Read Khumi Chin JEREMIA 17 Bible Online

JEREMIA 17 - Khumi Chin bible

JEREMIA 17

¹ARENG my, “Juda khumichi awi, nangchi i kamngo ai tamo chakaleaung hawi tajiu typ bo. Huni kamngo ai nangchi i paleung pheira y meaung y cheng tai nai chakaleaung hawi tajiu typ iy, nangchi i maicham takichira y thiu pi yb bo.

²Mawi aheungchira y awm nai heng-yh nai dengkeaung keung ngiereichi sahawi y py, mawi saleungchi salo y py, Asherah tameuh myn i vui pado pi nai leungchengchi hawi maichamchira y, nangchi i cho chanauchi my chiu u nai ne. Nangchi ly nangmychi i pri verei y sa tamang u nai kamngochi molam y,[5]nangchi i yhmtheaung katui muku, tangka, vang katengchi ai, nangchi chiu u nai mawi aheungchi hawi vanrei, paleung ka-echi teng y kaimy kapei vui ai.

⁴Nang i kamngo molam y nangchi ly kaimy kang pei nai pri khai su ai nai tla ai. Kai i kado theu nai ly mai hawi atawm iy, angveaung jojo ai. Kai ly nangchi ai nangmychi tym vai y nai pri i paleung ka-echi teng y miseaung achei hai ai,” napi.

⁵ARENG my, “Khumi ai py, dei thai nai khumi i haiho ai py, ym iy kai ai nithun thun nai khumi ai py kaimy amsawi lawi hai ai.

⁶Huni khumichi ly khumi angso savai tlang nai meingtymra y awm nai dengkeaung kadei kamta lawm iy, hawi naira tym nai pany u y. Khumi ami py by y nai palawi khaileaung, khutaha daichi ka-vymra y awm u ai.

⁷“Na i py kai ai paleung pado iy, ym nai khumichi ai ly amtheaung hai ai.

⁸Huni khumichi ly tavo peang y prau iy tui awm nai mang y tangjyn pala nai dengkeaung keung hawi atawm. Huni keung ly ngamchi heng-yh jo nai deaungkho y, kanipui i kani kabi ai jei y. Kani khang khala py mawnra by y i, athaichi athai jojo reng nai ne.

⁹“Mani khumi ly khumi i paleung pany pajau mo? Khumi i paleung ly ati cheaungkhang tleaung y py akawi reng. Huni paleungra y kahawi sa iy ngo pajau y nai ang vawi awm.

¹⁰Kai ARENG ly khumi i paleung awm nai sai khen patawm thai. Paleung ka-dawn ai py cham reng nai ne. Kai ly khumi bawibawichi ai nichi i sa nai molam y mychi i ka-tan hawi nai hawi y nai pei ai,” napi.

¹¹Teng y nai lam hawi paisa tangka ko nai khumi ly amy kadui y nai kaduichi ai oh nai tavo hawi atawm. Ni ly hawithym hawisai khala my, yhmtheaung katuichi phra iy, kangkhym y ly khumi ka-khum lawm lawh nai ne.

¹²Achi i Achura yhm ly angchei khala i dengdairei mawi saleung y awm nai ne i, nang parai nai areng atehra hawi atawm nai ne.

¹³Aw ARENG, nang ly Israela chengchi i athang khai naira ne. Nang ai khai su nai ngiereichi ly kangji nga u ai. Nichi ly hengra tuino, napi nai ARENG nang ai khai su nai deaungkho y, spryhra y tajiu nai amynchi kamta, tama u pawn ai.[6]

¹⁴Aw ARENG, nangmy hawi sa pi khala naini, kai i no-na ly hawi pyn ai. Nangmy atleu pi baly kai ly chymme naira angym pa-rei nga ai. Nang ly kai my palo nai keung ne.

¹⁵Khumichi my kai ai, “ARENG my kaichi ai pajei naichi ly ma mang y mo? Vaimy huni atitichi amteng hai sy!” napi u.

¹⁶Na i py aw ARENG, kai ly beram typ nai keung kalop khai su nai ny y leang. Ngari kamtang tym ai nai kani kadeaung nai py ny y leang, nanai nangmy pany nai ne. Kai i labeaung mang katheu nai leuchi nang pany.

¹⁷Nang ly kai ai kaso tahyn theu hai moh. Patang naira tym nai khala, nang ly kai i abyhra ne.

¹⁸Kai ai pahyp y naimy ana naichi ai kangji nga hai iy, kai ai kangjira i nai lawi hai ba. Nichi teng y kaso tahyn theu nai paleung kawi hai ly kai ai ly kaso tahyn theu hai moh ba. Nichi i tlang tleaung y ka-jeira tym hai iy, nichi ai phra hai pawn ba.

¹⁹ARENG ly kai teng y, “Jeremia awi, Juda samrangchi kun theu naira, khumi mipuichi i mary katheu pa-kho mang y chei iy, kai i leu thui pi. Hunaibaly Jerusalem mary i takhra mary katheu pa-khochi mang y py chei.

²⁰Juda samrangchi hawi khumi mipuichi teng y py, huni katheu pa-khochi mang kun theu reng nai Jerusalem mary i khumi bawibawichi teng y py, kai i leu pei naichi tangai ai nai thui pi ba.

²¹Hini ly kai ARENG i leu pei nai ne. Anawn kani y ly mani myn kaji py pho u moh. Jerusalem mary katheu pa-khochi tako prei iy,

²²amychi yhm i ati sai py tawn u moh. Nichi ly Anawn kani y kalop sa ai nai tlo y. Nichi i amsi pajochi teng y kaimy reita leu pei nai kamta, huni kani ly khai takhra nai kani palawn iy, teaung patawm jo ai nai thui pi.

²³Nichi i amsi pajochi ly kai i leu tangai u y. Nichi ly paleung tang naimy kai i leu ngai u y. Kai i parip nai py ngai u y.

²⁴“Kai i leu pei nai bawibawichi tangai u ai nai tla, nanai nichi teng y thui pi. Nichi ly Anawn kani y hini mary apai katheu pa-khochi tako prei iy, mani myn kajichi py tawn ai nai ngo y. Anawn kani ai ly khai takhra nai kani palawn nai teaung patawm iy ati sai py kalop so u y baly,

²⁵nichi i samrangchi hawi samrang i chapochi ly Jerusalem mary y mary katheu pa-kho mang kun iy, samrang Davida kamta sa thai naira haiho nga u ai. Nichi ly Juda khumichi, Jerusalem mary i khumichi hawi vanrei, keaungngo ka-richi hawi keaungngochi atang iy chei u ai. Jerusalem mary py khumichi kawi aninau naimy awm ai.

²⁶Khumichi ly Juda marychi hawi Jerusalem mary tengtang i avangchi mang dengdairei, ang tym u ai. Nichi ly Benjamin khu ka-peang, mawi kheutangchi, mawi aheung banchi hawi Juda pri tokalawi khu ka-peangra i dengdairei ang jeu u ai. Nichi ly leng patlum nai kapathyprachi hawi tawnbawichi py, choh katalamrachi, mui katuichi hawi, kawn nai kapathyprachi py, ARENG i Achura yhm y syn u ai.

²⁷Na i py nichi ly kai i leu tangai y, Anawn kani ai khai takhra nai kani palawn iy teaung patawm y naimy huni kani y, Jerusalem mary katheu pa-khochi tako prei naimy, mani vawnsaichi py tawn pajau y. Tawn u lawh teu baly kai ly Jerusalem mary katheu pa-khochi mai leng vui ai. Huni mai ly Jerusalem mary i samrang yhm y kang hai ai. Huni mai ai ami py pathym u pajau ai ny y,” napi.