Read Khumi Chin JEREMIA 13 Bible Online

JEREMIA 13 - Khumi Chin bible

JEREMIA 13

¹ARENG ly nina lutum van iy, amthyp ai nai kai ai leu pei i, huni akeng kawm nina tui sui y ai nai py leu taviu nai ne.

²Hunai deaungkho y kai ly mymy i leu pei nai kamta, akeng kawm nina van iy kana bo.

³Naibaly ARENG ly kai ai leu ang pei bi bo.

⁴“Euphrat tavo y chei ly nang i akeng kawm nina asu iy, lengseaung ka-kora y heu veng,” napi.

⁵Hunai deaungkho y kai ly Euphrat tavo sahawi y chei iy, huni akeng kawm nina heu vui bo.

⁶Huni bo kra y nai sala y ARENG ly kai ai Euphrat tavo y chei hai bi iy, akeng kawm nina la teang ai nai leu pei bo.

⁷Hunai deaungkho y kai ly Euphrat tavo y chei iy, kaimy i heu nai meingtym y kahau i, akeng kawm nina kaniu nai khala, huni ly sadyn pawn i teaung ai nai ngo y bo.

⁸Naibaly ARENG ly kai ai leu ang pei bi bo.

⁹Mymy ly “Hina nai kamta kai ly Juda pri i paleung asang nai hawi Jerusalem mary i amlyh am-e nai taphra veng ai.

¹⁰Huni khumi hawi y naichi ly kai i leu tangai y; paleung tang ra i tameuh takhrachi ai chiu iy kalop sa pi u nai ne. Hunai deaungkho y teaung ai ngo y nai akeng kawm nina kamta lawm u ai.

¹¹Israela hawi Juda khumi bawibawichi ly kai i khumi lawm iy, kai i amyn palo u thai ai nai, kai ly nichi ai khumi i akeng y akawm cheng nai akeng kawm nina kamta, kai i sahawi y abiri pa-rei awm ai nai ngai hai nai ne. Na i py nichi ly kai i leu tangai u y.

¹²Israela chengchi i ARENG Tameuh my, “Jeremia awi, kreip hang chy-y ngiereira y, kreip hang pakawi u ai nai tla, nanai Israela khumichi teng y thui pi ai nai tla. Nichi my kreip hang chy-y awm nai ngiereira y kreip hang pakawi bawi ai nai tla, nanai kaichi kapany, nanai pathang u ai.

¹³Huna nai khala y kai, ARENG ly Davida kangpreang samrangchi, pathyp pi nai keungchi, amochi hawi, Jerusalem mary i khumi bawibawichi pavui na pa-rei kreip hang kapanei ai, nanai nichi teng y thui pi.

¹⁴Naibaly kai ly chy-ychi tengtawi adeng hai iy kawi nai kamta, nichi ai katheang kalen takhawi y naimy kataphra ai. Mani pahen naira, tamen naira hawi neaung hawi naira my ly nichi ai padei ai nai molam y kai ai paka pajau ai ny y,” napi.

¹⁵Israela khumichi awi, ARENG my leu ang pei bo! Paleung apanem naimy tangai u.

¹⁶Nangchi i ARENG Tameuh ly kani dym hai nai deaungkho y, nangchi ly mawi salo y athei iy, atlym y rai khala y hawi, mymy ly nangchi ajeng nai kangvang ai kaveng palawn y rai khala y py, nangchi ly ARENG Tameuh ai palo u.

¹⁷Nangchi tangai u y lawh baly, kai ly nangchi i amlyh am-e nai molam y vo paryp ai. Kai ly paleung si nai khri pa-rei vo ai. Ati mana nai mo nabaly ARENG i khumichi ly langheng y hawi pawn nai deaungkho y, kai ly meikatui tla ai.

¹⁸ARENG ly kai teng y, “Samrang hawi my i amhm i apu parai nai areng lukhymchi ly mychi lu i nai tla pawp veng bo i, nichi teng y mymychi i samrang atehra i nai satlo u sy, nanai thui pi.

¹⁹Tokalawi mang i Juda marychi ai katanmeuh pawn veng bo. Nichi teng y ami py chei pajau y. Juda khumi bawibawichi ai patiu iy, pri pala naira avum u bo,” napi.

²⁰Jerusalem mary awi, khen cham! Nang i paleung ka-echi ly tosyh mang dengdairei ang jeu dudu bo! Kry ai nai nang teng y kang-au nai khumichi my tahm khai nai khumichi ly ma mang y awm u pawn mo?

²¹Nangmychi i ahawi ka-dawichi ne, nanai khumichi my ly nangchi ai tiu iy ang peang ai nai ARENG my ka-vo sa lawh baly, nangchi ati mana thui u ai mo? Nangchi ly deaungdi tapen nai neampachy kamta, no patang u ai.

²²Nangchi my, “Hini atitichi ly ati mana nai deaungkho y tym nai mo? Kaichi i ateaungchi ly ati mana nai y aseih pawn lawh mo? Kaichi ly ati mana nai khrukhra hai nairachi avum nai mo?” nanai deng u lawh baly, “Nangchi i kamngo ly ka-jeira hawi parai nai deaungkho y ne,” nanai pathang ai nai tla.

²³Tlang panum nai khumi ly my i ngan tlang areaung takhra hai tha na a? Ti y baly takaikheng ly my i an mawichi tamo hai thai na a? Nichi ly huna nai sa thai lawh teu baly, hawi y naira naini sa thai khyh nai nangchi py, hawi naira mang y amtlau ai nai sa thai ngau lym ai.

²⁴ARENG ly khutaha daichi ka-vym mang ali aho nai theung y akheang nai choh ali kamta, nangchi ai ahei hai phro ai.

²⁵Hini ly nangmychi i khym taham ne ai, nanai ARENG my leu pei bo. Nangchi ly mymy ai tami u iy, tameuh ka-chawichi ai ym u lawh nai deaungkho y, mymy ly nangchi i tlang tleaung y, hina nai kamta tym hai nai ne.

²⁶ARENG mymy kypkyp my, nangchi i ateaungchi ang lei pawn iy, nangchi ai kangji nga hai ai.

²⁷ARENG ly mymy i amso ngai naichi ai nangchi sa nai niu. Nangchi ly yhm deaungpa i aju ai ngai tahau nai kamta, keaungngo nu ai keaungngo katai my po chiu nai kamta, mawi aheungchi hawi adym angdengra y kangji nang y naimy, bima kalop sa u bo. Jerusalem mary i khumichi awi, nangchi ly taham si! Nangchi ly mana khala y chai u ai mo?