Read Khumi Chin JEREMIA 20 Bible Online

JEREMIA 20 - Khumi Chin bible

JEREMIA 20

¹Immera i chapo pathyp pi nai keung Pashura ly Achura yhm kry nai miteaung keh ne. Ni ly kai, amo my thui nai leu thai nai deaungkho y,

²kai ai khyh pakhau iy Achura yhm theung i Benjamin salo katheu lukau sahawi y, sengkry hawi pakheng ai nai leu pei bo.

³Khawn pa-nyh y Pashura ly kai ai sengkry su pi i kaimy,” ARENG ly nang ai Pashura, nanai amyn pei y, ‘meingtym tleirei y khrukhra hai nai khumi’, nanai amyn pathi bo.

⁴Ati mana nai mo nabaly ARENG mymy kypkyp my, “Kai ly nang ai nangmy i vui py, nangmy i ahawi i vui py, ka-jei hawi nai khumi lawm hai ai. Huni khumi bawibawichi py paleung ka-echi i haisau y dei nai nang niu ai. Kai ly Juda khumi bawibawichi ai, Babulon samrang i kiu y au ai. Ni ly huni khumi phyreichi ai my i pri y langheng y hawi ai i, phyreichi ai ly padei ai.

⁵Kai ly paleung ka-echi ai hini mary i nang nai yhmtheaung katuichi ai lawm hai ai. Hini mary i awm yb nai vawnsaichi hawi yhmtheaung katuichi ai py, Juda samrang i yhmtheaung katuichi ai py Babulon pri y syn hai vui ai.

⁶Pashura awi, nang i vui ly yhm dengtheungchi raurei ang patiu ai i, Babulon pri y ang hawi vui ai. Nang ly huni pri y dei ai. Naibaly nang i thui nai leu ka-chawichi thai nai nangmy i ahawi bawibawichi hawi vanrei, a-up nai avum ai,” nanai leu pei nai Pashura teng y thui pi bo.

⁷Aw ARENG, nang ly kai ai tapawp hyp nai deaungkho y, kai ly tapawp naira avum bo. Nang ly kai tleaung y atho len nai deaungkho y, kai ai eaung vui bo. Khumi luteng my kai ai panui hai nai ne. Nichi ly kai ai kani khengrei preaung u bo.

⁸Kai ly leu thui nai tleirei aeu iy, “Khrukhra naira! Phra naira!” nanai aeu ai tla nai ne. Aw ARENG, kai ly thui tamawn nai hawi panui hai naira avum bo; ati mana nai mo nabaly nang i leu pei nai thai hai nai deaungkho y ne.

⁹Na i py, “Kai ly ARENG ai katami veng ai; mymy i amyn y leu kathui y leang bo,” nanai kai, kathui nai khala, nang i leu ly kai i paleung theung y mai kamta angveaung iy, kai ly huni leu ai paleung theung y pateung me ai nai atho kasa teu i py, pakymme pajau y bo.

¹⁰Kai ly khumichi i leu kamsyh y thui nai raawi thai nai ne. Nichi ly kai ai, “Meingtym tleirei y jei hyn ai hawi nai khumi!” nanai amyn pei iy, “Ni i satang ai peang nai keungchi teng y thai hai u sina!” napi u. Kai hawi amrawi keh nai ahawi ka-dawichi malawn py, kai atlym nai ajeng u bo. Nichi my, “Ni ai achi my li-tapawp pajau lym ai; li hyp naimy patiu iy vawitheung tha pajau ai,” nanai thui u nai ne.

¹¹Na i py aw ARENG, nang ly sa thai naira haiho len nai tavaimi risa kamta, kai mang y asa hai nai deaungkho y, kai ai pahyp y naimy ana nai khumichi ly athei iy atlym u ai. Nichi ly mana khala py eaung u ai ny y. Nichi ly eaung naira ngo pajau y nai deaungkho y, kangji nga u jojo ai. Nichi i kangji ly mana khala py tami pajau ai ny y.

¹²Na i py ati cheaungkhang sa thai nai keung ARENG, nang ly khumichi ai leu meitang naimy chih reng nai keung ne. Nichi i paleung ka-dawnchi pany pi se nai ne. Hunai deaungkho y paleung ka-echi ai nangmy vawitheung tha pi nai ai kai ly niu ai nai ngai. Kai ly kaimy i ka-jo kahm ai nang i kiu y kang au bo.

¹³ARENG ai tahm pasang nai khulym thui u sina! ARENG ai tahm pasang u sina! Mymy ly khumi kamawnchi ai khumi hawi y naichi kiu i nai atleu bo.

¹⁴Kai ai tapen nai kani ly taham si sy! Kai i amhm my kai ai tapen nai kani ly tami veng na sy.

¹⁵Kai i ampo teng y, “Nang ly chapo nga bo!” nanai satang tha iy, kai i ampo ai amo theu hai nai khumi ly amsawi lawi na sy.

¹⁶Huni khumichi ly kapahenra pipi by y naimy ARENG my taphra nai marychi kamta lawm na sy. Tapen y rai khala my kai ai padei y nai deaungkho y, ni ly khawn mang y no hang nai katyn py, kanithun y tavai tareng nai katyn py thai sy.

¹⁷Ati mana nai mo nabaly ni ly kai ai padei lawh teu baly kai i amhm i kajeu ly kai i tapreaung lawm ai.

¹⁸Kai ly ati mana nai y tapen lawh mo? Paleungbi nai hawi ngari kamtang avum ai nai lawn ai a? Kai i heng nai ly kangji kangai hawi deung tlum ai bo a?