Read Khumi Chin JEREMIA 26 Bible Online

JEREMIA 26 - Khumi Chin bible

JEREMIA 26

¹Juda pri y Josia i chapo Jehojakim samrang y lyn nai bo, kra y nai sala y kai teng y,

²ARENG ly hina nai leu ang pei. “Achura yhm apai theung y angdo iy, huni meingtym y Juda marychira i dengdairei ARENG i yhm y chiu ai nai ang jeu u nai khumichi teng y, kai i leu pei naichi thui pi. Leu sairei py takhawi moh.

³Khumichi ly tangai iy mychi i hawi y nai saichi khai u su lym ai. Nichi hunai nai kamta khai u su lawh teu baly, kai ly nichi i hawi y nai molam y katamyh ai nai paleung ka-dawn amtlau vui ai,” napi.

⁴ARENG my huni khumichi teng y thui pi ai nai kai teng y leu ang pei nai ly “ARENG my, nangchi ly kaimy pei nai leuchi tangai iy patawm u.

⁵Nangchi teng y kaimy kang pato taleang kang pato taleang bi nai, kai i miseaung amochi leu ai tahm pateng ai nai tla. Nangchi ly nichi i leu mana khala py tangai u y lawh.

⁶Nangchi ly tangai y veangveang lawh baly, kai ly huni Achura yhm ai Siloh kamta lawm hai ai. Khaileaung pri y awm nai khumi cheng cheaungkhangchi py, pasawi patau naira y hini mary i amyn teaung u ai, nanai amti pi,” napi.

⁷Pathyp pi nai keungchi, amochi hawi khumi bawibawichi ly Achura yhm theung y, kai i thui pi nai leuchi thai u nai ne.

⁸Kai teng y ARENG my leu pei nai ngiereichi kathui pi pateang pajau nai hawimy, pathyp pi nai keungchi, amochi hawi khumichi ly kai ai patiu iy, “Nang ly hini leuchi thui nai molam y dei ai nai ataing!

⁹Ati mana nai y Achura yhm ly Siloh avang kamta lawm ai, nanai hawi, huni mary ai ly taphra vui iy, khumi angso savai tlang naira lawm ai, nanai py, nang ly ARENG i amyn y thui katheu lawh a? nanai aeu bo. Naibaly khumichi ly Achura yhm theung y achu iy, kai ai katanmeuh bo.

¹⁰Juda miteaung kehchi ly huni atitichi tym nai thai u nai khala y, samrang yhm dengdairei jeu iy, Achura yhm katheu pa-kho kangthara y meingtym la u bo.

¹¹Naibaly pathyp pi nai keungchi hawi amochi my, lu sa naichi hawi khumichi teng y, “Hini khumi ly achi i mary ai ka-awi leu thui nai deaungkho y, padei ai nai ataing; ni i thui nai leu nangchi thai u bo,” napi.

¹²Huna nai khala y kai ly lu sa naichi hawi khumichi teng y, “Hini Achura yhm hawi hini mary ai ka-awi sa iy, kai i thui nai ly nangchi thai u bo. Huni leuchi ly kai ai ARENG my ang pato iy thui hai nai leuchi ne.

¹³Nangchi ly nangmychi i amhi amtlau nai sai takhra iy, nangmychi i ARENG Tameuh i leu tangai u ai nai tla. Huna nai kamta sa u baly mymy ly nangchi ai taphra ai, nanai leu pei yb teu i py, mymy i leu amtlau hai vui ai.

¹⁴Kai ly nangchi i kiu theung y awm! Nangchi i paleung y teng, nanai athang khai nai kamta, kai i tlang tleaung y so.

¹⁵Na i py kai ai padei ai nai tau u lawh baly, nangchi hawi hini mary i khumi bawibawichi ly kamngo by y nai khumi ai padei nai molam y kamngo tla u ai, nanai hawihai palai apany u. Ati mana nai mo nabaly kai ai pato iy nangchi teng y hini leu thui hai nai keung ly ARENG ne nai deaungkho y ne,” napi.

¹⁶Huna nai khala lu sa naichi hawi khumichi my pathyp pi nai keungchi hawi amochi teng y, “Hini khumi ly achi i ARENG Tameuh i amyn y achi ai leu ang thui pi nai deaungkho y, ni ai padei ai nai avo y,” nanai thui u bo.

¹⁷Naibaly mary i miteaung keh phyreichi ly ang thau u iy, khumi mipui awm achu naichi teng y,

¹⁸“Juda samrang Hezekia deung y Morise avang i amo Mikha ly khumi bawibawichi teng y ati cheaungkhang sa thai nai keung ARENG my, ‘Zion mawi ly li khaileaung kamta, thawn piu nai avum ai; Jerusalem mary ly lengseaung ka-nawi pakheng achu nai lawm iy, Achura yhm mawi py thengreung lawm ai,’ nanai ang thui pi bo.

¹⁹Juda samrang Hezekia hawi khumichi ly Mikha ai padei u y. Huna nai padei ai nai tleaung y Hezekia ly ARENG ai jei nai deaungkho y, mymy i kangai sa ai nai atho sa nai ne. Huna nai khala y ARENG ly nichi i tlang tleaung y ka-jeira tym hai ai, nanai leu pei yb teu i py, mymy i paleung amtlau hai bo. Vai achi ly amychi i tlang tleaung y jei ai hawi parai nai ka-jeira tym ai nai sa u lawh ly” napi u bo.

²⁰(ARENG i amyn y leu thui nai keung takhra khumi leaungrei awm rai. Huni khumi ly Semajah i chapo, Keriah Jearim mary i Uriah ne. Ni ly hini mary hawi hini khumi chengchi ai ka-awi sa iy, Jeremia i thui nai kamta thui teang.

²¹Ni i leu ai samrang Jehojakim, ni i bangtangchi hawi tavaimichi thai u nai khala y, samrang ly ni ai padei ai nai atho sa bo. Na i py Uriah my huni satang thai i, jei nai y Aikupta pri y preang vui bo.

²²Samrang Jehojakim py Uriah ai patiu ai nai Akhabo i chapo Elanathan hawi khumi phyreichi ai Aikupta pri y pato.

²³Nichi ly Uriah ai Aikupta pri i dengdairei samrang Jehojakim teng y pahawi ali teang i, samrang ly ni ai padei iy ni i veu ai ly khumichi i tapreaung y aphi hai su bo.)

²⁴Na i py kai ly Shaphan i chapo Ahikam my asa hai nai deaungkho y, khumichi i kiu y au i, padei y nai ne.