Read Khumi Chin Levi 8 Bible Online

Levi 8 - Khumi Chin bible

Levi 8

¹ARENG my Mosi teng y thui pi nai ly

²“Aron hawi ni i chapochi ai, kai i awmra Tabynako katheu pa-kho mang y pahawi ai nai tla. Pathyp pi nai keung i ateaungchi, tahm palyn nai asitui, kamngo pahen nai kapathypra i vui si katai beaungjeaung harei, beram katai nyhrei, angbo abawi y nai tako teaungrei py syn ai nai tla.

³Hunaibaly hu y khumi bawibawichi ai kachu ai nai tla,” napi.

⁴Mosi ly ARENG i leu pei nai kamta sa bo. Khumichi jeu achu nai khala,

⁵Mosi my nichi teng y, “Kai ly ARENG my leu pei nai kamta sa nai ne,” napi.

⁶Naibaly Mosi ly mymy i leu pei nai kamta, Aron hawi ni i chapochi ai mo mang y chei hai iy, tui hawi apachai hai bo.

⁷Aron ai baichu, baichu kangjiuchi amthyp hai iy, akeng y py khobai akawm hai bo. Naibaly ephod amchiu hai iy, apu parai nai akengkawm hawi ephod ai thang pi bo.

⁸Tangtaang adangra tai pi chum baly, hunira y Urim hawi Thummim khai pi nai ne.

⁹Aron i lura y lupeu ajeng hai i, ARENG teng y aau patyp nai ka-ma-ra muku phei ai, ARENG i leu pei nai kamta, lupang kataw i lupeura y tai pi bo.

¹⁰Naibaly Mosi ly tahm palyn nai asitui la iy, ARENG i awmra Tabynako hawi huni theung i, ateaung alang bawibawichi ai tabei nai ne. Huna nai kamta ARENG i Tabynako hawi, hunira i ateaung alang ngiereichi ai khai takhra pi bo.

¹¹Naibaly Mosi ly asitui maidanrei la iy, maicham hawi huni i ateaung alangchi ai py, rahum hawi huni i panuira kheu ai py, tlen saryhrei katheung iy ARENG teng y talam patyp bo.

¹²Huni bo y ni ly asitui maidenrei hawi Aron i lu tleaung y leih iy, pathyp pi nai keung y tahm palyn bo.

¹³Naibaly Mosi ly ARENG i leu pei nai kamta, Aron i chapochi ai py mo mang palau hai iy, nichi ai baichuchi amchiu hai chum baly, akeng y khobai akawm pi nai ne. Luchira py lukhymchi amym hai bo.

¹⁴Naibaly Mosi ly ARENG my leu pei nai kamta, kamngo pahen nai kapathypra talam ai nai si katai beaungjeaung pahawi iy, Aron hawi ni i chapochi ai si lu tleaung y kiu kheang hai bo.

¹⁵Mosi ly huni si ai tleh chum baly, thi maidenrei la iy kiu pajeung hawi maicham takichira i kachawnchira tabei; thi kamlai hawi maicham kheutangra leih iy, maicham ai khai takhra bo. Naibaly kamngo pahen nai kapathypra talam iy chai hai nai ne.

¹⁶Mosi my takuta i thauchi, pathym i thau, pakawi seaungru hawi hunira i thauchi la iy, maicham salo y leng patlum bo.

¹⁷Ni ly huni bo i nai si peih, nganbawi hawi tivichi ly ARENG my leu pei nai kamta, tai naira angam mang y, mai y veang vui bo.

¹⁸Naibaly Mosi ly leng patlum nai kapathypra talam ai nai beram katai la iy, Aron hawi ni i chapochi ai beram lu tleaung y kiu kheang hai bo.

¹⁹Mosi my huni beram tleh iy, thi ly maicham makeng palyhreira y katheng nai ne.

²⁰Mosi ly ARENG my leu pei nai kamta, beram mawi abai piu chum baly, takuta tivi hawi kheuchi ai tui paju pan iy, beram lu, thau hawi bom verei leng patlum bo. Hini talam naira i leng patlum nai mui kahawi ly ARENG my kawn pi nai ne.

²²Naibaly Mosi ly pathyp pi nai keung y tahm palyn naira y talam ai nai pa-nyh beram katai la bi i, Aron hawi ni i chapochi ly beram lu tleaung y kiu kheang u bo.

²³Mosi my huni beram katai tleh chum baly, thi phyrei la iy Aron i lamtang kano sampum y py, lamtang kiupui hawi lamtang kheupui y py kaleu pi bo.

²⁴Naibaly Mosi my Aron i chapochi ai palau iy, nichi i lamtang kano sampumchi, lamtang kiupuichi hawi lamtang kheupuichira y, beram thi kaleu pi bo. Mosi ly thi kamlai ai maicham makeng palyhreira katheng bo.

²⁵Ni ly beram kathau, tamai, takutara i thau, pathymra i thau, pakawi seaungru hawi hunira i thau hawi lamtang phaichi la nai ne.

²⁶Naibaly ni ly ARENG teng y talam nai, angbo abawi y nai tako takhu theung i tako phirei, asitui kaleu nai tako phirei hawi tako phi angporyp nai la iy, beram thau hawi lamtang phai tleaung y khai bawi bo.

²⁷Ni ly hunichi ai Aron hawi ni i chapochi i kiu y au iy, nichi ly ARENG teng y talam u patyp nai ne.

²⁸Naibaly Mosi ly huni katalamrachi ai nichi teng i la teang iy, maicham i leng patlum nai tawnbawi tleaung y kiu kheang iy leng patlum bo. Huni katalamra mui kahawi ly ARENG my kawn pi nai ne.

²⁹Naibaly Mosi ly beram amsei la iy ARENG teng y talam patyp bo. Huni tahm palyn nai tawnbawi amsei ly Mosi i vui phy ne. ARENG i leu pei nai kamta, Mosi ly sa angym nai ne.

³⁰Naibaly Mosi my tahm palyn nai asitui maidenrei hawi maicham tleaung i thi la mai iy, Aron hawi ni i chapochi i tlang tleaung y py, nichi i ateaungchira y py katheng pi bo. Huna nai kamta sa iy ni ly Aron hawi chapochi, nichi i ateaungchi py, ARENG teng y au patyp nai ne.

³¹Naibaly Mosi ly Aron hawi chapochi teng y, “ARENG my leu pei nai kamta, beram mawi ly ARENG i awmra Tabynako katheu pa-kho sahawi y byh bo; huni mawi ly tahm palyn nai tako takhu theung i tako hawi cha ai nai tla.

³²Cha kamthum tako hawi mawi ly mai y veang vui ai nai tla.

³³Nangchi tahm palyn nai pawi kani saryhrei tym y ryrei ly Tabynako katheu pa-kho angam mang y theu u moh.

³⁴Nangchi i kamngo pahenra nga ai nai molam, achi i vaini sa nai sai ly ARENG my leu pei nai kamta sa nai ne.

³⁵Nangchi ly Tabynako katheu pa-khora y ARENG my leu pei naichi, kani saryhrei sala y vum, kanithun sa ai nai tla. Nangchi ly leu pei nai kamta so u y lawh baly, dei takengkei ai, nanai ARENG my kai teng y leu pei bo,” napi.

³⁶Hunaibaly Aron hawi ni i chapochi ly ARENG my Mosi teng y leu pei nai kamta sa u nai ne.