangchi ly lichira y amti amjangchi pati u moh, sah prau nai amti amjangchi py pakym u moh.

¹²Huni saneng jeungrei ly nangchi i vui saneng kachai ne; nangchi ly lichira i alyly naimy prau naichi naini cha u ai nai tla.

¹³Huni saneng y ka-jo ka-van sa nai vawnsai ngiereichi ai, angchei i yhmkeung teng y pei ali teang ai nai tla.

¹⁴Huna khala naini nangchi ly amy cheng tengtawi khaileaung ka-jo ka-van sa nai khala, vang ka-ti apani ai nai tla.

¹⁵Vai tlenrei pei ali teang nai saneng tym y ryrei ly saneng sanengrei amti amjang theu nai nawi, di ka-lyp khaileaung vang pani pi ai nai tla.

¹⁶Ka-jo ka-van sa naira y khaileaung i amti amjang theu nai kane iy, ka-jo ka-van sa nai deaungkho y, amti amjang theu nai nawi, di ka-lyp khaileaung vang pani ai nai tla.

¹⁷Nangchi ly nangmychi cheng tengtawi atapawp moh; na i py nangchi i ARENG Tameuh ai tahm khai ai nai tla.

¹⁸Nangchi ly nangchi i pri theung y chymme naimy awm u thai ai nai ARENG i reitachi hawi leu pei naichi tangai u.

¹⁹Khaileaung i amti amjangchi nga nai deaungkho y, nangchi ly kajeu kawi pa-rei cha iy, chymme naimy awm u ai mang.

²⁰Na i py li so y, amti amjangchi pakym ai nai ngo y nai saryh saneng y mana cha ai mo? nanai khumi leaungrei my ang deang ai.

²¹ARENG my tariu saneng y khaileaung ai amtheaung hai nai deaungkho y, saneng nyhrei ka-cho amti amjangchi thawn ai.

²²Nangchi ly tajarei saneng y lichi sa nai khala, tariu saneng i pakym achu nai amti amjangchi cha u ai. Huni saneng y pati nai amti amjangchi pakym y rai nai ryrei, nangchi ly teicha teinei avaw y ai.

²³Khaileaung ly nangchi peang y leang; Tameuh my peang nai deaungkho y jo kyp moh. Nangchi ly angvyn ne i, huni pri y tym iy khuteng sa nai khumichi lawm u ai.

²⁴Khaileaung jo nai khala yhmkeung my, huni khaileaung atleu teang ai nai nga ai nai tla.

²⁵Israela cheng leaungrei ly kamawn parai nai deaungkho y, mymy i khaileaung jo ai lawh baly, ni hawi abi keh nai amjy my huni khaileaung van teang ai nai tla.

²⁶Huni khaileaung van ali teang ai nai amjo amnau by y lawh baly, yhmkeung ly vai mo mang y paisa tangka ko nai khala, my i khaileaung van teang thai ai nai tla.

²⁷Huni molam y, vai momang pei ali teang nai saneng tym ai nai ngai rai nai saneng kati iy, pei ai avo nai vang ryrei pei ai nai tla. Ati py ne sy, pei ali teang nai saneng tym baly, mymy i khaileaung ai jawmmy nga teang ai nai tla.

²⁸Na i py ni ly khaileaung van ali ai nai tangka lawm y lawh baly, huni khaileaung ly vai momang pei ali teang nai saneng ryrei ly van nai keung teng y awm ai nai tla. Huni saneng tym baly huni khaileaung ai angchei i yhmkeung teng y pei teang ai nai tla.

²⁹Mary apai theung i yhm jo lawh baly, yhmkeung ly sanengrei sala y vang teang ai nai tla.

³⁰Na i py sanengrei sala y van ali teang pajau y lawh baly, vai momang y vang teang ai nai ngo y iy, van nai khumi hawi ni i kangpreangchi ly huni yhm amtym jo ai nai tla. Pei ali teang nai saneng khala py huni yhm ai, angchei i yhmkeung teng y pei ali teang ai nai tlo y.

³¹Na i py apai by y nai avangchira yhmchi ai ka-jo ka-van sa lawh baly, khaileaungchi jo nai reita kamta sa ai nai tla. Pei ali teang nai saneng tym baly huni yhm ai angchei i yhmkeung teng y pei ali teang ai nai tla.

³²Levi theaungchi ly mychi awm ai nai khai pi nai marychira y, mychi jo veng nai yhmchi ai, mychi ngai nai neng khala, van ali teang pajau nai ne.

³³Levi theaung leaungrei ly my i awm nai mary theung y mymy i yhm jo vui nai bo y van teang y lawh baly, pei teang nai saneng khala huni yhm ly ni teng y pei teang ai nai tla. Ati mana nai mo na baly Israela pri theung y Levi marychi ai Levi theaungchi my peang nai deaungkho y ne.

³⁴Na i py Levi mary tengpangra i tawnbawi sui tlaira ai ly mana khala py jo ngau y. Huni sui tlaira ly mychi deungrei peang jojo nai khaileaung ne.

³⁵Nang i yhm deaungpa Israela cheng theung i khumi leaungrei ly kamawn kati ne iy, jeaungmang nai ne lawh baly, nang i yhm deaungpa lawm jo thai ai nai ni ai nangmy i ka-tham khumi kamta sabawm ai nai tla.

³⁶Huni khumi ai tangka alai ai nai pei lawh baly, katy cho moh. Tameuh ai jei iy ni ai nang i saleaung khumi palawn ai nai tla.

³⁷Ni teng y alai ai pei nai tangka ai ty lo moh. Teicha teinei kamran palyn iy ni teng y jo moh.

³⁸Hini ly nangchi ai kanan pri ang pei ai nai hawi, nangchi i Tameuh ne iy nangchi ai Aikupta pri i dengdairei ang pahawi nai nangchi i ARENG Tameuh i reita ne.

³⁹Nangmychi Israela cheng saleaung deaungpa ly khri pa-rei mawn iy, amymy ai nang teng y miseaung achei ai nai jo lawh baly, ni ai miseaung kamta kalop so hai moh.

⁴⁰Nichi ly vai momang pei ali teang nai saneng tym nai ryrei, nang teng y ka-tham khumi kamta, nang i kalop sa hai ai nai tla.

⁴¹Huni neng tym nai khala ni hawi ni i cho chanauchi ly mymychi i amjo amnauchi awm nai saleaung khutengra vawi hai teang ai nai tla.

⁴²Israela cheng tengtawichi ly ARENG i miseaungchi ne i, mymy ly nichi ai Aikupta pri i dengdairei patheu iy pahawi nai ne. Nichi ai miseaung lawm ai nai ka-jo ka-van sa ai nai tlo y.

⁴³Nichi tlang tleaung y pahen nai paleung ka-dawn awm iy, nangchi ly Tameuh ai tahm khai ai nai tla.

⁴⁴Kalop sa hai ai nai miseaung aly ngai lawh baly, nangmychi i deaungpa prichira i miseaungchi van u.

⁴⁵Nangmychi hawi vanrei awm nai cheng takhrachi i cho chanauchi ai py miseaung y van pajau. Nangchi i pri y tapen nai huni deaungdichi ai nangchi van pajau nai ne.

⁴⁶Nangchi i cho chanauchi ly hunichi ai yhmtheaung amtym pajau. Nichi ly nangchi i chapochi i miseaung y, mymychi deungrei awm hai ai nai tla. Na i py nangmychi Israela cheng tengtawi ly apahen ai nai tla.

⁴⁷Israela cheng khumi kamawn leaungrei ly nangchi hawi vanrei awm nai cheng takhra khumi leaungrei, ti y baly ni i yhm dengtheung leaungrei teng y, amymy ai miseaung y ajo lawh baly,

⁴⁸ni ai atleu teang ai nai nga; ni i amjo amnau leaungrei my mo,

⁴⁹ampo my mo, ampochy my mo, amjo amnau leaungrei my mo, amtawn abi nai amjo amnau leaungrei my mo, atleu teang pajau; ti y baly mymy naimy pajau lawh baly, amymy ai atleu teang pajau nai ne.

⁵⁰Amy ai vang nai khumi hawi ka-ly sa iy, amymy ai jo vui nai saneng dengdai, vai momang pei ali teang nai saneng tym nai ryrei, amy i nga ai nai ka-tham vang kati iy apani ai nai tla.

⁵¹Nichi my saneng tleirei kalop sa hai nai sanengchi kati iy, amymy ai jo nai vang phyrei paleaung teang ai nai tla. Ni i yhmkeung ly my i tlang tleaung y pahen nai paleung ka-dawn awm ai nai tla.

⁵²

⁵³

⁵⁴Na i py ni ly lam ha harei hawi miseaung i nai alawi pajau y lawh baly, momang i pei ali teang nai saneng tym nai khala, ni hawi ni i cho chanauchi ai miseaung i nai palawi ai nai tla.

⁵⁵Israela chengchi ly ARENG i miseaungchi ne nai deaungkho y, deungtasarei miseaung lawm ai nai avo y. Mymy ly nichi ai Aikupta pri i dengdairei pahawi nai ne i, mymy ly nichi i ARENG Tameuh ne.