Read Khumi Chin JEREMIA 21 Bible Online

JEREMIA 21 - Khumi Chin bible

JEREMIA 21

¹Juda samrang Zedekiah ly Melkhia i chapo Pashura hawi Maaseiah i chapo pathyp pi nai keung Zephaniah nini ai kai teng y pato iy,

²“Babulon samrang Nebukhadnezar hawi ni i tavaimichi ly mary tiu ai nai katanmeuh lawh bo i, ARENG teng y kaichi i vui ahui pi kyh ba. ARENG ly kaichi i vui rengrang ka-ma-ra sa pi baly, Nebukhadnezar ai anaw tan anaw hai lym ai,” nanai takeng.

³Naibaly ARENG ly Jeremia teng y leu pei bo. Jeremia ly my teng y tym nai khumichi teng y, Zedekiah ai thui hai nai ne.

⁴Israela chengchi i ARENG Tameuh my Zedekiah teng y leu pei nai ly “Zedekiah awi, kai ly mary katanmeuh nai Babulon samrang hawi ni i tavaimichi ai tiu ai nai, nang i tavaimichi sum hai ai. Tavai ateaungchi ai ly mary umtang y kachu ai.

⁵Kaimy kypkyp my kaimy i awm nai atho haiho ngierei hawi khrikhri pa-rei kado theu naimy, nangchi ai kang tiu ai.

⁶Hini mary y awm nai khumi bawibawichi ai katamyh vui ai. Khumi hawi tawnbawichi ly ka-jei awm nai no-na y dei u ai.

⁷Tavai takai, tahum takang hawi no kanghawi y dei bawi y nai Juda samrang Zedekiah, ni i bangtangchi hawi khumichi ly mychi ai padei ai ngai nai paleung ka-echi hawi Nebukhadnezar i kiu y patiu hai ai. Nebukhadnezar my py nichi ai padei hai ai. Ami ai py kangheng khai ai ny y, ami ai py pahen pi ai ny y. Hini ly kai, ARENG i thui nai leu ne,” napi.

⁸Naibaly ARENG my kai ai khumichi teng y thui hai nai ly “Tangai u! Kai, ARENG ly nangchi vawi thai ai nai heng nai lam hawi dei nai lam khai pi ai,” napi.

⁹Hini mary y awm nai ngiereichi ly tavai keung y dei u be ai, ti y baly kajeu kanglam hawi no kanghawi y py dei u ai. Na i py mary angam mang y theu iy katanmeuh naimy tiu nai Babulon khumichi teng y, kasum apei nai khumichi ly dei u ai ny y; ati py ne sy, dei y i, heng u ai.

¹⁰Kai ly hini mary ai law tleaung hai y naimy taphra vui ai nai adawn yb bo. Hunichi ai Babulon samrang i kiu y au ai i, ni my py hini mary ai mai leng iy taphra ai. Hini ly kai, ARENG i thui nai leu ne,” napi.

¹¹ARENG my, “Samrang Davida i katu chanauchi napi nai Juda samrang yhm dengtheungchi awi, kai ARENG i leu pei nai tangai u: Nichi ai nangchi my kani tleirei leu meitang hawi tara chih u ai. Lawm naira avum nai khumichi ai ana nai khumichi kiu i nai ama hai ai nai tla. Hunai kamta so y lawh baly nangchi i hawi y nairachi my, kai i kado theu nairachi ly pathym lei y nai mai kamta, angveaung hai ai.

¹³Aw Jerusalem mary,[7] nang ly adymra i lengseaung pui kamta, leaunghawichi salo y asang hawp naimy awm bo. Na i py kai, ARENG ly nang ai kang tiu ai. Nang ly nangmy ai ami my py tiu pajau y, nang i amtangrachi ai py panawi pajau y, nanai thui nai ne.

¹⁴Na i py nang i sa naichi molam y kang pajeng ai. Kai ly nang i samrang yhm y mai kang hai ai. Huni mai ly tengpang sahawi y awm nai ngiereichi kang bebe ai. Hini ly kai ARENG i thui nai leu ne,” napi.