Read Khumi Chin JEREMIA 23 Bible Online

JEREMIA 23 - Khumi Chin bible

JEREMIA 23

¹Mymy i khumichi ai taphra iy ahei hai phro nai peang nai keungchi i tlang tleaung ARENG my khai yb nai tara chih naira ly mana tanrei jei ai hawi na mo ly!

²Mymy i khumichi ai kry ai tla nai samrang kangsochi teng y, Israela chengchi i ARENG my, “Nangchi ly kai i khumichi ai khen y; kai i khumichi ai patheu iy ahei hai bo. Huna nai nangchi i hawi y sa nai molam y, nangchi ai pajeng ai.

³Kai ly kai i khumichi ai ahei hai nai prichira i awm rai naichi ai kala iy, mychi i pri y katha ali teang ai. Nichi ly cho chanau neangneang sa iy, khumi peung u ai.

⁴Kai ly nichi ai kry ai nai peang nai keungchi kakhai pi ai. Kai i khumichi ly jei hyn u ai ny y. Kai ly nichi ai kapajeng ali bi ai ny y. Hini ly kai, ARENG i thui nai leu ne,” napi.

⁵ARENG my, “Davida i hawi nai katu chanau leaungrei ai samrang y palyn nai neng tym takengkei ai. Huni samrang ly cheng parai naimy peang iy, pri verei y leu meitang adyh adawi naimy sa pi ai.

⁶Huni samrang my peang nai thym khala y Juda khumichi ly chymme naira awm ai i, Israela khumichi ly tlamsa naimy awm u ai. Naibaly huni samrang i amyn ly ‘Kaichi ai atleu pi nai ARENG,’ nanai palau u ai.

⁷ARENG my, “Khumichi my kai ai ly Israela khumichi ai Aikupta pri i dengdairei pahawi nai keung Tameuh kangheng ne, nanai mana khala py vaineng abeu u y nai neng tym ai.

⁸Nichi ly huna nai tleaung y kai ai ly Israela khumichi ai tosyh pri mang i dengdairei py, nichi ai ahei hai nai pri takhrachira i nai py, pahawi ali teang nai Tameuh kangheng palawn iy vaineng abeu u ai. Naibaly nichi ly mychi i saleaung khutengra y awm ai nai nga u ai,” napi.

⁹Amochi i molam y hina nai thui pi bo. Kai i paleung ly ama i, kai i hiuchi ly kaso theu naimy awm bo. ARENG deaungkho y py, mymy i leu pei nai kachaichi deaungkho y py, kai ly kreip hang nei ala iy pavui nai khumi hawi atawm nai ne.

¹⁰Achi i pri ly ARENG i tlang tleaung y ka-ym by y nai khumichi hawimy kawi na bo. Nichi ly teng y naichi sa iy, mychi i sa thai naira ai teaung u atyhtyh nai ne. Achi i pri ly ARENG i amsawi lawi nai deaungkho y, vo tangam naimy tawnbawichi sui tlai naira py, jengha na veng bo.

¹¹ARENG my, Amochi hawi pathyp pi nai keungchi teng y tameuhchi by y leang bo. Achura yhm theung y malawn py, hawi y nairachi sa nai kai ly niu nai ne.

¹²Nichi i tako nai lam ly panai iy vengpam ai. Kai ly nichi ai athei iy atlym hai ai. Nichi i tlang tleaung y ka-jeira tym hai ai. Nichi ai pajeng ai nai neng kani tym ai. Hini ly kai ARENG i thui nai leu ne,” napi.

¹³Samari mary y awm nai amochi i amso ngai nai ly kaniu bo. Nichi ly Bala tameuh i amyn y leu thui iy, kai i khumi Israela chengchi ai lam tamang hai u nai ne.

¹⁴Na i py Jerusalem mary i amochi ly huni khumichi tleaung y malawn py, hawi y keh nairachi sa u nai kaniu. Nichi ly ami i aju chanauchi taphra iy ka-chawi thui u. Nichi my khumichi ai teng y naichi sa ai nai atho pei u; hunai deaungkho y ami py, amy i hawi y sa naichi anawn u y nai ne. Nichi bawibawi ly kai i mei ka-niu y Sodom mary i khumichi hawi atawm u bo. Jerusalem mary i khumichi ly Komora mary i khumichi kamta, kamngo sa u bo,” napi.

¹⁵“Hunai deaungkho y ati cheaungkhang sa thai nai keung kai, ARENG ly Jerusalem mary i amochi molam y leu pei nai ly: Nichi ai dona keungchi kapacho ai; dei asi abawi nai tui py nei hai ai. Ati mana nai mo nabaly nichi ly pri verei y Tameuh ai pany y nai leaungsaichi ahei nai deaungkho y ne,” napi.

¹⁶Ati cheaungkhang sa thai nai keung ARENG my Jerusalem mary i khumichi teng y, “Amochi my nangchi ai athang khai hai atyhtyh nai deaungkho y, nichi i leu tangai u moh. Nichi ly mychi i paleung theung y dawn nai kamta thui u nai teu, kai i thui nai leu ny y leang.

¹⁷Nichi ly kai i leu tangai ai nai akhi nai khumichi teng y, ‘Nangchi i vui atitichira y amsym ai, nanai,’ thui u jojo. Paleung tang naichi teng y py, ‘Nangchi i tlang tleaung y mana mo khala py, ka-jeira tym hai ai ny y,’ nanai thui u nai ne,” napi.

¹⁸Kaimy, “Hini amochi theung y ARENG i kangviu y dawn tau naichi pany nai ami py by y; mymy i leu pei nai thai iy pany thai nai ami py by y. Nichi ly mana khala y py ARENG i thui nai leu ai tangai y, tahm py khai y.

¹⁹Mymy i kado theu naira ly khumi hawi y naichi i lu y aho nai ali kamchai hawi atawm nai ne.

²⁰Huni kado theu naira ly mymy i sa ai tau nai ngiereichi amcheang y ryrei ly rym lawh ai ny y. Hunichi ai mymy i khumichi ly tym ai nai neng kani khala y, chaipyn pa-rei pany u ai,” napi.

²¹ARENG my, “Hini amochi ly kaimy pato y i py thui u nai ne. Nichi teng y ati leu sai py pei y i py, kai i amyn y leu thui u bo.

²²Nichi ly kai i kangviu y dawn tau naichi pany u lawh i khyly, kai i leu pei naichi kai i khumichi teng y thui pi ai i, mychi i hawi y sa naichi hawi, mychi i kamngochi khai su pajau ai.

²³“Kai ly meingtym harei y awm nai ny y, meingtym tleirei y awm nai Tameuh ne.

²⁴Kai i niu pajau y nai meingtymra y ami py aheu pajau y. Kai ly kani hawi khaileaung y awm nai meingtym tleirei y awm, nanai nangchi pany u y nai sai a?

²⁵‘Kai amang amang, kai amang amang,’ nanai mychi i amang mang y kai i leu pei nai thai, nanai kai i amyn y ka-chawi thui nai amochi i leu kai pany.

²⁶Hini amochi ly mychi phym u nai leu ka-chawichi hawi, kai i khumichi ai mana tanrei lam tamang hai u ai rai mo?

²⁷Mymychi i amsi pajochi ly kai ai tami vui iy ala tameuh ai chiu u nai kamta, nichi ly mychi i thui nai amangchi my, kai i khumichi ly kai ai tami hai pajau ai, nanai nichi athang khai u lawh.

²⁸Amang amang nai amo ly my i niu nai ly amang teu y, nanai thui ai nai avo khyp. Na i py kai i leu pei nai thai nai amo ly huni leu pei nai ai meitang khyp naimy thui pi ai nai tla. Chohnei hawi pata baly choh ali ly ati hawi naira awm mo?

²⁹Kai i leu pei nai ly mai hawi atawm iy, lengseaung ai atum phiu thai nai chaki hawi atawm.

³⁰Mymychi tengtawi katheu u nai leuchi ai, kai i leu pei nai kamta thai hai nai amochi ai kai ly ka-awi sa ai.

³¹Mymychi i leu ai kai i leu kamta katheu nai amochi ai py, ka-awi sa ai.

³²Kai, ARENG my leu pei naichi tangai u! Ka-chawi cheichei abawi nai mychi i amang satang thui nai amochi ai kai ly ka-awi sa ai. Nichi ly huni amangchi ai ka-chawi naimy amlyh iy thui nai deaungkho y, kai i khumichi ai lam tamang hai u nai ne. Kai ly nichi ai kapato y, chei ai nai py leu pei y. Hunai deaungkho y nichi ly khumichi i vui y, ati sai py hawi naira by y. Hini ly kai, ARENG i thui nai leu ne,” napi.

³³ARENG my kai teng y, “Jeremia awi, kai i khumichi theung i leaungrei my mo, amo my mo, pathyp pi nai keung my mo, ‘ARENG i leu pei nai ly ati mo?’ nanai ang deang nai khala y, ‘Nangchi ly ARENG my kai vui mynji[8]ne nai y, nangchi ai paleang vui ai,’ nanai pathang pi ba.

³⁴Amo my mo, pathyp pi nai keung my mo, khumi leaungrei my mo, ‘ARENG i mynji,’ nanai leu sai teaung lawh teu baly, kai ly huni khumi hawi, ni i yhm dengtheungchi ai kapajeng ai.

³⁵Nichi huna nai thui ai nai tleaung y ly mychi i ahawichi hawi suibang ka-meaung teng y, ‘ARENG my ati pathang pi mo? ARENG my ati leu pei mo?’ nanai adeng ahui u ai nai tla.

³⁶Hunai deaungkho y, ‘ARENG i mynji,’ nanai nichi thui ai nai tlo y. Ati mana nai mo nabaly khumi leaungrei my huna nai thui lawh teu baly, kai i leu pei nai ai huna nai kamta thui nai keung ai ly mynji lawm hai angchi khyp ai. Khumichi ly mychi i Tameuh, ati cheaungkhang sa thai nai keung ARENG, Tameuh kangheng i leuchi ai tamang hai piupa u bo.

³⁷‘ARENG ly nangchi ai ati pathang pi mo? ARENG ly ati pathang pi mo?,’ nanai amochi teng y leu deng ai nai ARENG my Jeremia teng y leu pei bo.

³⁸Nichi ly kai i leu pei nai tangai u y lawh baly, “ARENG i mynji,” nanai leu teaung nai khumichi teng y, hina nai thui pi.

³⁹Kai ly nichi ai akhi iy nichi hawi nichi i amsi pajochi ai pei pi nai mary hawi vanrei, kai teng i nai kamlo y aphi vui ai.

⁴⁰Nichi ly mana khala py tami pajau y na pa-rei, deungtasarei tahm anem iy, kangji nga u ai,” napi.