Read Khumi Chin Levi 4 Bible Online

Levi 4 - Khumi Chin bible

Levi 4

¹ARENG my Mosi teng y leu pei nai ly

²Israela cheng theung i khumi leaungrei ly reita leu pei naichi ai athang khai y naimy taphra iy, sa tamang nai awm lawh baly, anui mang i khai pi yb nai reita kamta sa ai nai ARENG my leu pei nai ne.

³Pathyp pi nai keung kalen keh my kamngo sa lawh baly, khumichi i tlang tleaung y raurei kamngo tym hai nai deaungkho y, ni ly kamngo lawira nga ai nai, no-na by y nai si katai beaungjeaung harei hawi ARENG teng y apathyp ai nai tla.

⁴Ni ly huni si katai ai ARENG i awmra Tabynako katheu pa-kho mo y pahawi sy ly si lu tleaung y kiu kheang iy ARENG i mo y, huni si tleh ai nai tla.

⁵Naibaly pathyp pi nai keung kalen keh ly thi maidenrei la iy, Tabynako angtheung y kun hai ai nai tla.

⁶Ni i kiu pajeung ai thira tapo iy, huni thi ly kanih ali hang nai mo y tlen saryhrei katheng ai nai tla.

⁷Hunaibaly ni ly Tabynako theung i mui katui leng patlum nai maicham takichira i kachawnchira y, huni si thi maidenrei hawi tabei ai nai tla. Huni bo i thi kamlai ai ly Tabynako katheu pa-khora y awm nai, leng patlum nai maicham kheutangra leih jawn ai nai tla.

⁸Naibaly ni ly si katai takuta tavira i thau bawibawichi,

⁹pakawi seaungru hawi hunira i thau, pathymra i hawi keh nai phyrei la ai nai tha.

¹⁰Pathyp pi nai keung ly leunghawi kapathypra i tawnbawi thau ai leng patlum nai kamta, huni si katai thau ai maicham salo y leng patlum ai nai tla.

¹¹Naibaly si peih, nganbawi ngierei, lu, kheuchi, takuta hawi vanrei tivichi ai ly

¹²Tai naira angam mang y syn iy maidym adi nai meingtym kachaira, mai y leng vui ai nai tla.

¹³Israela cheng bawibawichi ly ARENG i leu pei naichi theung i ha harei ai taphra nai y kamngo tla lawh baly,

¹⁴tamang bo, nanai pany phai pany praw baly, si katai beaungjeaung harei hawi kamngo pahen nai kapathypra talam ai nai tla. Nichi ly huni si ai ARENG i awmra Tabynako mang y syn ai nai tla.

¹⁵Khumi mipuichi ai lu sa pi nai keungchi ly huni si katai lu tleaung y kiuchi kheang iy, huni si tleh ai nai tla.

¹⁶Pathyp pi nai keung kalen keh ly Tabynako theung mang y thi maidenrei syn sy ly

¹⁷ni i kiu pajeung hawi thi y tapo iy, huni thi ai kanih ali hang nai mo y tlen saryhrei katheng ai nai tla.

¹⁸Tabynako angtheung mang i mui katui leng patlum nai maicham takichira i kachawnchira y, si thi maidenrei tabei sy; thi kamlai ai ly Tabynako katheu pa-kho sahawi y awm nai leng patlum nai maicham kheutangra leih jawn ai nai tla.

¹⁹Naibaly ni ly si katai thau ngiereichi la iy, maicham tleaung y leng patlum ai nai tla.

²⁰Ni ly kamngo pahen nai kapathypra talam nai reita kamta, huni tawnbawi talam ai nai tla. Pathyp pi nai keung ly hina nai kamta, khumichi i kamngo molam y tawnbawi apathyp nai deaungkho y, khumichi ly kamngo lawi naira nga u ai.

²¹Naibaly ni ly my i kamngo molam y talam nai si ai, tai naira angam mang y mai patawi nai kamta, huni si ai py hunira y mai patawi ai nai tla. Hini apathyp nai reita ly cheng vui jeungrei kamngo lawi naira nga hai ai nai sa nai ne.

²²Peang nai keung samrang ly ARENG i leu pei naichi theung i ha harei ai athang khai y naimy taphra nai kamngo sa lawh i,

²³my i kamngo apany phai apany baly, no-na by y nai mi-i katai harei hawi apathyp ai nai tla.

²⁴Ni ly maicham tosyh ngan mang i leng patlum nai tawnbawichi tleh nai meingtym y, huni mi-i lu tleaung y kiu kheang iy, mi-i ai tleh ai nai tla. Hini kapathypra ly kamngo lawira nga ai nai ne.

²⁵Pathyp pi nai keung ly my i kiu pa jeung hawi thi y tapo iy, maicham takichira i kachawnchira thi tabei ai nai tla. Thi kamlai ly maicham kheutangra y leih jawn ai nai tla.

²⁶Naibaly leunghawi kapathyp tawnbawichira i thau ai leng patlum nai kamta, mi-i thau ngiereichi ai, maicham salo y leng patlum ai nai tla. Hunai kamta khyp pathyp pi nai keung ly peang nai keung samrang i kamngo molam talam nai deaungkho y, huni samrang ly kamngo lawi naira nga ai.

²⁷Khumi leaungrei ly ARENG i leu pei naichi theung i ha harei ai, athang khai y naimy taphra nai kamngo tla lawh i,

²⁸ni ly my i kamngo apany phai apany baly, no-na by y nai mi-i nu harei hawi apathyp ai nai tla.

²⁹Ni ly maicham tosyh ngan mang i tawnbawichi tleh nai meingtym y, mi-i lu tleaung kiu kheang iy, huni mi-i ai tleh ai nai tla.

³⁰Pathyp pi nai keung ly my i kiu pajeung hawi thi y tapo iy, maicham takichira i kachawnchira thi tabei ai nai tla. Thi kamlai ly maicham kheutang y leih jawn ai nai tla.

³¹Naibaly leunghawi apathyp nai tawnbawichira i thauchi la nai kamta, mi-inu ra i thau ngiereichi la iy, maicham salo y leng patlum ai nai tla. Hini talam nai mui kahawi ai ly ARENG my kawn pi nai ne. Pathyp pi nai keung ly hina nai kamta khumi leaungrei i kamngo molam talam pi nai deaungkho y, huni khumi ly kamngo pahen naira nga ai.

³²Khumi leaungrei ly kamngo pahen nai kapathypra beram syn lawh baly, huni beram ly no-na by y nai beram nu ne ai nai tla.

³³Ni ly maicham tosyh ngan mang i leng patlum nai tawnbawichi tleh reng nai meingtymra, huni tawnbawi lu tleaung y kiu kheang iy, tawnbawi tleh ai nai tla.

³⁴Pathyp pi nai keung ly my i kiu pajeung hawi thi y tapo iy, maicham takichira i kachawnchira y tabei ai nai tla; thi kamlai ly maicham kheutangra leih jawn ai nai tla.

³⁵Naibaly leunghawi katalamra tawnbawi thau la nai kamta, beram nu i thau ngiereichi la iy, katalamra hawi vanrei, maicham salo y leng patlum ai nai tla. Pathyp pi nai keung ly hina nai kamta, khumi leaungrei i kamngo molam pathyp pi nai deaungkho y, huni khumi ly kamngo pahen naira nga ai.