Read Khumi Chin JEREMIA 11 Bible Online

JEREMIA 11 - Khumi Chin bible

JEREMIA 11

¹ARENG my kai ai leu pei nai ly

²“Hini Leu Maikawm theung y awm nai atitichi ai tangai. Israela chengchi i ARENG Tameuh ly

³huni Leu Maikawm theung y awm nai leaungsaichi ai, tangai y nai ngiereichi teng y amsawi lawi hai ai, nanai Juda khumichi hawi Jerusalem mary i khumichi teng y thui pi.

⁴Huni Leu Maikawm ly nichi ai tamo paheung pui hawi atawm nai Aikupta pri i dengdairei, kaimy pahawi nai thym khala y, kai ly nichi i amsi pajochi hawi asa nai Leu Maikawm ne. Kai ly huni khumichi ai kai i leu tangai ai nai hawi, kaimy sa hai nai kalop ngiereichi sa u ai nai leu pei nai ne. Nichi ly kai i leu pei naichi tangai u lawh ai nabaly, kai i khumichi lawm iy, kai py nichi i Tameuh lawm ai.

⁵Naibaly vai nichi awm naira, nang chawn hai nai hawi, khaileaung hawi iy amti amjang thawn hai nai pri, nichi i amsi pajochi teng y pei ai nai kaimy leu adeu pi nai py, khaw hai ai, nanai nichi teng y kaimy leu pei yb bo. Kaimy, “Ne, aw ARENG,” napi.

⁶Naibaly ARENG my kai teng y, “Juda marychi hawi Jerusalem mary lamchira y chei. Huni meingtymchira y kai i leu pei naichi thai hai ly Leu Maikawm theung y abawi nai atitichi sa patawm ai nai, nichi teng y thui pi.

⁷Nichi i amsi pajochi ai Aikupta pri i dengdairei kapahawi nai thym khala my, kai ly nichi ai kai i leu tangai u ai nai, hawihai palai kathui pi kheng bo. Vaini khrairei kapany hai jojo nai ne.

⁸Na i py nichi ly kai i leu tangai u y. Sa patawm nai py by y. Nichi bawibawi ly paleung tang ra tang ra iy, kaso ra kaso u ra nai ne. Kai ly nichi teng y sa patawm ai nai leu pei kheng teu i py, nichi patawm u y nai khala Leu Maikawm theung y abawi nai vainengchi ly nichi i tlang tleaung y lawi hai bo,” napi.

⁹Naibaly ARENG ly kai teng y, “Juda khumichi hawi Jerusalem mary i khumichi ly kai ai tiu u lawh.

¹⁰Kai i leu tangai y naichi ly mychi i amsi pajochi i sa nai kamngochi sa u ali teang bo. Nichi ly tameuh takhrachi ai chiu u lawh. Israela chengchi hawi Juda chengchi ly kai hawi mychi i amsi pajochi asa nai Leu Maikawm ai taphra u mei nai ne.

¹¹Hunai deaungkho y nichi i tlang tleaung y kaimy tym hai ai nai ka-jeira i nai, nichi ly law tleaung u ai ny y, nanai kai ARENG my pany hai bo. Kasabawmra nga ai nai nichi aeu u nai khala py, kaimy pathang pi ai ny y.

¹²Huna nai khala Juda khumichi hawi Jerusalem mary i khumichi ly mymychi i apathyp nai tameuhchi teng y aeu naimy kasabawmra hnei u ai. Na i py huni tameuhchi ly ka-jeira tym nai thym khala y, sabawm pi thai ai ny y.

¹³Juda pri y mary neangneang awm nai kamta, khumi mipuichi teng py tameuh neangneang awm. Jerusalem mary theung y py lam neangneang awm nai kamta, mary i khumichi ly kaji ai hawi nai Bala tameuh i vui, kapathypra talam ai nai maichamchi sa u nai ne.

¹⁴Jeremia awi, huni khumichi i vui hawi nichi i jeng y takeng pi moh; ahui py ahui pi moh; chiu py so pi moh. Nichi patang naira avum nai khala, sabawm ai nai kai teng y aeu u teu i py, kai ly katangai pi ai ny y,” napi.

¹⁵ARENG my, “Kai i tamen nai khumichi ly hawi y nairachi sa u bo. Nichi ly ati mana nai kai i Achura yhm y kun ai nai nga u ai mo? Tawnbawichi hawi apathyp nai saho y ka-jeira i nai paka vui pajau ai, nanai athang khai u a? Nichi ly hawi y naichi sa naimy amo theu u na a?

¹⁶Vaichi khala ARENG ly huni khumichi ai, ngamchi angvairu iy athai kahawichi athai pasu nai olive keung, nanai amyn pathi nai ne. Na i py vai, kai ly kani pajyh nai katyn hawi huni keung i ngamchi mai leng iy changpichi khei pawn ai.

¹⁷“Ati cheaungkhang sa thai nai keung kai, ARENG ly Israela pri hawi Juda pri ai palum pachai pi ai. Na i py vai kai ly huni pri y ka-jeira tym hai ai. Nichi ly sa tamang u nai deaungkho y, Bala tameuh teng y apathyp u nai molam y, nichi ly kai ai kado patheu u lawh nai ne.”

¹⁸Kai ai padei ai nai paleung ka-echi ly kangviu y dawn u bo, nanai kai ai ARENG my pany hai nai ne.

¹⁹Kai ly padei ai nai pahawi nai beram kamta ka-ym awm nai khumi ne. Nichi ly kai i tlang tleaung y hawi y sa ai nai ka-dawn awm nai ly kai pany y. Nichi my, “Keung hawi thym nai dengkeaung keung ai paliu u sina. Ni ai vai mo mang y ami my py pany ali y ai nai, ni ai achi padei u sina,” nanai thui u bo.

²⁰Huna nai khala kai ly “Ati cheaungkhang sa thai keung ARENG awi, “Nang ly leu meitang naimy tara chih reng nai keung ne. Khumichi i sa ai tau nai hawi paleung ka-dawnchi ai py, chih reng nai keung ne. Kai ly kaimy i sa naichi ai nang i kiu y kang-au bo. Hunai deaungkho y nichi ai nangmy vawitheung tha nai ly kai ai patei kyh ba,” nanai chiu kasa bo.

²¹Anatho mary i khumichi i vui ARENG my leu pei bo. Ati mana nai mo nabaly huni mary i khumichi ly kai ai padei ai ngai nai deaungkho y, ARENG i leu pei nai thui pi veangveang lawh baly kai ai padei ai, nanai thui u nai ne.

²²Hunai deaungkho y ati cheaungkhang sa thai keung ARENG my, “Kai ly nangchi i tlang tleaung y kang pajeng ai! Nichi i thawndeang ka-cheangchi ly tavai keung y dei u ai.

²³Anatho mary i khumichi tlang tleaung y ka-jeira tym ai nai kaimy khai takhra bo. Huni kani y nichi ly heng nai khumi leaungrei py tleaung ai ny y.