Read Khumi Chin JEREMIA 29 Bible Online

JEREMIA 29 - Khumi Chin bible

JEREMIA 29

¹Kai ly Jerusalem mary i dengdairei Babulon mary y Nebukhadnezar my langheng y hawi nai pathyp pi nai keungchi, amochi, lu sa naichi hawi khumichi teng y cha harei kapa pi nai ne.

²Kai ly samrang Jehojakhin, huni samrang i amhm, samrang yhm i miteaung kehchi, Juda pri hawi Jerusalem mary i luchi, kupe kakawpchi hawi kalop kawp keh naichi ai pri pala chum nai bo y tajiu nai cha ne.

³Kai ly huni cha ai Juda samrang Zedekiah my samrang Nebukhadnezar teng y pato nai Shaphan i chapo Eleasah hawi, Helkia i chapo Kemaria nini lawi pei pi. Huni cha theung y,

⁴“Israela chengchi i Tameuh, ati cheaungkhang sa thai nai keung ARENG ly Jerusalem mary i dengdairei, Babulon mary mang y pri pala nai khumichi teng y,

⁵‘Nangchi ly yhm hlau sa iy saleaung khuteng palo u. Akho apaichi py so u ly nga nai thengthaichi cho u.

⁶Yhmtheaung so u ly cho chanauchi py so u. Nangchi i cho chanauchi py, cho chanauchi nga ai nai yhmtheaung so hai u. Nangchi ly khumi peung hai ai nai tla i, jum ai nai tlo y.

⁷Nangchi ai langheng y kang hawi nai marychi ai hawi naira so u. Huni marychi nang chawn baly nangmychi py nang chawn teang ai nai deaungkho y, huni marychi i vui kai teng y chiu so pi u.

⁸Israela chengchi i Tameuh, ati cheaungkhang sa thai nai keung kai ARENG my kang pany hai bo. Nangchi ly nangmychi theung i amochi hawi, mo mang i satang thui nai khumichi i, li-tapawp naira y awm u moh. Nichi i amangchi ai py tahm pateng u moh.

⁹Nichi ly kai i amyn angam iy, nangchi ai ang tapawp u nai ne. Kai ly nichi ai kapato nai ny y. Hini ly kai, ARENG i thui nai leu ne,’ napi.

¹⁰“ARENG my, ‘Babulon mary saneng vui saryhrei chih nai khala y, kai ly nangchi ai kang khen ali teang ai. Kaimy leu adeu hai nai kamta nangmychi pri y kang pahawi ali teang ai.

¹¹Nangchi i vui kai i pasym yb nai katauchi ly kaimy naini pany khyh. Huni sa ai tau naichi ly nangchi ai nang chawn hai ai nai ne i, nangchi mo mang i vui amcheang hai ai nai sa ai tau nai ne. Nangchi ai ka-jeira tym hai ai nai tau naichi ny y leang.

¹²Huna nai khala y nangchi ly kai ai palau u ai; kai teng y jeu iy chiu sa u ai. Kai py nangchi i hnei takeng nai kang pathang pi ai.

¹³Nangchi ly paleung hawi verei hau ai nai deaungkho y, kai ai hau nai avum u ai.

¹⁴Nangchi ly kai ai avum angchi khyp ai i, kai py nangchi ai nangmychi i pri y kang pahawi ali teang ai. Kai ly nangchi ai ahei hai nai pri neangneangchira i nai pangym ali teang ai. Hunaibaly nangchi ai langheng y hawi ai nai patiu nai pri y, kang pahawi ali teang ai. Hini ly kai ARENG i thui nai leu ne,’ napi.

¹⁵“Mipui nangchi my, achi i vui ARENG ly Babulon mary y amochi ang pei bo, nanai thui u.

¹⁶Davida i areng atehra y atheng nai samrang ai py, nangchi hawi vanrei langheng y hawi y nai, nangchi i amjo amnau hini mary i khumichi molam y, ARENG my thui pi nai leu ly tangai u.

¹⁷Ati cheaungkhang sa thai nai keung ARENG my, ‘Kai ly nangchi i tlang tleaung y tavai tiu nai, takang theu nai hawi no kanghawi ka-jeirachi katym hai ai. Nichi cha ai nai ngo y nanai pa-rei veaung nai thaidu athaichi kamta lawm hai ai.

¹⁸Kai ly tavai atiu nai, takang theu nai hawi no kanghawichi katym hai ai i, kapatang hai ai. Hunai deaungkho y khaileaung pri i khumi cheng cheaungkhangchi ly nichi ai niu iy, jei nai kaso theu u ai. Nichi ai ahei hai nai meingtym tleirei y, huni khumichi ly nichi i patang nai niu i, jei nai kaso theu u ai. Nichi ai py panui hai iy nichi i amyn ai py, vaineng abeu nai leu saichira y teaung u ai.

¹⁹Nichi ly kai i miseaung amochi dengdairei avaw avawrei, kai i leu pei nai tangai u y. Hunai deaungkho y huna naichi ly nichi teng y tym ai. Nichi ly huni leu tangai ai nai akhi u.

²⁰Jerusalem mary i dengdairei Babulon mary mang y, kaimy pri pala nai khumi bawibawichi awi, nangchi ly kai, ARENG i leu pei nai tangai u,’ napi.

²¹“Israela chengchi i Tameuh, ati cheaungkhang sa thai nai keung ARENG ly nangchi ai mymy i amyn angam iy li-tapawp nai Kolaiah i chapo Ahab hawi, Maaseiah i chapo Zedekiah nini i molam y leu pei nai ne. Mymy ly huni khumichi ai Babulon samrang Nebukhadnezar i kiu y au ai nai ne iy, huni samrang py nichi ai nangchi i mei ka-niu y padei ai, nanai leu pei bo.

²²Jerusalem mary i dengdairei Babulon mary y pri pala naira avum nai khumichi ly khumi leaungrei ai pasawi patau ai nai ngai lawh baly, ‘ARENG ly nang ai Babulon samrang my kangheng tangmy mai y leng nai Zedekiah hawi Ahab nini ai kamta so kalei sy!,’ nanai thui u ai.

²³Hini ly nichi i vui khym taham lawm ai; ati mana nai mo nabaly khri pa-rei kamngo sa u nai deaungkho y ne. Nichi ly ami i aju chanauchi ai taphra u iy, ARENG i amyn y ka-chawi leu thui u bo. Huna nai sa naichi ly ARENG i kangai hawi amlau y. Mymy ly nichi i sa nai saichi ai chaipyn pa-rei pany nai keung ne. Hini ly kai, ARENG i thui nai leu ne,” napi.

²⁴Israela chengchi i Tameuh, ati cheaungkhang sa thai nai keung ARENG ly Nehelam avang i khumi Shemaiah teng y thui pi ai nai kai ai pato nai ne. Ni ly mymy kypkyp my kiu myn tajiu iy, Jerusalem mary i khumi bawibawichi, Maaseiah i chapo pathyp pi nai keung Zephaniah hawi, takhra pathyp pi nai keungchi teng y Shemaiah my pa nai cha theung y ly hinai kamta tajiu nai ne.

²⁶“ARENG ly nang ai Jehojada i jeng pathyp pi nai keung y khai i, nang ly Achura yhm kry nai keung kalen lawn bo. Amo amlawn nai khumi kamthu ngiereichi ai kaneaung y tamo sengkry patli iy thang ai nai ly nang i kalop ne.

²⁷Khumichi teng y amo amlawn iy leu thui nai Anatho mary i Jeremia ai, nang ly ati mana nai y thui parip y lawh mo?

²⁸Jeremia ly Babulon mary y awm nai khumichi teng y, nangchi ly langheng y hawi nai neng ly kra parai ai nai deaungkho y, yhm hlauchi sa naimy awm iy, akho apaichi sa naimy thengthaichi cha u ai nai tla, nanai thui pi nai ne,” napi.

²⁹Zephaniah ly huni cha kai teng y phain pi bo.

³⁰Huna nai khala ARENG my,

³¹“Kai, ARENG ly Shemaiah hawi ni i katu chanauchi ai kapajeng ai. Kai ly ni ai pato y i py, ni ly amo leaungrei kamta amlawn iy nangchi ai leu ka-chawi ym ai nai thui pi nai deaungkho y, ni ly kai i khumichi ai kai ai tiu ai nai kachyh nai leu thui nai ne. Hunai deaungkho y ni ly nichi teng y kapei ai nai atiti kahawichi niu ai ny y. Hini ly kai ARENG i thui nai leu ne,” nanai Shemaiah molam y leu pei nai ly Babulon mary y langheng hawi nai khumichi teng y thai hai ai nai leu ang pei nai ne.