Read Khumi Chin Levi 5 Bible Online

Levi 5 - Khumi Chin bible

Levi 5

¹Sa tamang nai molam y kamngo pahen nai kapathypra talam ai nai tla. Khumi leaungrei ly tara jeung y pany hai ai nai palau nai khala, ni ly mymy i niu nai, thai nai kamta thui khyp y lawh baly, tamang nai ne.

²Khumi leaungrei ly tawnbawi kadei ai reita leaungsai y chai y nanai pany y nai y nam lawh baly, athang khai y naimy nam lawh bo, nanai pany phai apany baly, ni ly chai y i kamngo tla bo.

³Khumi leaungrei ly tlangra i amso ngai nai ai, athang khai y naimy nam lawh baly, nam lawh abi lawh bo nanai pany phai apany baly, ni ly chai y i kamngo tla bo.

⁴Khumi leaungrei ly mani mora py avo mo, avo y mo, nanai dawn dan y naimy vaineng abeu lawh baly, huna nai vaineng abeu nai pany phai apany baly, ni ly kamngo tla bo.

⁵Khumi leaungrei ly kamngo sa baly, tamang bo nanai apany ai nai tla.

⁶Ni ly tamang nai molam ARENG teng y beram nu, ti y baly mi-i nu hawi apathyp ai nai syn takengkei ai nai tla. Pathyp pi nai keung ly huni khumi i kamngo molam y tawnbawi talam pi ai nai tla.

⁷Ni ly beram mo, mi-i mo talam ai nai by y lawh baly, ni i kamngo molam y yhm buhu nyhrei, ti y baly amprym buhu nyhrei ARENG teng y syn ai nai tla. Harei ly kamngo pahen nai kapathypra mo, vai harei ly leng patlum nai kapathypra mo, talam ai nai tla.

⁸Ni ly hunichi ai pathyp pi nai keung teng y syn iy, pathyp pi nai keung my ly huni tavo lu leu hai y naimy kaneaung mie ai nai tla.

⁹Naibaly huni tavo thi phyrei ai ly maicham teng mang y katheng prei iy, huni bo i thi ly maicham kheutang y tapijai ai nai tla. Hini ly kamngo pahen nai kapathypra ne.

¹⁰Pa-nyh tavo ai ly reita kamta leng patlum ai nai tla; huna nai kamta pathyp pi nai keung ly huni khumi pahenra nga ai nai talam pi ai nai tla. Naibaly huni khumi py kamngo lawira nga ai.

¹¹Ni ly yhm buhu bomrei, ti y baly amprym buhu bomrei py, by y lawh baly, kamngo pahen nai kapathypra i vui tako dei sierei, pathyp pi nai keung teng y syn ai nai tla. Huni katalamra ly teicha teinei katalamra ny y; kamngo pahen nai katalamra ne nai deaungkho y, tako dei salo y olive asitui, ti y baly mui kahawi leih ai nai avo y.

¹²Pathyp pi nai keung ly ARENG teng y tako dei talam be nai ka-ma-ra lawm ai nai tako dei kiu angsorei la iy leng patlum ai nai tla; hini ly kamngo pahen nai katalamra ne.

¹³Hina nai kamta pathyp pi nai keung ly huni khumi i vui kamngo pahen nai kapathypra talam pi nai deaungkho y, ni ly kamngo lawira nga ai. Teicha teinei talam nai kamta, tako dei kamlai ly pathyp pi nai keung i vui ne.

¹⁴ARENG my Mosi teng y hini reitachi pei pi bo.

¹⁵Ami mo ly ARENG i vui y kachai khai patyp naichi ai athang khai y naimy sa tamang lawh baly, ni ly ARENG teng y no-na by y nai beram katai, ti y baly mi-i katai syn ai tla. Huni beram, ti y baly mi-i i vang apani nai tangka py syn ai nai tla.

¹⁶Ni ly chai naira ai kachai so teang y nai molam tangka hawi peh ai nai ly chungphy apomrei tleang panawi bi iy, pathyp pi nai keung teng y talam ai nai tla. Naibaly pathyp pi nai keung my huni khumi i kamngo molam y beram katai, ti y baly mi-i katai hawi pathyp pi nai deaungkho y, ni ly kamngo pahen naira nga ai.

¹⁷Khumi ami py ARENG i reita leu pei nai ha harei ai athang khai y naimy taphra lawh baly, ni ly kamngo sa nai deaungkho y pajeng naira avum ai.

¹⁸Ni ly pathyp pi nai keung teng y no-na by y nai beram katai, ti y baly mi-i katai ha harei vang apani yb nai tangka py talam ai nai tla. Naibaly pathyp pi nai keung ly huni khumi i kamngo molam pathyp pi nai deaungkho y, ni ly kamngo pahen naira nga ai.

¹⁹Huni ly ARENG i tlang tleaung y sa tamang nai molam, kamngo pahen nai katalamra ne.