Read Khumi Chin Levi 9 Bible Online

Levi 9 - Khumi Chin bible

Levi 9

¹Mosi ly tahm palyn nai pawi sa pajau nai kani y Aron hawi ni i chapochi, Israela cheng lu sa nai keungchi ai palau achu bo.

²Naibaly ni ly Aron teng y, “Nang ly no-na by y nai si katai beaungjeaung harei hawi, beram katai harei ai ARENG teng y talam ai nai tla. Si katai beaungjeaung ly kamngo pahen nai katalamra hawi beram katai ai ly leng patlum nai katalamra i vui y talam ai nai tla.

³Mi-i katai harei hawi kamngo pahen nai katalamra py, no-na by y iy sanengrei awm nai si cho hawi beram cho ai leng patlum nai katalamra py,

⁴si katai harei hawi beram katai harei ai leunghawi kapathypra py talam ai nai tla, nanai Israela chengchi teng y thui pi. Nichi ly huni tawnbawichi ai asitui katlen nai teicha teinei hawi vanrei, ARENG teng y talam ai nai tla. Vaini ARENG ly nangchi teng y ang jeu ai,” napi.

⁵Naibaly nichi ly Mosi my leu pei nai kamta ati cheaungkhangchi ai Tabynako mo y tym hai u bo. Israela mipui bawibawichi py ARENG ai chiu ai nai jeu u achu nai ne.

⁶Mosi my, “Nangchi ly ARENG i nang parai nai kangvang sangso niu u ai nai, mymy ly nangchi teng y hini atitichi sa ai nai leu ang pei nai ne,” napi.

⁷Naibaly ni ly Aron teng y, “Nang i kamngo hawi Israela chengchi i kamngo pahen ai nai maicham mang y tapai iy, kamngo pahen nai katalamra py, leng patlum nai kapathypra py talam ai nai tla. ARENG my leu pei nai kamta, Israela chengchi i kamngo pahen nai kapathypra talam ai nai tla,” napi.

⁸Huna nai khala Aron ly maicham mang y chei tapai iy, my i kamngo pahen nai kapathypra talam ai nai si katai beaungjeaung tleh bo.

⁹Ni i chapochi ni teng y thi maidenrei syn i, ni ly thi y kiu pajeung tapo i, maicham takichira i kachawnchira y thi tabei bo. Ni ly thi kamlai ai maicham kheutang y leih jawn nai ne.

¹⁰Naibaly ni ly ARENG my Mosi teng y leu pei nai kamta, si thau, pakawi seaungruchi hawi, pathym hawi keh naichi ai maicham tleaung y leng patlum bo.

¹¹Na i py nganbawi hawi peih ly tai naira angam mang y mai hawi veang pawn nai ne.

¹²Naibaly ni ly my i vui leng patlum nai tawnbawi ai tleh bo. Ni i chapochi my ni teng y thi syn pi mai i, ni ly maicham makeng palyhreira y katheng bo.

¹³Nichi ly si lu hawi takhra nganbawichi ni teng y syn pi i, hunichi ai ni ly maicham tleaung y leng patlum bo.

¹⁴Naibaly ni ly si takuta hawi kheuchi ai paju pyn i, leng patlum ai nai tawnbawi tleaung y khai iy leng patlum nai ne.

¹⁵Huni bo y ni ly khumi mipuichi i vui kapathyprachi talam pi nai ne. Ni ly khumi mipuichi i vui kamngo pahen nai katalamra mi-i la iy tleh chum baly, amy i kamngo pahen nai kapathypra talam nai kamta mi-i hawi talam pi teang bo.

¹⁶Leng patlum nai katalamra tawnbawi syn iy, reita leu pei nai kamta leng patlum pi nai ne.

¹⁷Naibaly ni ly teicha teinei katalamra i tako dei angsorei la iy, maicham tleaung y leng patlum bo. (Hini ly kani tleirei leng patlum nai kapathypra bo y sa panawi bi nai katalamra ne).

¹⁸Ni ly khumichi i vui leunghawi kapathypra talam ai nai si katai hawi beram katai py tleh bo. Ni i chapochi ly ni teng y thi maidenrei syn iy, ni my maicham makeng palyhreira y katheng pi bo.

¹⁹Aron my si katai hawi beram katai i thauchi ai ly

²⁰tawnbawichi i amsei salo y khai iy maicham mang y chei hai bo. Naibaly hunichi ai maicham tleaung y leng patlum nai ne.

²¹Naibaly Aron ly Mosi my leu pei nai kamta, amseichi hawi lamtang phaichi ly pathyp pi nai keungchi i vui ARENG teng y talam pi patyp bo.

²²Aron ly kamngo pahen nai kapathypra, leng patlum nai kapathypra hawi leunghawi kapathyprachi sa pajau bo na baly, my i kiu nyhrei pheu iy khumi mipuichi ai amtheaung hai; naibaly hu i nai avum kathiu bo.

²³Mosi hawi Aron nini ly ARENG i awmra Tabynako theung y kun hawi bo. Hu i nai theu teang nai khala, nini ly khumichi ai amtheaung hai; naibaly khumi bawibawichi ly ARENG i nang parai nai kangvang sangso niu u bo.

²⁴Naibaly ly ARENG ly tlenrei khyhmy mai kangveaung tla hai miu iy, maicham tleaung i leng patlum nai tawnbawi hawi thauchi kang hai bo. Khumi bawibawichi ly huni leaungsaichi niu nai khala, aeu iy khaileaung y ambeu u bo.