Read Khumi Chin JEREMIA 12 Bible Online

JEREMIA 12 - Khumi Chin bible

JEREMIA 12

¹Aw ARENG, kai i molam nang teng y leu amti pi ai nabaly, nang naini hawi nai keung ne. Na i py leu meitang awm nai, by y nai molam ly kai kang deng ai nai ngai. Ati mana nai y khumi hawi y naichi ly hunatan pa-rei nang chawn u nai mo? Leu meitang teaung y nai khumichi ly ati mana nai y tlamsa u lawh mo?

²Nang ly nichi ai pati nai deaungkho y, nichi ly tangjyn aviu, keung cheang iy athai thawn bo. Nichi ly nang i hawi nai sai thui u jojo i py, nichi ly angchi khyp, nang ai tahm khai u y leang.

³Na i py aw ARENG, nang ly kai i satang pany; kai i sa nai saichi py niu, nang ai mana tanrei kang tamen mo, nanai py nang pany. Huna nai hawi y nai khumichi ai tleh ai nai beramchi kamta, patheu jo bo. Padei nai neng tym y ryrei ly nichi ai khen patawm bo.

⁴Kaichi i pri ly jengha nai mana tanrei kra iy, li hlauchira i achachi py, mana tanrei kakra ngamchi ajawi ai mo? ‘Kaichi i sa nai ly Tameuh my niu y leang,’ nanai thui u nai hini pri khumichi i hawi y nai molam y, tavochi hawi daichi mawichi dei nai ne.

⁵ARENG my, “Jeremia awi, nang ly khumichi hawi angpreng acham naira y paha lawh ai nabaly, keaungngochi hawi ati mana angpreng acham pajau ai mo? Nang ly angdym y atlym lawh ai nabaly Jordan tavo sahawi i daichi theung y mana kham pajau ai mo?

⁶Nang i yhm dengtheungchi hawi, nang i amjo amnauchi my malawn py, nang i tlang tleaung y ka-ym by y lawh bo. Nichi ly nangchi i makeng mang y abawi iy, nang ai hang hai bo. Nichi ly nang ai leu katheu hai teu i py, nichi ai nang ly ym moh,’ napi.

⁷ARENG my, “Kai ly kaimy i Israela ai khai su iy, kaimy vawi takhra nai khumichi ai py nyn va veng bo. Kaimy tamen nai khumichi ai paleung ka-echi kiu y au veng bo.

⁸Kaimy vawi takhra nai kai i yhmtheaung kamtymchi ly daichi theung i khrangsichi kamta, kai ai ang tiu u lawh bo. Nichi ly kai ai ang hang hai nai deaungkho y, kai ly nichi ai kaniu ngai y bo.

⁹Kaimy vawi takhra nai yhmtheaung kamtym ly ahmtlauchi my taki iy atiu nai tavo hawi atawm. Mawi kasichi jeu iy cha nei ai nai palau ba!

¹⁰Cheng takhra samrangchi malawn py, kai i kreip akho taphra u nai ne. Nichi ly kai i li hlauchi ai chiu u piupa veng bo. Apu parai nai kai i pri nai tui by y nai daichi ka-vym lawm hai u bo.

¹¹Nichi ly huni pri y khumeung khuram lawm hai bo. Huni pri ly kai i mo y khumi angso savai tlang naimy awm bo. Pri verei khai su nai avum iy, ami my py dawndan y bo.

¹²Khumichi ly tiu ai nai tui by y nai daichi ka-vymra i, mawi aheungchi tako prei iy, ang jeu bo. Hini pri verei taphra pawn ai nai, kai ly tavai pasau hai ai. Ami py tlamsa naimy awm thai y.

¹³Kai i khumichi ly choh pati teu i py, kabeng alengchi naini tyn u ai. Nichi ly khri pa-rei kalop sa u teu i py, ati sai py kamran by y. Kai i kado theu ala nai deaungkho y, nichi ly kaji ai hawi nai athai pakym u ai,” napi.

¹⁴ARENG my, “Kai i khumi Israela chengchi teng y amtym ai pei nai pri ai, phra seaungkhrang hai nai Israela pri yhm deaungpa prichi molam y kai thui ai nai awm. Kai ly huni khumi hawi y naichi ai tangjyn akheaung nai keungdichy kamta, nichi pri i nai akyn vui ai. Juda pri ai nichi kiu i nai atleu ai.

¹⁵Na i py kai ly nichi ai huna nai atleu chum baly, kapahen ai. Huni khumi cheng bawibawichi ai, mychi i khu ka-peang mang y hawi, mychi i pri y kapahawi teang ai.

¹⁶Nichi ly kai i chengchi i reita leu ngai iy, vaichi khala Bala tameuh teng y vaineng abeu nai saichi ai nichi ly kai i khumichi teng y patiu pi nai kamta vai ly ‘ARENG i heng nai kamta,’ nanai kai i amyn y vaineng abeu u lawh baly, nichi ly kai i khumichi theung y abawi iy nang chawn u ai.

¹⁷Na i py kai i leu tangai y nai khumi chengchi ai, kai ly tangjyn akyn iy taphra vui ai. Hini ly kai, ARENG i thui nai leu ne,” napi.