Read Khumi Chin JEREMIA 28 Bible Online

JEREMIA 28 - Khumi Chin bible

JEREMIA 28

¹Huni saneng napi nai, Zedekiah i samrang lyn nai palyh saneng, pa-ngo lo y Azura i chapo Kibeon mary y awm nai amo ananiah ly Achura yhm theung y awm nai pathyp pi nai keungchi hawi, khumichi i mo y Jeremia teng y,

²Israela chengchi i Tameuh, ati cheaungkhang sa thai nai keung ARENG my, “Kai ly Babulon samrang i sa thai nai taphra vui bo.

³Hini Achura yhm i, samrang Nebukhadnezar my Babulon mary mang y syn vui nai yhmtheaung katui ngiereichi ai, saneng nyhrei sala y hini meingtym y, katym hai ali teang ai.

⁴Kai ly Jehojakim i chapo Juda samrang Jehojakhin ai py, Juda pri i dengdairei Babulon pri mang y abawi jo nai, langheng hawi nai khumichi hawi vanrei, kahawi ali teang ai. Ne, Babulon samrang i sa thai naira kataphra takengkei ai. Hini ly kai ARENG i thui nai leu ne,” napi.

⁵Huna nai khala y kai ly Achura yhm theung y angdo nai pathyp pi nai keungchi hawi, khumi bawibawichi i mo y ananiah teng y,

⁶“Nang i thui nai kamta tym sy! ARENG ly hina nai kamta sa ai nai py kai athang khai! Mymy ly nang i thui nai kamta tym hai takengkei ai nai py, Babulon mary y tawn vui nai Achura yhm i yhmtheaung katuichi hawi, langheng hawi vui nai khumi bawibawichi ai py, hawi ali teang ai, nanai kai ly athang kakhai khyp nai ne.

⁷Na i py nang hawi vanrei khumi bawibawichi teng y, kai i thui nai leu ly tangai ba.

⁸Nang hawi achi i deung ny y rai nai, jangni i amochi my thui nai ly khumi cheng cheaungkhangchi hawi sa thai naira len nai prichi py, tavai ka-jeira, takang theu nai hawi, no kanghawi avum u ai, nanai thui u rym nai ne.

⁹Na i py tlamsa naira awm ai, nanai thui akan yb nai amochi ly ni i leu thui nai tym khyp khala naini, ni ly ARENG my pato angchi khyp nai amo ne, nanai palawn pajau ai,” napi.

¹⁰Huna nai khala y ananiah ly kai i kaneaungra i tamtleang leng vui iy khei piupa i,

¹¹khumi bawibawichi i mo y kai ai, “Khumi cheng cheaungkhangchi tlang tleaung y samrang Nebukhadnezar i patli nai tamtleang ai, hina nai kamta khei piupa vui ai. Hini ly saneng nyhrei sala y tym ai, nanai ARENG my leu pei nai ne,” napi. Huna nai khala kai ly katako veng bo.

¹²Neng kra y nai sala y ARENG ly kai teng y,

¹³ananiah teng y chei ly “Nang ly dengkeaung hawi sa nai tamtleang khei vui pajau teu i py, mymy ly tamo tamtleang hawi theng ali teang ai.

¹⁴Israela chengchi i Tameuh, ati cheaungkhang sa thai nai keung ARENG ly khumi cheng cheaungkhangchi tlang tleaung y tamo tamtleang ang tleang ai i, nichi ly Babulon samrang Nebukhadnezar i miseaung y awm u ai, nanai leu ang pei bo. ARENG my daichi mawichi malawn py Nebukhadnezar i miseaung achei hai ai, nanai leu pei yb bo,” nanai thui hai nai ne.

¹⁵Hunaibaly kai ly ananiah teng y, “ananiah awi, tangai ba! ARENG ly nang ai ang pato nai ny y. Nang ly hini khumichi ai, nangmy ka-chawi leu ym ai nai sa nai ne i,

¹⁶nang ai nawi su veng ai, nanai ARENG my thui khyp veng bo. Nang ly ARENG ai khumichi my tiu ai nai kachyh nai ne i, hini saneng dym y naimy dei ai,” napi.

¹⁷Naibaly amo ananiah ly huni saneng saryh lo y my dei vui bo.