Read Khumi Chin Levi 7 Bible Online

Levi 7 - Khumi Chin bible

Levi 7

¹Kamngo pajengra i lawi ai nai kapathypra molam y khai pi nai reitachi ly hinichi ne. Hini kapathypra ly khri pa-rei chai nai ne.

²Naibaly maicham tosyh ngan mang i leng patlum nai tawnbawichi ai, tleh reng nai meingtymra y, kamngo pajengra i lawi hai nai katalamra molam y, hini tawnbawi ai tleh ai nai tla. Thi ly maicham taki palyhreira katheng ai nai tla.

³Pathyp pi nai keung ly tamai hawi takutara i thau, pakawi seaungru hawi hunira i thau, pathymra i hawi keh nai phyreichi la iy maicham tleaung y talam ai nai tla.

⁵Pathyp pi ni keung my ly tawnbawira i thau ngiereichi ai, maicham salo y leng patlum ai nai tla. Hini ly kamngo pajengra lawi ai nai ARENG teng y talam nai ne.

⁶Pathyp pi nai keung yhm dengtheung theung i neampacho bawibawichi ly huni tawnbawi mawi cha ai nai nga; na i py huni ly khri pa-rei chai nai deaungkho y, meingtym kachaira cha ai nai tla.

⁷Kamngo pahen nai katalamra hawi, kamngo pajengra lawi hai nai katalamra, hini amjy nyhrei i vui reita khai pi naira y, talam nai pathyp pi nai keung ly tawnbawi mawi cha ai nga nai ne.

⁸Leng patlum nai tawnbawi peih ly talam pi nai pathyp pi nai keung i vui ne.

⁹Takeang mai y paawp nai teicha teinei katalamra, laawm pangdai, ti y baly tamo laawm pangdaira dang nai teicha teinei katalamrachi ly talam pi nai pathyp pi nai keung i vui ne.

¹⁰Na i py paawp y, dang y rai nai teicha teinei katalamra ly asitui hawi katlen nai py ne sy, asitui hawi katlen y nai py ne sy, Aron hawi ni i kangpreang pathyp pi nai keung bawibawichi i vui ne i, ahyh riri aphy u ai nai tla.

¹¹Hini ly ARENG teng y talam nai, leunghawi kapathypra i vui reitachi ne.

¹²Khumi ami py Tameuh teng y kawn nai leu thui nai kapathypra talam nai khala, tawnbawi hawi vanrei angbo abawi y nai tako katalamra py syn ai nai tla. Hini tako ly olive asitui katlen nai tako dei hawi sa nai tako phi katho, ti y baly tako phi amporyp nai, ti y baly tako dei hawi olive asitui katlen iy sa nai tako phi ne ai nai tla.

¹³Huni takochi bo y angbo phui iy paawp nai takochi py, talam ai nai tla.

¹⁴Tako sai ha hareira i tako harei ai, ARENG teng y talam patyp ai nai tla. Huni talam nai takochi ly maicham teng mang y tawnbawi thi katheng pi nai, pathyp pi nai keung cha ai nai ne.

¹⁵Leunghawi kapathypra talam nai kani y tawnbawi mawi ly cha keng ai nai tla. Kani pa-nyh khawn mang y khrairei, kamlai awm ai nai avo y.

¹⁶Khumi ami py amy i tau ka-vo adeu nai py ne sy, amy i paleung kangai py ne sy, leunghawi kapathypra talam nai khala, talam nai kani y tawnbawi mawi cha keng ai nai tlo y. Kamlai ly kani pa-nyh khrairei cha ai nai nga.

¹⁷Na i py kani pa-thom khrairei palai asai nai mawi ly mai y veang vui ai nai tla.

¹⁸Pa-thom kani y khrairei palai nai mawi cha lawh baly, Tameuh my nang i talam nai kawn pi ai ny y; talam nai khumi py hawi naira nga ai ny y. Huni tawnbawi ly chai y i, tawnbawi mawi cha nai khumi py kamngo tla ai.

¹⁹Reita leaungsaira y chai y nai ati mo ha harei hawi abi nai mawi ly cho ngau y, mai y veang vui ai nai tla. Reita leaungsai y chai nai khumi ly leunghawi katalamra tawnbawi mawi cha pajau.

²⁰Na i py chai y nai khumi huni mawi cha lawh baly, Tameuh i khumichi theung i nai, nyn va vui ai.

²¹Nangchi theung i khumi leaungrei ly khumi py ne sy, tawnbawi py ne sy, reita leaungsai y chai y nai sai sairei hawi abi iy, huni tawnbawi mawi cha lawh baly, huni khumi ai ly Tameuh i khumichi theung i nai, nyn va vui ai.

²²ARENG my Mosi teng y,

²³Israela khumichi i vui y hini reitachi pei pi bo. Si, beram hawi mi-ichi i thau ly cha ai nai tlo y.

²⁴Dei kari y dei nai tawnbawi thau, ti y baly mawi kasi my kei nai y dei nai tawnbawi thauchi ly cho u moh; na i py huni thau ai atiti takhrachira y teaung pajau.

²⁵Khumi leaungrei ly ARENG teng y leng patlum nai tawnbawi mawi cha lawh baly, Tameuh i khumi theung i nai nyn va vui ai.

²⁶Israela chengchi ly mani meingtym y mo awm i py, tavo thi, ti y baly tawnbawi thi cha ai nai avo y.

²⁷Hini reita leu pei nai ai taphra nai khumi ai ly Tameuh i khumi theung i nai nyn va vui ai.

²⁸ARENG my Mosi teng y,

²⁹Israela khumichi i vui hini reitachi pei pi bi bo. ARENG teng y leunghawi kapathypra talam nai khumi ly tawnbawi mawi phyrei mymy teng y talam patyp iy,

³⁰leng patlum nai katalamra palawn ly amy i kiu hawi syn pi ai nai tla. Ni ly tawnbawi thau hawi amsei ai, ARENG i vui talam patyp ai nai syn pi ai nai tla.

³¹Pathyp pi nai keung ly thau ai, maicham salo y leng patlum ai nai tla. Na i py amsei ly pathyp pi nai keungchi i vui ne.

³²Leunghawi talam nai tawnbawi i thi hawi thau

³³talam pi nai pathyp pi nai keung ai, tawnbawi lamtang phai pei pi patyp ai nai tla.

³⁴Tawnbawi amsei hawi lamtang phai ly ARENG my Israela khumichi teng i, pathyp pi nai keungchi i vui, langseaung vui pi patyp nai ne. Israela khumichi ly huni phy ai pathyp pi nai keungchi teng y talam pi jojo ai nai tla.

³⁵Hini phy ly Aron hawi ni i chapochi ai pathyp pi nai keung y tahm palyn nai kani y, ARENG teng talam nai tawnbawichira i vui pi nai phy ne.

³⁶Israela chengchi ly hini phychi ai pathyp pi nai keungchi teng y pei nai huni kani y ARENG my reita pei pi nai ne. Israela chengchi ly hini reita ai, mymychi deungrei teaung patawm ai nai tla.

³⁷Hini ly leng patlum nai katalamra, teicha teinei katalamra, kamngo pahen nai katalamra, kamngo pajengra i lawi hai nai katalamra, tahm palyn nai katalamra hawi, leunghawi katalamrachi i vui khai pi nai reitachi ne.

³⁸Daichi ka-vymra i Sinai mawi saleung y, ARENG ly Mosi dengdairei, hini reitachi teaung patawm ai nai leu pei nai kani y, Israela chengchi i vui khai pi nai ne.