Read Khumi Chin JEREMIA 22 Bible Online

JEREMIA 22 - Khumi Chin bible

JEREMIA 22

¹ARENG ly kai ai Juda samrang yhm y pato iy, samrang Davida i areng atehra y ateh nai Juda samrang hawi vanrei my i bangtangchi, Jerusalem mary i khumichi teng y thui pi ai nai leu ang pei nai ly:

³“Kai ARENG ly nangchi ai leu meitang naimy kahawichi sa u ai nai leu kang pei. Nangchi ly katapawpra avum nai khumichi ai amo hai u. Cheng takhrachi, nuro nukaichochi, ti y baly neampachy lumaichi ai teng y nairachi hawi ana nairachi py so u moh. Hini kachai meingtymra y kamngo by y nai khumichi ai padei u moh.

⁴Nangchi ly kai i reita leu pei nai kamta sa u khyp lawh baly, samrang Davida kangpreangchi ly samrang y lawm u jojo ai. Huni bo y nichi ly mychi i bangtangchi, khumichi hawi vanrei keaungngo ka-richi, keaungngochi atang iy, huni samrang yhm katheu pa-kho mang kun theu u aninau ai.

⁵Na i py nangchi ly kai i leu tangai u y lawh ai nabaly, hini samrang yhm ly phra seaungkhrang ai, nanai nangchi teng y kang pasawi kheih bo. Hini ly kai, ARENG i thui nai leu ne,” napi.

⁶“Kai i vui Juda samrang i yhm ly Kilead pri kamta py, Lebanon mawi saleung kamta apu i py, kai ly huni meingtym ai khumi angso savai tlang nai daichi ka-vym lawm hai ai.

⁷Huni samrang yhm taphra ai nai khumichi kapato ai. Nichi ly atiuchi syn naimy apu parai nai saitleang yhmmawm puichi ai tameang pawn iy, mai theung y aphi u ai.

⁸“Naibaly cheng takhra khumi neangneangchi ly huni sahawi mang tako prei naimy, hini mary pui ai ati mana nai y kai ARENG ly hina naichi kasa lawh mo, nanai nichi adeng u leungtang ai.

⁹Nangchi ly nangmychi i Tameuh, napi nai kai hawi asa nai Leu Maikawm ai khai su iy, tameuh takhrachi ai chiu u lawh nai deaungkho y, hina nai lawm nai py arum u leungtang ai.

¹⁰Juda khumichi awi, samrang Josia molam y meikatui tlo u moh; ni i dei nai molam y py paleung si hai u moh. Na i py ni i chapo Joahaz i vui y khri pa-rei, meikatui tlo hai u. Paleung ka-echi ly nichi ai deung ka-kan hawi u jo ai. Ni ly my i tapen nai meingtym ai, mana khala py niu ali bi ai ny y.

¹¹Juda samrang lawm iy ampo Josia i meingtym atheng nai chapo Joahaz i molam y ARENG my, “Ni ly hini meingtymra i nai deung ka-kan theu veng bo.

¹²Ni ly paleung ka-e my hawi vui nai pri y my dei ai. Momang y mana khala py, hini pri niu ali bi ai ny y leang bo,” napi.

¹³Amy i yhm ai teng y nai leaungsai hawi sa nai py, amy i salo sambeuchi ai teng y nai ka-dawn hawi sa iy, amy i yhm deaungpachi ai jawm my sa hai nai khumi, huni khumichi i kalop sa nai vang pei y nai khumi ly taham si nai ne.

¹⁴Salo sambeura y takun puichi hawi kai ly kaimy awm ai nai yhm pui harei kasa ai, nanai thui nai khumi ly taham si. Ni ly huna nai thui chum baly my i yhm y thaibeng pa-khochi tleh bo. Saitleang keung hawi khangpuichi dang naira sa iy, an kamsen pathym nai ne.

¹⁵Khumi takhrachi i yhmchi tleaung y apu keh pa-rei, saitleang keung hawi yhmchi sa pajau nai deaungkho y nang ly hawi keh nai samrang lawm bo a? Nang i ampo ly amo theu parai naimy awm iy hawi naira hawi leu meitang teaung jojo nai ne. Ni i sa nai ngiereichi ly eaung naira nga.

¹⁶Ni ly khumi kamawnchi i ka-jo ka-thui padyh padawi pi nai deaungkho y, atitichira py aly naira nga bo. Hini ly ARENG ai pany naira i hawi naira ne.

¹⁷Na i py nang ly amy i vui dawn khyh nai paleung hawi, amy hawi ai naira naini paleung apei khyh nai ne. Kamngo by y nai khumichi ai padei iy, amy i chengchi ai khrikhri pa-rei ana, nanai ARENG my thui bo,” napi.

¹⁸Hunai deaungkho y Josia i chapo Juda samrang Jehojakim i molam y ARENG my thui nai ly “Ni dei nai khala y ami py paleung si vo tangam u ai ny y. ‘Ka-jei hawi parai na, kai i ahawi awi, ka-jei hawi parai na!’ nanai ami py aawi u ai ny y. Ni i vui y ami py vo hai ai ny y. ‘Aw kai i areng! kai i samrang,’ nanai aawi nai py awm ai ny y.

¹⁹Keaungngo kano kasau kadei ai veu pavum nai kamta, ni ai ryh iy, Jerusalem mary apai angam mang y aphi u vui ai,” nanai ne.

²⁰Jerusalem mary i khumichi awi, nangchi i amsawi amnaichi ly tavai sum u ai. Hunai deaungkho y nangchi ly Lebanon mawi saleung y lyn u iy kahau u. Bashan pri mang y chei iy aeu u. Moba pri mawichi salo mang raawi pajeng parai naimy kaau u.

²¹Nangchi nang chawn nai thym khala y, ARENG ly nangchi ai pany hai pi bo. Na i py nangchi ly tangai u y. Nangchi ly deaungdichy khala i dengdairei, hina nai kamta sa u jojo. ARENG i leu ai mana khala py tangai ai nai ngai u y.

²²Nangchi ai lu sa nai keungchi ai ly ali y pakheang pawn ai. Nangchi i amsawi amnaichi ly langheng y patiu nai avum u ai. Nangchi i sa nai hawi y nai saichi molam y nangchi i mary ly tahm anem iy kangji nga ai.

²³Nangchi ly Lebanon mawi i syn nai saitleang keungchi sala y chymme naimy awm u ai. Na i py deaungdi tapen ai achai nai neampachy kamta, no patang naira avum nai khala, nangchi ai ly khri pa-rei pahen ai nai hawi ai.

²⁴ARENG ly Jehojakim i chapo Juda samrang Jehojakhin ai, “Nang ly kai i lamtang kiu y awm nai pajawp typ nai ka-ma-ra kiusabyh ne lawh teu i py, kai ly Tameuh kangheng ne nai y, kai ly nang ai kang pajiu vui ai.

²⁵Nang ai padei ai ngai nai khumichi, nang i jei nai khumichi i kiu y kang au ai. Nang ai Babulon samrang Nebukhadnezar hawi, my i tavaimichi i kiu y kang au ai.

²⁶Kai ly nang hawi nang i amhm ai nangchi chun nai meingtym ny y nai pri y kang paryh vui ai. Nangni ly huni pri y dei hawi mei ai.

²⁷Nangmy ni i kadeaung nai pri y mana khala py, tym hawi ali teang ai ny y,” napi.

²⁸Jeremia my, “Samrang Jehojakhin ly ami py aly ngai y iy aphi su nai chy-y ka-kawi kamta lawm lawh bo a? Naibaly ni hawi ni i cho chanauchi ly mychi pany vai y nai pri y, pri pala vui nai bo a?

²⁹Aw pri, aw pri, aw pri! ARENG i leu pei nai tangai ba.

³⁰“Hini khumi ly cho chanau so y ai nai pajeng naira avum bo. Ni ly mana khala py eaung naira ngo y nai khumi lawm ai. Samrang Davida y amtym ai nai hawi Juda pri y peang ai nai katu chanauchi ngo y ai. Hini ly kai, ARENG i thui nai leu ne,” napi.