Read Khumi Chin JEREMIA 18 Bible Online

JEREMIA 18 - Khumi Chin bible

JEREMIA 18

¹ARENG my kai ai,

²“Laawm beu nai keung i yhm y chei. Nang ai kaimy leu kang pei ai,” napi.

³Hunai deaungkho y kai ly hu y chei i, laawm beu nai chau tami nai laawm beu nai keung ai niu bo.

⁴Ni ly my i sa nai alai laawmra y tamo niu nai khala y, huni alai khaileaung ai la iy, takhra amjy harei mang y sa takhra vui nai ne.

⁵Huna nai khala ARENG my kai ai,

⁶“Laawm beu nai keung ly khaileaung laikan ai sa nai kamta, kai py nangchi Israela chengchi ai so pajau y a? Aw Israela chengchi awi, khaileaung laikan ly laawm beu nai keung i kiu y awm nai kamta, nangchi chengchi py kai i kiu theung y awm u nai ne.

⁷Kai ly mana khala py hina nai khumi chengchi hawi hina nai prichi ai akyn vui, kataphra vui, katamyh vui ai, nanai thui lawh teu i py,

⁸huni khumi chengchi ly uikheih u lawh baly, kai ly paleung amtlau ai i, vaichi khala thui naichi kaso y naimy awm ai.

⁹Na i py kai ly hina nai khumi cheng, ti y baly hini pri y kapalum kapachai ai, nanai thui lawh teu i py,

¹⁰huni khumi chengchi ly kai i mo y kamngochi sa iy kai i leu tangai u y lawh ai nabaly, kai i paleung amtlau vui ai i, vaichi khala y thui nai, hawi nairachi kaso pi y naimy awm vui ai.

¹¹Huna nai y kai ly Juda khumichi hawi Jerusalem mary i khumichi ai, ka-awi sa ai tau nai hawi kapajeng ai sa rym naichi py thui pi. Khumi bawibawichi kamngo sa nai anawn u ai nai hawi, mychi i heng nai hawi amhi amtlau naichi takhra u ai nai ARENG my leu pei nai thui pi ba.

¹²Huna nai khala nichi my, “Kaichi ly amtlau vui pajau y leang; ati mana nai amtlau vui ai mo? Kaichi ly kaimychi ngai ngai paleung tang naimy, hawi y nai kasa u ai,” nanai thui u ai.

¹³Hunai baly ARENG my, Israela chengchi ly ka-jei hawi parai naichi sa u! Jangni y hina naichi tym vai a?, nanai khumi cheng cheaungkhangchi teng y deng u cham.

¹⁴Lebanon lengseaung mawi saleungchi ly kadam tlo y nai neng awm reng a? Huni mawi dengdairei tavo micheaung kasavaichi ly tui kang nai awm vai a?

¹⁵Na i py kai i khumichi ly kai ai tami u bo. Nichi ly ati sai py ny y nai mynchi vui y mui katuichi leng patlum u lawh. Nichi ly mychi tako ai avo nai lam y athei iy, atlym u bo. Lam kangngym tako u y. Nichi ly ka-ma-ra khai y nai amny amcha y nai lam mang tako u nai ne.

¹⁶Nichi ly hini pri y khumi angso savai tlang nai pri hawi, amso ngai hawi jojo nai pri lawm hai bo. Huni sahawi mang tako prei nai khumi bawibawichi ly dawn tamang tyh iy mychi i lu heng u ai.

¹⁷Kai ly kaimy i khumichi ai nisi ali my hm nai spryhchi kamta, paleung ka-echi mo y ahei hai ai. Kai ly nichi ai nithun kathun vui ai. Kai ly nichi ka-jeira avum nai khala y, kasabawm pi ai ny y,” napi.

¹⁸Huna nai khala khumichi my, “Jeremia ai paleang veng sina! Achi ai parip nai pathyp pi nai keungchi, tau pei nai khumi kachengchi hawi, Tameuh i leu thui pi nai amochi ang khai pi jojo nai ne. Jeremia ai achi my seu u sina. Ni i thui nai leu py tangai u moh sina,” nanai thui u bo.

¹⁹Hunai deaungkho y Jeremia my, “ARENG, kai i thui naichi tangai pi kyh ly paleung ka-echi my kai ai ang thui nai leu tangai ba.

²⁰Hawi naira ai hawi y naira my atleu pajau na a? Na i py nichi ly kai tla ai nai hum angawm tai u lawh. Kai ly nang teng y jeu iy nichi ai kado theu hai y ai nai, nichi i jeng y kang takeng nai ly pany pi jo kyh ba.

²¹Na i py aw ARENG, Nang ly nichi i cho chanauchi ai kajeu kanglam y dei hai ly nichi ai tavai keung y sum hai ba. Neampachychi ai mymychi i juvochi, cho chanauchi hawi amprei hai ba. Neampachochi ai dei hai iy thawndeang ka-cheangchi ai tavai keung y sum hai ba.

²²Nichi i yhm hlauchi ai lawm ai nai khrukhra hai nai khumi kanghuchi ai pato miu ba. Nichi ly jei hyn u naimy aeu u na sy. Nichi ly kai tla ai nai hum angawm tai u bo. Kai i vui deaung py pateung u bo.

²³Na i py aw ARENG, kai ai padei ai nai dawn paviu nai khumichi ai, nang ly pany nai ne. Nichi i hawi y nai sai pahen pi moh ba. Nichi ai mychi i kamngochira i nai lawi tleaung hai moh kyh ba. Nichi ai sum hai iy kado theu nai thym khala, nichi ai pasum takengkei kyh ba,” nanai takeng bo.