Read Khumi Chin JEREMIA 25 Bible Online

JEREMIA 25 - Khumi Chin bible

JEREMIA 25

¹Josia i chapo Juda samrang Jehojakim i samrang lyn nai palyh saneng y, Jeremia ly Juda khumi bawibawichi molam y, ARENG teng i leu pei nai nga bo. (Huni saneng ly Babulon samrang Nebukhadnezar i samrang lyn angchei nai saneng ne.)

²Amo Jeremia my Juda khumi bawibawichi hawi Jerusalem mary i khumi bawibawichi teng y,

³“ARENG ly Ammon i chapo Juda samrang Josia i samrang lyn nai saneng holai thom ka-so vaini khrairei, saneng apom phai thomrei sala y, kai teng y leu ang pei nai ne. Kaimy py mymy i leu pei naichi ai, nangchi teng y kang thui pi bo. Na i py nangchi ly tahm khai u y.

⁴ARENG ly mymy i miseaung amochi ai, nangchi teng y avaw avawrei ang pato pi teu i py, nangchi ly nichi i leu tangai u y, tahm py khai u y.

⁵Nangchi ly nangmychi hawi amsi pajochi teng y, ARENG my pei nai pri y deung ka-kan awm u ai nai, huni amochi ly nangchi i heng nai leaungsai hawi, sa nai sai hawi y naichi ai, hi vui ai nai ang thui pi nai ne.

⁶Nichi ly nangchi ai tameuh takhrachi teng y chiu u y ai nai py, nangmychi i sa nai mynchi ai chiu u nai y ARENG ai kado theu hai y ai nai py, ang thui pi bo. Nangchi ly ARENG i leu tangai u lawh baly, mymy ly nangchi ai pajeng ai ny y.

⁷Na i py nangchi ly mymy i leu tangai u y, nanai ARENG mymy kypkyp my thui nai ne. Nangchi ly mymy i leu tangai ai nai tleaung y ly nangmychi i sa nai mynchi hawi kado theu hai iy, mymy i pajeng naira ly nangmychi i tlang tleaung y tym hai lawh bo.

⁸“Hunaibaly nangchi ly mymy i leu tangai ai nai ngai u y nai deaungkho y, ati cheaungkhang sa thai nai keung ARENG my,

⁹‘Kai ly tosyh mang i khumi chengchi hawi, kai i miseaung Babulon samrang Nebukhadnezar ai palau iy, Juda pri khumi bawibawichi hawi, pri deaungpa i khumi cheng bawibawichi ai tiu hai ai. Kai ly hunichi ai taphra iy phra seaungkhrang hai jojo nai deaungkho y, niu naichi ly jei naimy kaso tahyn theu u ai. Hini ly kai, ARENG i thui nai leu ne.

¹⁰Kai ly amo theu naimy aeu nai raawichi hawi apom pawira i katynchi py, sum sumjang katynchi py, savai tlang hai ai. Huni bo y maisi kangvang py padei vui ai.

¹¹Hini pri verei ly phra seaungkhrang naimy awm iy, niu nai khumichi jei hyn naira lawm ai. Pri deaungpa i khumi cheng bawibawichi py, saneng vui saryh tym pa-rei Babulon samrang i miseaung y achei u ai.

¹²Naibaly kai ly Babulon samrang hawi khumichi teng y, mychi i sa tamang nai kamngo molam y pajeng ai. Nichi i pri ai taphra iy deungtasarei phra naimy awm hai ai.

¹³Kai ly hini khumi chengchi ai vaichi khala kapajei nai kamta, khumi cheng cheaungkhangchi ai Jeremia my thui pi nai pajeng nairachi hawi py, hini cha-iu theung y abawi nai pajeng nairachi hawi py, kaparip ai.

¹⁴Khumi neangneangchi hawi sa thai naira awm nai samrangchi teng y miseaung achei u ai. Kai py nichi ai mychi i hawi y sa nai kapatlai ai,” napi.

¹⁵Israela chengchi i ARENG Tameuh my kai teng y, “Nang ly kai i kado theu naira kawi nai hini kreip hang khau ai, kai teng i nai la iy nang ai kang pato nai khumi cheng cheaungkhangchi ai panei.

¹⁶Huni kado theu naira hang nei u nai khala y, nichi ly kaimy pato nai tavai ka-jeira deaungkho y pavui u ai i, tliu charum charei u ai,” napi.

¹⁷Hunai deaungkho y kai ly ARENG kiu i nai khau la iy, kai ai mymy i pato nai khumi cheng cheaungkhangchi teng y, huni kado theu naira hang kapanei nai ne.

¹⁸Juda samrangchi, miteaung kehchi hawi vanrei, Jerusalem mary hawi Juda mary i awm nai ngiereichi ly niu nai khumichi i vui y kaso theu jei hyn ai hawi nai khutaha daichi ka-vym lawm bo. Huni khumichi i amynchi py khumichi my pasawi patau naira y teaung nai leu lawm hai nai, huni kado theu nai hang nei u bo. Vai khrairei huni marychi ly hunai kamta awm jo nai ne.

¹⁹Kreip hang khaura i kado theu naira hang nei ai tla nai takhra khumichi i vuikanai ly: Aikupta pri i samrang, samrang i bangtangchi hawi lu sa nai keungchi, Aikupta chengchi hawi Aikupta pri y awm nai cheng takhra khumi ngiereichi, Uz pri i samrang bawibawichi, Philistin pri i Asakelon mary, Kaza mary, Ekron marychira i samrang bawibawichi hawi Asadod mary i khumi kamthum kamlai ngiereichi, Edom pri, Moba pri hawi Ammon prichira i khumi bawibawichi, Turu hawi Sidon samrang bawibawichi, Pangli vai Mrethe pangli tengtang y peang nai samrang bawibawichi, Dedan mary, Tema mary hawi Buza marychira i khumi bawibawichi, Lu i sam kadawi avau nai khumi ngiereichi, Arabia samrang bawibawichi, khutaha daichi ka-vymra y awm nai cheng takhrachi ai peang nai samrangchi, Zimri pri, Elam pri hawi Media pri i samrang bawibawichi, Tosyh mang y awm nai, kamlo kangsara i awm nai samrang bawibawichi ne. Khaileaung pri y awm nai khumi chengchi ly huni kado (...)

²⁷Naibaly ARENG my kai teng y, “Israela chengchi i Tameuh, ati cheaungkhang sa thai nai keung ARENG ly huni khumichi ai pavui iy paleu nanai pa-rei, nichi teng y kaimy pato nai tavai ka-jeira molam y atlym iy ang thau pajau y na pa-rei, huni kado theu naira hang nei u ai nai leu ang pei, nanai thui pi.

²⁸Nichi ly nangmy kiu i khau la iy nei ai nai akhi u lawh baly, ati cheaungkhang sa thai nai keung ARENG my nei hai nai ne, nanai thui pi.

²⁹Kai ly taphra nai kakop ai, kai i amyn apu nai mary pui dengdairei amteaung ai. Huni mary i khumichi ly pajeng naira avum u ai ny y, nanai athang khai u a? Ny y leang. Kai ly khaileaung pri y awm nai khumi bawibawichi teng y tavai ka-jeira kapato ai i, nichi ly pajeng naira avum u takengkei ai. Hini ly kai ARENG thui nai leu ne.

³⁰“Aw Jeremia awi, nang ly kai i leu pei nai ngiereichi ai, hini khumichi teng y thui pi ai nai ly ‘ARENG ly kani khusang mang dengdairei kani pajyh hai ai. Salo ka-sang kani khusang mang dengdairei katyn amsau hai ai. Mymy ly mymy i khumichi ai ryh hai ai. Mymy ly kreip athai nip nai khumi kamta aeu ai. Khaileaung pri y awm nai khumi bawibawichi ai py, aeu hai ai.

³¹ARENG ly khumi cheng cheaungkhangchi ai tara pasau ai. Mymy i raawi ly khaileaung katem y khrairei avah na ai. Mymy ly khumi bawibawichi ai chih iy khumi hawi y naichi ai padei ai. Hini ly ARENG i thui nai leu ne,’ nanai thui pi,” napi.

³²Ati cheaungkhang sa thai nai keung ARENG my, “Ka-jeira ly pri harei bo baly pri harei mang y ahei ai. Ali kamchai pui ly khuteng taki dengdairei aho ai,” napi.

³³Huni kani tym nai khala ly ARENG my padei nai khumichi i veuchi ly khaileaung pri verei y ahei ai. Nichi i vui ami py paleung si hai ai ny y; veuchi py la iy up ai ny y. Huni veuchi ly si eichi pakheng achu nai kamta, khaileaung salo y awm ai.

³⁴Kamkawm luchi awi, vo tangam u; kai i khumichi ai kry nai beram typ nai keungchi awi, khri pa-rei aeu u! Paleungsi naimy spryhchira y jawn u tlawntlan. Ang padei ai nai neng tym bo i, nangchi ly beram kataichi kamta dei u ai.

³⁵Hu y ly nangchi i vui tleaung ai nai lam awm ai ny y.

³⁶Nangchi ly vo tangam naimy aeu u ai. Ati mana nai mo na baly nichi i prichi ai kado theu nai hawimy taphra iy, nichi i tlamsa nai pri ai phra hai seaungkhrang veng nai deaungkho y ne.

³⁸Khrangsi ly my i tapiu khai su nai kamta, ARENG ly mymy i khumichi ai khai su veng bo. Ka-jei awm parai nai tavai takai hawi, ARENG i khri pa-rei kado theu nai molam y, nichi i pri ly khutaha daichi ka-vym lawm veng bo.