Read Khumi Chin Levi 26 Bible Online

Levi 26 - Khumi Chin bible

Levi 26

¹ARENG my, “Nangchi ly mynchi, leungchengchi, lengseaung mynchi sa iy chiu u moh. Kai ly nangchi i ARENG Tameuh ne.

²Reita pawichi sa iy, kai ai chiu nai meingtym ai tahm khai ai nai tla. Kai ly ARENG ne.

³“Nangchi ly kai i reitachi hawi kai i leu pei naichi tangai baly,

⁴kai ly neng tym nai khala kani kang nai hai nai deaungkho y, li hlauchira i amti amjangchi theu iy thengthai keungchi athai thawn ai.

⁵Nangchi i amti amjangchi khri pa-rei thawn nai deaungkho y, nangchi ly choh tyn nai pajau y khala my, kreip athai jaw nai neng tym ai. Kreip athaichi jaw nai pajau y khala my, choh pati nai neng tym ryp ai. Nangchi ly kajeu kawi pa-rei cha ai nai nga iy, chymme naimy awm ai nai nga u ai.

⁶“Kai ly nangchi i pri y tlamsa hai nai deaungkho y, nangchi ly vum y ka-jeira molam paleung mawn naira by y naimy, i nem ai nai nga u ai. Kai ly nangchi i pri i nai mawi kasichi paryh pi pawn ai. Tavai takai ly avum bi ai ny y.

⁷Nangchi ly nangmychi i paleung ka-echi ai tiu nai pajau u ai;

⁸nangchi mang i khumi leaung pangreichi ly paleung ka-e leaung chungvaireichi ai mo, nangchi mang i khumi leaung chungvaireichi ly paleung ka-e leaung meaungkateaungreichi ai mo, tiu nai pajau u ai.

⁹Kai ly nangchi ai amtheaung hai nai deaungkho y, nangchi ly cho deaungdi neangneang sa u ai. Nangchi hawi asa nai Leu Maikawm ai khaw hai ai.

¹⁰Nangchi i amti amjangchi pasu nai deaungkho y, sanengrei ka-cho aleu nai khyh chang y naimy, choh kangtha pai pateung ai ngai nai deaungkho y, choh kangngymchi aphi ai nai tla ai.

¹¹Kai ly kaimy i Tabynakora awm nai deaungkho y, nangchi hawi vanrei awm ai. Nangchi ai mana kha py kang khai su y leang mang.

¹²Kai ly nangchi hawi vanrei awm ai; kai ly nangchi i Tameuh ne i, nangchi py kai i khumichi lawm ai.

¹³Kai ly nangchi ai miseaung i nai alaw jo hai ai nai, Aikupta pri i dengdairei pahawi nai, nangchi i ARENG Tameuh ne. Kai ly nangchi i myn kaji alaw hai iy, deangtheang naimy tako hai ai” napi.

¹⁴Naibaly ARENG my, “Nangchi ly kai i leu pei naichi tangai u y baly, pajeng naira kang tym hai ai.

¹⁵Nangchi ly kai i reitachi hawi leu pei naichi tangai y iy, nangchi hawi asa nai Leu Maikawm py taphra lawh baly,

¹⁶kai ly nangchi ai kang pajeng ai; asi sa iy hawi thai y nai no-na mo, mei paju hai nai hawi atho di hai nai no-na mo, nangchi teng y kang tym hai ai. Nangchi ly amti amjangchi pati i py, kamran by y ai; ati mana nai mo na baly nangchi i paleung ka-echi ly nangchi ai tiu nai pajau ai i, nangchi i pati nai amti amjangchi cha u pawn nai deaungkho y ne.

¹⁷Kai ly nangchi ai nithun thun hai vui nai deaungkho y, nangchi ly tavai sum u ai i, paleung ka-echi my ang peang ai. Nangchi ly khri pa-rei jei hyn nai y, hui nai khumi by y naimy angpreng u ai.

¹⁸“Nangchi ly huna tanrei pajeng naira avum u i py, kai i leu tangai y asai baly, kai ly nangchi i tlang tleaung y pajeng naira phy tlen saryhrei kang tym hai panawi bi ai.

¹⁹Nangchi i paleung tang naichi ai kaimy nau hai vui ai. Nangchi i pri y kani nai y nai deaungkho y, khaileaung jengha iy tamo kamta tang hai ai.

²⁰Nangchi i khaileaung ly amti amjang thawn ai ny y, thengthai khulawn py athai y nai deaungkho y, nangchi atho no kalop sa nai ngierei ly atyhtyh lawm ai.

²¹“Nangchi ly kai ai ka-awi sa iy kai i leu tangai y asai baly, kai ly pajeng naira phy tlen saryhrei kang tym hai panawi bi ai.

²²Kai ly nangchi i awm naira y mawi kasichi kapato ai i, nangchi i cho chanauchi, si, beramchi ai kei hai ai. Khumi maidenreichy awm khyh nai y, aki aleaung nai khumi angso awm ai ny y.

²³“Nangchi ly huna tanrei pajeng naira avum i malawn py, kai ai ka-awi sa iy kai i leu tangai y asai baly,

²⁴kai ly nangchi ai nithun thun pi vui iy, angchei i tleaung y pajeng naira ty keh nai phy tlen saryhrei kang tym hai panawi bi ai.

²⁵Nangchi ly kai i Leu Maikawm taphra nai molam y, nangchi teng y tavai takai tym hai ai. Huna nai khala nangchi ly marychi mang preang iy abyh u baly, kai ly nangchi teng y asi sa iy hawi thai y nai no-nachi kang tym hai ai i, nangchi ly paleung ka-echi teng y tym u ai.

²⁶Kai ly teicha teinei takang hai nai deaungkho y, neampachy leaung horei paawp ai nai tako ly neampachy leaungrei my paawp ai nai takeang harei ka-lawn awm khyh ai. Nangchi ly huni tako apaji iy lawnlen y naimy cha u ai.

²⁷“Nangchi ly huna tanrei pajeng naira avum i malawn py, kai ai ka-awi sa iy kai i leu tangai y asai bi baly,

²⁸kai ly kado theu kang tlau ai i, vaichi khala i tleaung y ty keh nai pajeng naira phy tlen saryhrei kang tym hai panawi bi ai.

²⁹Nangchi ly khri pa-rei kajeu alam nai deaungkho y, amy i cho chanau ngan malawn py cha u ai.

³⁰Kai ly mawi aheungchira i, nangchi i chiu nai meingtymchi ai taphra pi pawn iy, mui katui leng patlum nai maichamchi py panawi pi pawn ai. Nangchi i veuchi ai anawi jawn nai mynchi salo y aphi chup ai. Kai ly nangchi ai kang paso nai deaungkho y,

³¹nangchi i marychi kataphra pawn iy nangchi i chiu nai meingtymchi py phra hai ai. Nangchi i kapathyprachi py kang kawn pi ai ny y.

³²Kai ly nangchi i pri kang taphra pi ai nai deaungkho y, nangchi i pri y peang nai paleung ka-echi malawn py kaso theu u ai.

³³Kai ly nangchi teng y tavai takai tym hai iy, nangchi ai pri takhra mang y ahei hai ai. Nangchi i pri ly khumi angso by y iy nangchi i marychi py phra seaungkhrang ai.

³⁴Naibaly nangchi my vaichi khala amdaw hai y nai khaileaung ly vai amdaw ai nai nga ai. Nangchi ly paleung ka-echi i pri y awm u nai thym khala, nangchi i pri ly khumi angso savai iy, amdaw ai nai nga ai.

³⁶“Nangchi ly pri takhra y awm u nai thym khala, ali aho nai dengkeaung ngam katyn thai nai hawimy jei hyn iy, preang u ai. Nangchi ly tavai keung y paleung ka-e my preng nai y angpreng u nai kamta, angpreng ai. Nangchi sahawi y paleung ka-echi by y teu i py, nangchi ly atlym u ai.

³⁷Preang nai khumi by y naimy leaung leaungrei adeng mengmeaung iy atlym u ai. Mani paleung ka-e ai py amtang pajau ai ny y.

³⁸Nangchi ly pri takhra y awm iy dei u ai; nangchi i paleung ka-echi i pri my nangchi ai ang pajawn chauchau ai.

³⁹Nangchi ly paleung ka-echi i pri y myh kang u ai; huni pri y nangchi theung i awm asai nai maidenreichy naichi ly nangchi i kamngo nai molam y mo, nangchi i amsi pajochi i kamngo nai molam y mo, myh kang u ai.

⁴⁰“Na i py nangchi i kangpreangchi ly nichi i kamngo hawi amsichi i kamngochi ahui u ai. Nichi i amsi pajochi ly kai ai ka-awi sa iy tiu u i,

⁴¹kai ly kado theu nai deaungkho y, mychi i paleung ka-echi pri mang y, pri kapala nai ne. Kangkhym y nichi i kangpreangchi ly paleung tang nai nau vui iy mymychi i kamngo hawi tiu nai molam y pajeng naira avum chum nai khala,

⁴²kai ly Abraham, Isaka, Jakobchi hawi asa nai Leu Maikawm ai pany jo iy, huni Leu Maikawm saho y kai i khumichi ai Kanan pri kapei pi nai ne.

⁴³Na i py angchei y ly huni pri amdawpra nga ai nai, huni khumichi ai tama hai vui ai nai tla. Kai i reitachi hawi leu pei naichi khai su nai molam y, mipuichi ly paleang naira avum u ai.

⁴⁴Na i py huna nai tym hai nai khumichi ly paleung ka-echi i pri y awm nai thym khala, kai ly nichi ai khai su ryp ai ny y, taphra py taphra vui ai ny y. Kaimy nangchi ai khai su lawh teu baly, kai hawi nichi sala asa nai Leu Maikawm ly phra vui ai. Kai ly nichi i ARENG Tameuh ne.

⁴⁵Kai ARENG ly kai i khumichi i Tameuh lawm ai nai, nichi ai Aikupta pri i dengdairei pahawi iy, khumi bawibawichi teng y kai i sa thai nairachi pany hai nai thym khala, nichi i amsichi hawi asa nai Leu Maikawm ai kapany pi ali teang ai,” napi.

⁴⁶Hini bawibawichi ly ARENG my Sinai mawi y Mosi dengdairei, Israela chengchi teng y pei pi nai reitachi hawi leu pei naichi ne.