Read Khumi Chin JEREMIA 24 Bible Online

JEREMIA 24 - Khumi Chin bible

JEREMIA 24

¹ARENG ly Achura yhm mo y panui nai thaidu athai teaung nyhrei kai ai patei nai ne. (Huni neng ly Babulon samrang Nebukhadnezar ly Jehojakim i chapo Juda samrang Jehojakhin ai Juda miteaung kehchi, Kupe kakawpchi, kalopra y kawp keh nai khumichi hawi vanrei, Jerusalem mary i dengdairei Babulon pri y langheng hawi nai bo i neng ne.)

²Angchei i teaung y ly myn manme nai thaidu athai kahawichi awm; takhra teaung hareira y ly cha ai nai ngo y nai veaungrang nai thaidu athaichi awm.

³Hunaibaly ARENG my kai ai, “Jeremia awi, nang ly ati niu mo?” nanai deng. Kaimy ly “Thaidu athaichi kaniu; Athai kahawichi ly khri pa-rei hawi iy, veaung nai thaidu athaichi ly cha ai nai ngo y na pa-rei du na bo,” nanai kapathang.

⁴Hunai deaungkho y ARENG i leu ly kai teng y ang tym,

⁵“Babulon mary mang y abang naichi ly thaidu athai kahawichi hawi atawm, nanai Israela chengchi i Tameuh kai, ARENG my adawn pasym iy, kai ly neaung hawi parai naimy kry ai.

⁶Nichi ai kry iy hini pri y kapahawi ali teang ai. Kai ly nichi ai taphra y naimy kapalum ai; akyn vui y naimy kaui ai.

⁷Kai ly ARENG ne, nanai pany ai ngai nai paleung nichi teng kapei pi ai. Hunaibaly nichi ly kai i khumichi lawm u ai i, kai py nichi i Tameuh lawm ai. Ati mana nai mo nabaly nichi ly paleung hawi verei, kai teng y vawi u teang ai nai deaungkho y ne.

⁸Juda samrang Zedekiah, ni i aheaung apai bangtangchi hawi, hini pri y awm jo nai, ti y baly Aikupta pri y ang pyn nai Jerusalem mary i khumichi ai ly kai, ARENG my cha ai nai ngo y na pa-rei veaung nai thaidu athaichi kamta kapalawn ai.

⁹Kai ly khaileaung pri y awm nai khumi cheng cheaungkhangchi kaso tahyn theu na pa-rei ka-jei awm parai nai, nichi i tlang tleaung y tym hai ai. Nichi i satang ai ly amnui tabu lawm hai ai. Nichi ai ahei hai nai meingtym ngiereichira y py, nichi i amyn y teaung iy, pasawi patau u ai.

¹⁰Nichi hawi nichi i amsi pajochi teng y pei nai pri y leaungrei ai py kangheng tleaung y pa-rei, kai ly nichi ai tavai takai ka-jeira py, tahum takang hawi no kanghawi py katym hai ai,” napi.