Read Khumi Chin JEREMIA 19 Bible Online

JEREMIA 19 - Khumi Chin bible

JEREMIA 19

¹ARENG ly chy-y harei van ai nai kai ai pato nai ne. Mymy ly kai hawi vanrei saneng len nai khumi mipuichi theng i lu sa nai miteaung keh phyreichi hawi, pathyp pi nai keung phyreichi ai hawi ai nai py,

²chy-y ka-kawi mary katheu pa-kho tako prei iy, hinnom leaunghawi mang y chei ai nai leu pei. Huni meingtym y kai ly ARENG i leu thui pi ai nai ne.

³ARENG my, “Juda samrangchi hawi Jerusalem mary i khumichi awi, Israela chengchi i Tameuh, ati cheaungkhang sa thai nai keung kai, ARENG i thui nai leu tangai u. Kai ly thai nai khumichi athengra na pa-rei, ka-jei awm parai nai hini meingtym y tym hai ai.

⁴Ati mana nai mo nabaly khumichi ly kai ai khai su iy, Mymychi naimy mychi i amsi pajochi hawi, Juda samrangchi pany vai y nai tameuh takhrachi teng y apathyp nai molam y, hini meingtym y chai nem hai y nai deaungkho y ne. Nichi ly hini meingtym y kamngo by y nai khumichi i thi kawi hai iy,

⁵mychi i cho chanauchi ai leng patlum nai kapathypra talam ai nai, Bala tameuh i vui meingtym ka-sangra y maichamchi sa u nai ne. Mychi i cho chanauchi ai hini bala tameuh teng y mai hawi leng patlum hai ai nai, kai ly mana khala py leu pei vai y, thui py thui vai y, paleung y py dawn y.

⁶Hunai deaungkho y hini meingtym ly Topheth, nanai palau y, hinnom leaunghawi, nanai py palau y, khumi padei nai leaunghawi, nanai palau ai nai neng tym ai, nanai pany u, nanai ARENG my leu pei nai ne.

⁷Kai ly hini meingtym y Juda khumichi hawi Jerusalem mary i khumichi i dawn tau nai ngierei phra hai ai. Nichi ai padei ai hau nai khumichi i kiu y au iy tavai keung y dei hai ai. Nichi i veuchi ly tavochi hawi daichi mawi kasichi i teicha lawm ai.

⁸Kai ly hini mary tlang tleaung y ka-jei awm parai naichi tym hai iy, huni sahawi mang tako nai khumichi ly huni mary i taham si nai niu u panui u ai. Paleung hawi y iy mynkym u ai.

⁹Paleung ka-echi ly mary katanmeuh iy nichi ai tleh ai nai atho sa u ai. Nichi ly mychi tengtawi acha u ai. Mychi i cho chanauchi ai malawn py cha u ai,” nanai leu thui pi ai nai kai ai leu pei nai ne.

¹⁰Naibaly ARENG ly kai ai kaimy hawi vanrei abang nai khumichi i mo y, chy-y pakawi hai phiu chum baly

¹¹nichi teng y ati cheaungkhang sa thai nai keung ARENG my, “Hini chy-y ai tabi teang thai y na pa-rei kawi nai kamta, kai ly hini khumichi hawi hini mary ai kaimy taprei vui ai. Topheth mary y veu up ai nai meingtym by y na pa-rei, khumichi ly huni khumichi i veu up ai nai tla ai.

¹²Hini mary hawi hini mary y awm nai khumichi ai, Topheth mary kamta lawm hai ai,” nanai ARENG my leu pei nai ne.

¹³Jerusalem mary y awm nai yhmchi hawi Juda samrang hawi samrang i yhmchi, mychi i yhm amphu salo y ka-si taukichi ai mui katui leng patlum nai yhmchi hawi, tameuh takhrachi ai kreip hang leih iy talam nai yhm ngiereichi ly Topheth mary kamta chai y nai meingtymchi lawm ai,” napi.

¹⁴Naibaly kai ly leu pei naichi thai hai ai nai ARENG my pato nai, Topheth i nai theu iy Achura yhm apai theung i ly-um y angdo naimy, khumi bawibawichi teng y,

¹⁵Israela chengchi i Tameuh, ati cheaungkhang sa thai nai keung ARENG my, “Nangchi ly paleung tang iy kai i leu tangai u y. Hunai deaungkho y hini mary hawi tengpang i marychi tlang tleaung y, jangni y thui yb nai kamta, pajeng naira tym hai ai,” nanai leu pei nai nichi teng y thui pi bo.